بعض الخلايق بالملايين ينقاس=والبعض حتى القرش فيهم خساره
ودك تشوفه تحت الاقدام ينداس=لانه حقير وعيشته في حقاره
مكروه من ربعه ومن جملة الناس=ماحد سلم شره ومن كير ناره
نقال هرج وللمخاليق جساس=سمعه وشوفه وجهه بيت جاره
يرقب بيوت الناس في وقت الاعساس=ما كنه الا عسكري في خفاره
خطى المراتب كلها بين الانجاس=تلقاه دايم معتلي في الصداره
يا نعلبو اصله ويا نعلبو الساس=ويا نعلبو نفساً تحب القذاره
وينه من اللي دايم الدوم نبراس=يحفظ حقوق الجار والعارعاره
لانه تربى حر والحر حساس=يعجبك دايم يكتفي بالاشاره
تلقاه دايم للمطاليق رواس=واذا نطق له هيبته واعتباره
في دنيته ما قد مشى درب الادناس=يخجلك لامن جيت له من وقاره
من شيمته دايم على الراس ينباس=والناس دايم تتجه صوب داره
الطيب اصله والطهاره له الباس=والصدق طبعه والمكارم شعاره
انا اشهد انه بالملايين ينقاس=والبعض حتى القرش فيهم خساره