يابوي مافيني ولا شي موجود=
الا دموعي من يدوّر وَجَدْها=
خلوني أبكي طالما الدمع محشود=
العين عيني وش لكم من جَهَدْها؟=
الدمع سيف الحَقّ لعيوني السّود=
محدن سأل عنها .. ولا احدن نَـشَدْها=
معذور من يبكي على عِزّ مفـقود=
ذكرى دفنْـت أسرارها في لحَدْها=
أبكي على طاري صبا نجد ياسعود=
ودموع عيني مايوقّــف مَدَدْها=
حُبْ الرياض اللي شَغَـلْ قلب وكبود=
والعين من فرقاه تشكي رُمَدْها=
لاذعذع الغـربي ولا نسنس النّود=
تِبْرقْ سحايبها ويصْرخ رَعَـدْها=
كمْ كنت من بِدّ المخاليق محسود=
كثر الورود اللي فؤادي حَصَـدْها=
ضحكت قالوا لي : ترى الضحك منقود=
بكيت قالوا: عِزّ نفسك تَجِـدْها=
مِثْل العقيم اللي تبشّر بمولود=
ويموت ماسُرّت بشوفة ولدها=
شهور تستنّاه وسنين وعقود=
يمكن يجـود الحظ الأقشر بَعَدْها=
حتى دهمها الشّيَب والعمر محدود=
كم سافـرتْ لجل الدواء من بَلدْها=
وبلحظةٍ جَتْها البشاره بموعود=
إنّ الفرح حطّم حواجز نِكَدْها=
تسعة شهـور أتْعُـدّ الأيام بركود=
ومن الفرح تغلط وتنسى عددها=
كمّ هدّرتْ قبله من أموال ونْقود=
تشري هدايا لجْل فـلْذة كَبدْها=
وبيومه الموعود في ساعة الجود=
كان القدر بالفجْعه أمرّ و ادْهَى=
إثْنا عَشَرْ عامٍ تزاور ثراء العود=
تصبح بمفـردها وتمسي وحَـدْها=
تبكي على قبره وهو فيه ملحود=
وهي تطبطب فـوق ظهْره بِيَدْها=
***