أسمع بعيد الحب ماشوف الاحباب=ماشفت لي خل ٍ يواطن خليله
تعذ ّرت كل الوسايل والاسباب=عن وصل معشوق ٍ دروبه طويله
هذا زمان ٍ جُلّ مافيه كذ ّاب=يبعد بمطلوبك وغصب ٍ تجيله
أنا اشهد انـّه مارحم صبوة الشاب=يبليه باللي مابيقدر يشيله
الفتنه استاقت مطاليق ورقاب=مثل الجيوش وشاهق ٍ سال سيله
قانونها مأخوذ من شرعة الغاب=كلـّن جهل دربه وخالف سبيله
دنيا حكمها مخلب الذيب والنـّاب=واللي يطاوع شورها ياحليله
دنيا على معسورها صكـّت الباب=يمسي ويصبح ويتزايد غليله
دنيا رمتنا في في تهاويل وصعاب=ضعنا وضاعت كل خصله جميله
صرنا تبع في تالي العالم اذناب=بعنا شيمنا والشرف والفضيله
ياليت نجمي في مباديه ماغاب=وين التقي مثله واحصـّل بديله
ببكيه واكتب بالقوافي له كتاب=واتذكره في كل يوم ٍ وليله
واقول قلبي تاب من مامضى تاب=وارمي هموم ٍ فوق قلبي ثقيله