يابو متعب مانبغى الزيادة

مطر الزهراني

يابو متعب مانبغى الزيادة

بسم الذي رفع السماء بلا عمد *** رب البرية واحد فرد صمد
وبعد :
يتداول الناس فيما بينهم وفي المنتديات وعبر رسائل الجوال إشاعة مفادها أن خادم الحرمين الشريفين الملك عبدالله بن عبد العزيز حفظه الله وتزامنا مع الميزانية والتي غالبا ستكون غد الاثنين سيصدر مكرمة ملكية بزيادة 40% (اربعون في المئة عشان تقرونها زين ).
ولكن من هنا اقول تكفى تكفى تكفى يابو متعب مانبي الزيادة ويكفينا مافينا.
يابو متعب لو زدتنا 40 % زادوا التجار الأسعار 80 % ولاحد يقدر يكلمهم (فيهم أمراء ومسئولين وأصحاب رؤوس أموال ومانقدر نزعلهم لانحن ولا المسئولين في مراقبة الأسعار وفي مكافحة الفساد) عشان كذا خلي رواتبنا زي ماهي عليه تراها يادوب تكفينا لنص الشهر طبعا هذا بعد التقشف وشد الحزام والله لو زدتونا يابو متعب لزادونا غلا في كل شي ولاأحد يقدر يمنعهم .
يابو متعب مانبي الزيادة نبي الأسعار ترجع زي ماكانت ونبيكم تضربون بيد من حديد على جشع التجار من ماكانوا.
يابو متعب نبي السكن المريح مو ضروري فيلا أو قصر لا نبي شقه صغيره تقينا لهيب الشمس وبرد الشتاء .
يابو متعب نبي العلاج في أفضل المستشفيات وكل مواطن يكون له علاج في أي مستشفى وفي أي مكان ومن دون أوامر عليا والا واسطة وتكفى يافلان ودخيلك يافلان .
يابو متعب الأرامل والفقراء والأيتام والمعاقين يبون من يسترهم ولا يحوجهم لأحد إلا الله ثم انت يابو متعب تعوضهم عما فقدوا .
يابو متعب نبي وزراء وحاشية لك يخافون الله وينقلون لك الواقع .
بابو متعب نبي وظائف لشبابنا وبناتنا وإعانات لهم بس مو على شاكلة (حافز).
يابو متعب نعرف انك كريم وتحب شعبك والله واللي رفعها سبع انا نحبك ونحب وطنا ونفديك بالروح والدم مهما صار.
حبايبي : هذا بعض اللي نبيه وأترك الباقي لكم ...
وهذا بعض اللي خطر في بالي وأخاف انه خطر علي وكتبته ومانسقته أو نقحته وخلها على الله .

كاتبه /
مطر رزق الله رزق الله الزهراني