أخي الغالي عين الجمل تشرفت بمرورك بموضوعي والله يعطيك العافية ويسعدك وأشكرك من أعماقي على الثناء علي وعلى ما أطرحه من مواضيع ومنك نستفيد ، وبالنسبة لبنات هذا الجيل والله ما جابت خبر عن الحفلة كل همها الزفة والكوشة وفستان العرس والأصباغ اللي ملطخة بها وجهها ، أما الطقاقات فلا حلوى والله لا صوت عليهم ولا أغاني ، وإلا ديجيه يفقّع الأذان ( طبعاً كل المعلومات هذه عن الكوشة والزفة والطقاقات والديجيه والخيجيه ) أستفدتها من كهلتيه لا تعوّدوا تقولوا وش يدري طير حلحال عن تيه آهروج ، وإذا جيت تسأل كهلتك هااااه وش من عرس قالت بايخ زي وجيههم وديجيه أصمخنا وفقع أذاننا والله ما تسمع ذا جنبك وإنك ما تشوف إلا براطمها تـتحرك من قوّة الصوت وطقاقات ما يعرفنه يغنينه وأغانيهم مثل وجيههم ، قلنا لهم إلعبوا لعب الديرة أحسن من الديجيه اللي أصمخنا وفقّع رؤوسنا قالوا ما نعرف ، طبعاً كهلتيه من جيل اللعب وتكره شئ إسمه طقاقات وإلا ديجيه ، تبغى دف ولعب وقصائد مثل القصائد السابقة لكن ما جت في إيدها وإيد واحدة ما تصفق أغلب اللي حولها من جيل البلاك بـيـري والآي فون .
أما بالنسبة لهذه المرأة اللي تودع بنتها فالجود من الموجود وهذا يـتضح أن ما كان يضئ بـيـتهم في ذلك الوقت إلا القازة وتشوفها شئ عظيم وهذا يدل أن في وقتهم ما بعد جاء زمن العدنيات والفوانيس والأتاريك وإلا كانت شبهتها بشئ نوره أقوى من نور القازة ، والله يازين تلك الأيام ويا زين أهلها والحمد لله على كل حال .
دمت في خير وسعادة وحفظك الباري .