لو طغى ياس قربك واستحل البلاد = اطعن الوقت لين اطعم بدم الوجود
جيت تصلح خفوقي من كثير الفساد = وانت في قلة افراحي بحزنك تجود
من هشيم الأماني كل زرعي كساد = شح غيم الأمل في مستحيل الرعود
جيت مستفزع اطلب قوتك والعتاد = أرهب اليوم يخشى الغد وامسي يعود
القدر لو مشيت اصبعه فوق الزناد = صب سوط العذاب ومدني بالجلود
واقعي قطرة من فيض بحر مداد = من خيال السجين اللي ثنته القيود
مااختلف وجه حزني لو طلبت السداد = نفس ذيك الملامح نفس ذاك البرود
لين سافرت ادور لك بطول البعاد = ورغم طول المسافه كل دربي صعود
جيت لك يا مدينة (إرم) ذات العماد = متهم ضيع التهمه ومات الشهود
افتح الجيشك بمنفاي باب الجهاد = دام كل المشاعر تحت سيفك جنود
واشعل الريح نارك ما وراها رماد = كل ما تبتعد عنها لهبها يزود
ايه شب المشاعر صادق الضحك عاد = غصن حزني بدى من برق وصلك ينود
معك الايام مدت لي سنين الحصاد = ذر ملح الموده في عيون الحسود