في شعبة غنيجان قاعـد خـلاوي
والليل عسعس واهجعن المساريـح

واخايل بروق الشمـال القصـاوي
من مفرق البترا الا وادي السيـح

يخرع سنا برقـه بذيـك النحـاوي
برقن حقوقن مثل بيض المواضيـح

عسـا مراهيشـه تلـخ الربـاوي
من دلجة الظلما لميـن التصابيـح

واشوف برقه بالسحايـب يـلاوي
ينير كونه مثـل سطـع المصابيـح

يشدنـي ذاك الرهـام الـعـلاوي
وشعايل بروقـه سـواة الملاويـح

وسجيت مع حس الرعود الصداوي
اللي توارد مـن مزونـن ملاقيـح

ماني غرير القلب ومانـي هـواوي
مير الولع للبـر فـي حبـه اريـح

وش احلا من بطحا الشعيب العذاوي
في برحتن صمدا بها ساكن الريـح