الله يقطع رجاكم يارعاة الفساد=ياللي من اسبابكم جده غدت في خطر
سرقتم الأرض والثروة ورزق العباد=بعد الكحل تسرقون من العيون الحَور
يامن شكا منكم الما والهوا والجماد=والزرع والضرع يشكي والحجر والمدر
ياللي حقارتكم اغدتكم سواة الجراد=عين الجرادة بيدها مالها معتبر
من الوقاحة تساوون العطر والسماد=بحيرة المسك قاذورات ولا عطر؟
ماباقي الا تبيعون الوطن بالمزاد=خنتم وطن بعد ما خنتم ولاة الامر
عزالله اليوم حانت روسكم للحصاد=حيلكم السابقة عند الملك ماتمر
جرح الوطن ماتداوونه بشاش وضماد=وجرحً بقلب الملك ماعد يبي له عذر
اللي جنوده جنوب المملكة في جهاد=رجال راياتهم بيضا ببدو وحضر
سلم بيد خالد الفيصل قرار اعتماد=لازم تزيل الفساد ان قلّ ولا كثر
هذا هو أول خبر والنار تحت الرماد=اما نطفي الحريق ونحتذر للشرر
أما نقل يالله ارحمنا بغيث البلاد=نفرح بسقيا البلد من دون نفقد بشر
والا ارقدي يابلادي واهتني بالرقاد=وندعي الله علينا لا ينزّل مطر

لله درك
انا اشهد انك تتربع على قمة الابداع
صح الله لسانك واعلا شانك
جده تستاهل من الجميع التفاعل مع هذه الكارثه
هنا اسجل اعجابي بهذه القصيده الرائعه