يا مسافره

يا مسافره وش له بعد نعشق الدار=دامك تركتي الدار وش عاد فيها
تحرم علي الدار من بعد الأخيار=دارٍ تركتيها ابد ما ابيها
خذي معك قلبي وخليه تذكار =والروح خليها معك واحفظيها
وانا على ذكراك باعيش بحار=مالي بلد غيرك ودارٍ اجيها
باسكن بظفة ذكرياتك بلا جار=اغمض عيونٍ شوفتك ترتجيها
في وحدتي عايش مع الشوق محتار=غريب في دارٍ تربيت فيها
ارسلك اشواقي مع الطير لا طار=اظن وناتي بعد تسمعيها
احسد هبوب الريح لا جاك باعصار=واحسد ديارٍ يالغلا تسكنيها
البعد يقتل ما بقى بيدي اختار=الروح تنزف والمخاطر تجيها
العقل شارد فيك والجسم منهار=خوفي حياتي ترجعي تندبيها
لكن لو عمري فني او سار ما سار=قصة غرامي دوني واكتبيها