تعال يا سالم

تعال يا سالم بغيتك شُويّه= قدّام لا تطبق عليّ اللّحُودي
أبوك قرّب من حبال المنيّه= شايب ويشكي حيلته والجهودي
يا سالم اسمع جابتي والوصيّه=وافهم ملخصها وجمع البنودي
الاوله قدام تبكي عليّه= احفظ وصاتي والتزم بالعهودي
لله صل الفرض واتبع نبيّه=واكثر من التسبيح وقت السجودي
الله رب الكون جزل العطيّه=يعطيك مرضاته كريما يجودي
اقنع بما في إيدك وروحك غنيّه=واحذر هوى روحك على الشر يقودي
واحذر من الدنيا تراها دنيّه=ترى الذي يسعى لها ما يزودي
وان جاك زلّه من قصيف الحظيّه=احذر منه واحسن عليه الردودي
يا سالم ادري عنك روحك نقيّه= وايضا عن الدنيا بعيد وزهودي
خلك مع ربعك وكفك وفيّه= وهرجك ازكى من زهور الورودي
واحفظ لسانك عن هروج الخطيّه= ولا قصدت اقصد عزيز القصودي
والضيف لا رادك تلقه وحيّه= واليسر والموجود ما به نقودي
والخاتمه يحفظك رب البريّه= من سوء راع المخطيه والحسودي