ياطول ليلي بين الآهات وآهات=اردف ونين ولا في اليد حيله
والناس من حولي عذولً وشمّات=واللي يواسيني يقل ياحليله
بنيت لاصحابي قصورً مطلآت=على حدايق مثمرات وضليله
وانا كما اللي في قفص الاتهامات=لاحد شهد ضده ولا اخلي سبيله
وإلا كريم بدار ناسً مخمّات=ترحيبها ناقص ولو زاد قيله
الهرج واجد والنوايا سقيمات=مضاهرً والحمل ماترتكي له
انكان حظّي ماحضر في المهمّات=جعله يموت ولا يعيّن قتيله
حياتي القشرا عدوّة ملذّات=ماعندها لافراح قلبي وسيله
الله ولا رجوى الوجوه المصدّات=والله ولا حب الحياه الذليله