راح الزمان وروّح العمر وياه
 

راح الزمان وروّح العمر ويّاه
ولا بقى الا الذكريات الحزينه
.
ياليتها راحت مع اول معاناه
ولا بقت داخل ضميري رهينه
.
العمر راح ولا لقى ما تمنّاه
والعالم الله وش بقى من سنينه
.
شعري حديث الروح والصمت معناه
ومشاعري في وسط قلبي سجينه
.
اللي نصيبه كل الاحباب تنساه
روحه بترّبة ذكرياته دفينه
.
بيني وبين الوقت الاول محاكاه
نبرة حزن زادت بقلبي ونينه
.
اشواق تاخذني على ماضي" تاه
اشتاق له لكن ويني و وينه
.
وفي (مدينه) عمر ماضي وعشناه
كانت حياه وكانت ايام زينه
.
وانا ادري ان المستحيل انّي القاه
والمستحيل انساه وانسى المدينه
.
غرام قلبي ياهوى وين ودّاه
غربة مشاعر شاب منها حنينه
.
ياحسرة اللي علّه الشوق وابراه
قلبه حزين و دمعته وسط عينه
.
عاشق وفي بحر الهوى ضاع مرساه
ماعاد يدري وين ترسي السفينه
علي السّبيّه