يقول من عدى على راس عالي

للشاعر الأمير محمد الأحمد السديري رحمه الله




يقول من عدى على راس عالي
رجـم طويـل يدهلـه كـل قرنـاس
في راس مرجوم عسير المنالي
تلعب به الارياح مـع كـل نسنـاس
في مهمهٍ قفرٍ من الناس خالي
يشتاق له من حس بالقلب هوجاس
قعدت في راسه وحيد لحالي
براس الطويـل ملابقـه تقـل حـراس
متذكرٍ في مرقبي وش غدالي
وصفقت بالكفين ياسٍ على يـاس
اخذت اعد ايامها والليالي
دنيـاً تقلـب مـا عرفنـا لهـا قيـاس
كم فرقت مابين غالي وغالي
لو شفت منهـا ربـح ترجـع للافـلاس
يا ما هفا به من رجال مدالي
ما كنهم ركبـوا علـى قـب الافـراس
ولا قلطوهن للكمين الموالي
ولا صار فوق ظهورهن قطف الانفـاس
ولا رددوا صم الرمك للتوالي
كلٍ يبي من زايـد الفعـل نومـاس
من بينهم سمر القنا والسلالي
مثل البروق برايـحٍ ليلـه ادمـاس
يقطعك دنيا مالها اول وتالي
لو اضحكت للغبـن تقـرع بالاجـراس
المستريح اللى من العقل خالي
ما هـو بلجـات الهواجيـس غطـاس
ما هو بمثلى مشكلاته جلالي
ازريـت اسجلهـن بحبـر وقرطـاس
حملى ثقيل وشايلـه باحتمالـي
واصبر علـى مر الليالـى والاتعـاس
وارسي كما ترسي رواس الجبالي
ولايشتكي ضلعٍ عليه القدم داس
يا ابجاد شب النار وادنى الدلالي
واحمس لنا يا ابجاد ما يقعد الـراس
ودقه بنجرٍ يا ظريف العيالي
يجذب لنا ربعٍ على اكوار جلاس
وزله الى منه رقد كل سالـي
وخلـه يفـوح وقنـن الهيـل بقيـاس
وصبه ومده يا كريم السبالي
يبعـد همومـي يـوم اشمـه بالانفـاس
فنجال يغدي ما تصور ببالي
وروابع تضرب بها اخمـاس وأسـداس
لا خاب ظنى بالرفيق الموالي
مالـي مشاريـه علـى نايـد النـاس
لعل قصر ما يجي لـه اظلالـي
ينهـد مـن عالـى مبانيـه للسـاس
لا صار ما هو مدهل للرجالي
وملجأ لمن هو يشكى الظيـم والبـاس
بحسناك يا منشى حقوق الخيالي
يا خالق اجناس و يامفنـى اجنـاس
تجعل مقره دارس العهد بالي
صحصاح دوٍ دارسٍ ما به أو ناس
البوم في تالي هدامه يلالي
جزاك يـا وكـر الخنـا وكـر الادنـاس
متى تربع دارنا والمفالي
وتخضر افياض عقـب مـا هيـب يبـاس
نشوف فيه الديدحان متوالي
مثل الرعاف بخصـر مدقـوق الالعـاس
وينثر على البيداء سواة الزوالي
يشرق حمارة شرقة الصبغ بالكـاس
وتكبر دفوف معبسات الشمالي
ويبني عليهن الشحم مثـل الاطعـاس

https://twitter.com/ruba3com/status/...011218433?s=20