حطي صينية البطاطا في الفرن لحد ما وشها يحمر



أعدّتها لكم: آية خالد
النهارده هنقدم لك طريقة جديدة لعمل البطاطا، علشان تعملي لأسرتك طبق حلو مختلف ولذيذ..

صينية البطاطا بالزبيب
المقادير:
بيضة
كوب لبن
كيلو بطاطا
2 ملعقة سمن
½ كوب سكر
½ كوب زبيب
ملعقة صغيرة قرفة
2 ملعقة كبيرة جوز هند
¼ ملعقة صغيرة فانيليا


الطريقة:
1- اغسلي البطاطا كويس، وبعدها اسلقيها لحد ما تستوي، وقشريها واهرسيها بالشوكة لحد ما تبقى ناعمة ومافيش فيها أي كتل.

2- سخني السمن في طاسة على نار متوسطة، وضيفي عليه البطاطا المهروسة والسكر، وقلبيها على النار لمدة 5 دقايق، واخلطي البيض مع اللبن والفانيليا في كوباية، وارفعي البطاطا من على النار، واخلطيها مع اللبن والبيض في طبق غويط، وقلبيهم كويس بملعقة خشب كبيرة.

3- ضيفي على الخليط الزبيب والقرفة وجوز الهند، لحد ما تحسي إن الخليط ممتزج كويس وطري، وبعدها افرديه في صينية متوسطة، ودخّليه الفرن على درجة حرارة 190، لحد ما وشه يحمر، ولما تبرد قطعيها وقدميها.. وبالهنا والشفا.

وبكده تكون خلصت وصفتنا النهارده..
جربوها وقولوا لنا رأيكم فيها..
واستنونا بكره مع وصفة جديدة..
سلام..