جيت ابقصيدي ولحنته وغنيته=فيك القصيد ابحروف الشعر واوزانه
وحرفي الي بغى يسقط ورديته=يقول من غيرها يذبل بقيفانه
بغيت اغير مساره يوم انا جيته=لقيت يمك مساره وانت عنوانه
قمت اعسف الحرف لكن يوم شديته=وقف معاند ويعلن جد عصيانه
وقام حرفي يخاطب قلب حبيته=واسلم لحرفي فوادي واعلن اذعانه
وابحر قصيدي بحرفي وانرسم بيته=يخاطبك بالقصيد او ينثر الحانه
سويت شعري على لحنك وقفيته=حبك معاونيه والاشوق نيرانه
ذبحتني كيف شعري ينكتب بيته=لاغبت في من باقول الشعر بالوانه
كنك حظنته بمكنونك وربيته=وكنك الي انولد شعري على شانه
منك استقى هيبته وابك ارتفع صيته=وانت السبب لا على شعري بميدانه
رسمت منك القصيد الي استمديته=من روحي الي سرت بالحب هيمانه
طوعت قلبي على شانك وخليته=مسكنك واقفلت لجلك كل بيبانه
نسيت في حظرتك شيٍ تمنيته=نسيت نفسي وهي تطلب وعشانه
لاشفت وجهك وهبت العمرواعطيته= واحترت وش باقي اعطي اعيون نعسانه
برمش عينك قتلت القلب واحييته=وارويت نفسي وهي ترجف وعطشانه
منك القمر ينعكس نوره ومديته=لولاك ما كان نوره هل باكوانه
والورد بالون والاطياب رشيته=لولاك ماكان تتمايل به اغصانه
كنك رسمت الحلا بيدك وسويته=كن الحلا لك بأشكاله والوانه
ترى قصيدي يموت ان كان صديته=وينتحر بحر شعري فوق شطانه
لولاك ما كان بحر الشعر طبيته= انت الشعر وانت عنوانه وشيطانه

وهكذا يكون الابداع دائما رفيق الهمس

	ترى قصيدي يموت ان كـان صديتـه وينتحـر بحـر شعـري فـوق شطانـه لولاك ما كـان بحـر الشعـر طبيتـه انت الشعر وانـت عنوانـه وشيطانـه