ضاقت علي ارضٍ رحوب واصبحت فاقد للامان=احس ما عاد به ونيس وحضي الله ما انكده
طفل بعد توني صغير ما اتحمل الام الزمان=راح السند راح العوين والوقت يالله ما عنده
ابوي في لحظه رحل يا ناس وين القى الحنان=لا رحت عني يا يبه من عاد قلبي يسعده
ما اشوف حولي اي شيء غير التعازي والصوان=فقدت احساس الصغير اللي حنانه يفقده
امي تواسيني وهي ادموعها تغشى العيان=يا كيف تتحمل عيال اكبرهم ما بيّن غده
واتحملت كل الظروف غير التعب فيها يبان=عجوزٍ اتعبها الزمان غير الظروف المجهده
وغادروا عني جميع ما عاد بقي غير المكان=واصبحت ما بين الجبال وحيد وباكر ما ابعده
واصبحت في حيره وحيد واقول يالله المعان=الصبح اروح المدرسه واحلم وقلبي اجلده
واشيل همي بالرجوع لا مّن وقت اليل حان=وشلون باقضي ليلتي والقلب خوفه يرعده
كابدت وحدي في ظلام لا لي معين ولا عوان=اطبخ عشاي ابوحدتي واحروق قلبي توقده
والف بعضي في بعض واتحسس الفجر ابيبان=ليلٍ طويل امعانده يا معنده يا مبرده
ماحدٍ يذاكر لي الدروس ولا احدٍ يقول لي وش كان=ماحدٍ سال كيف الدروس مدرسي من ينشده
اكفكف ادموعي وانا عايش مع نفسي رهان=اما اكون او لا اكون في ها الظروف المؤصده
دعيت ربي في سكون ابوي يسكنه الجنان= وتشفي امي ياكريم من السقوم المرقده