تقطع وانا اوصل شي بينك وبيني = واغض طرفي عن خطاك وسواياه
وانحر دموعي بين جفني وعيني = واجي واقول الضيق والهم يفداه
وتصب في وجهي عنا تهمتيني ! = ترضي غرورك دون أية مبالاة
سبة جفاك البارحة من يديني = وامسيت مركب مالقى وين مرساه
قتلت حكيك ماسقيتك حنيني = والشوق نادى مالتقى قلب لباه !
هذي أنا !! صورة وبرواز طيني ! = داخلك فكرتها وبيديك فرشاة
وان جيت باسألها أنا منه ويني = ردت عليّ لا باوله لا في اقصاه
لكني اكبر من قساوة سنيني = اكبر من اني انكسر من معاناة
أكبر من اني اصفق براحتيني = والا اسأل المخطي يبرر سواياه
واكبر من ان الصخر فيني يليني = لو كان قلبي هدّه الشوق واضناه
دام ان باب الصدق بينك وبيني = بيدك قفلته .. باقي العشق عفناه
ادري بتنكرقلب وده يجيني = وادري بتهدم كل حلم ٍٍ بنيناه
وادري بك الحين بتقل ما تبيني = مادامني ماطعت زيفك ومبداه
لكن وربك .. لو بتقطع وتيني = ليموت صبرك ماحكى القلب شكواه
لاني .. أنا معتادة اشرب أنيني = معتادة اصرخ صمت ما ينطق الآه
ماجت عليك .. الهم فيني دفيني = لو زاد جرحك مرحبا به وحياه