صندوق مزخرف هو , من برة و من جوة


مليان دواير دواير


وصاحبه اسمه الشاعر


قالولي حط راسك في الدايرة , هتلاقي نفسك في دنيا غير الدنيا


وعشان انا عيل صغير لسه , صدقت فعلا ان جواه هلاقي الدنيا


ونظرتي للدايرة أوام اتغيرت


بقت شباك لدنيا جديدة اتكونت


وبدأت اتفرج منها والشاعر يقول الاتي


هتشوف يا جميل الهلالي وخليفة الزناتي


بلاد جميلة وفوارس , وبحار فوقيها نوارس


دنيا جميلة من كرتون , كل حاجه ليها طعم و لون


وفجأة اتقفل الستار والدنيا اختفت ولاقتني تاني ف دنيتي


قلت ادور فيها ع الدنيا اللي ف الصندوق ودي كانت غلطتي


سألت ع الهلالي والزناتي قالولي مفيش


وسألت ع الفوارس قالولي متلقيش


في دنيتي مفيش كرتون ولا كرانيش


فكرت في دقيقة وفهمت الحقيقة


الدنيا اللي ف الصندوق زيها زي أي حاجه في دنيتي الحقيقية


موجودة كانت او مزيفة لازملها ف يوم نهاية فعلية


ومين عالم يمكن دنيتي دنيا في صندوق تاني في دنيا تانيه


ممكن ستارها ينقفل وتختفي وتضيع في ثانيه