مساء الشعر والشعراء .. على قولة حبيب قلبي وأخي الغالي / علي السبيه الله يذكره بالخير ( إن مريتم مشكورين وإن خليتموها للجن برضو مشكورين )
ـــــــــــــ

لاشفت من هو يشبهك .. تاهت العين=ويصيبني يازين حالة تشنُّج
أحيا بغيبوبه وأنا آقول هالحين=كل الجروح اللي بقلبي تبنَّج
وأطيح من طولي ومدري أنا وين=من قوة الفرحه عظامي تثلّج
بالذات لو فجأه .. وأنا عارف ٍ زين=إنّ الغضي من شخص ثاني تزوّج
وفبالي َ إنّي رايح أصدفه بعدين=والوعْد بظروفه وحسْب التدرُّج
ياناس ياللي ترحمون المسيكين=دخيلكم خلّوا عيوني تفرَّج
أكبر طموحي ياهلي شوفة الزين=وأموت لو فيني حبيبي تهرَّج
أنا القتيل إبخنجر الهجر والبين=ماشفت خلّي من زمان التخرُّج
من وقتها وأنا أحرق الروح تدخين=وأتذكّره سيد الدلع والتغنُّج
***