رثائيه

جاني خبر والقلب ناضت بروقه=وارتج عقلي والبدن كيف يهنا
في اليل قبل الفجر يبدي شروقه=قالوا توفت خالتك واتركتنا
كني شليل الرجل وايدي شفوقه=اقلب الجوال يسرى بيمنا
اجمع افكاري بروح امحروقه=واقول وش ذالي يقول اوسمعنا
مرت سنين العمر لحظه سروقه=اتذكر ايامٍ بها جمعتنا
ابغي اناديها وروحي حنوقه=وابغي بها ادعي والفجوع امنعتنا
يارب ترحمها وعفوك تذوقه=عداد ماسارت في ارضك وسرنا
لو كان دمعه من عيوني سبوقه=تردها لتسيل منها اوديتنا
لكن هذا الموت ماسرع طبوقه=لاحانت الساعه لفا واسترقنا
الموت حق وكل نفسٍ تذوقه=والعمر مهما طال لا بد يفنا