%%% (( مافيه أمل )) %%%

جديد المبدع اللي على قد حاله .. إن مريتم مشكورين وإن طنشتم الشكوى على الله

حسبي على اللي مَرّ ماسلّم .. وعمره ماسأل=مسترسل الجفوى بدون أسباب وبقلبٍ عنيد
حاولت نسيانه ولكن للأسف مافيه أمل=لي في غرامه فوق عشر سنين .. والزايد يزيد
أشوا (لو إنّه منزوي وبعيد) بألقى ع الأقلّ=عذرٍ يصبّرني على هجره وأقول : أشوا بعيد
مير إنّيَ آشوفه وياما آشوف ياما بالهبل=أقرب لعيني من مرور الدمّ في حبل الوريد
وشلون ! مدري ليش أموت؟وكيف بتصبّر؟وهل؟=من مات مثلي تُعتبر موتته في حكم الشهيد؟
ش اللي يريده نور عيني بعد كل اللي حصل؟=ش اللي يريده نور عيني ياعرب ؟ ش اللي يريد؟
كم قلت له : حاسب ضميرك وأكفني سيف الخجل=حتى ولو من سيفه وطعناته آنا المستفيد
ملّيت وأنا أقول : جرحي منّك أحلى مالعسل=والنار فيني تشتعل وتقول لي : هل من مزيد؟
وكلّ ماجيت أشتكي له .. قال : أنا مالي دخل=أجل من اللي له كتبت الشعر وأبيات القصيد!
يوم إنّ ربي حط فيه الزين .. والحسن أكتمل=شايف علي نفسه وهاجرني وتاركني وحيد
لو شافه البدر أستحى وعلى ثراء الدنيا نزل=والشمس تشرق في صباح العيد بالثوب الزهيد
ماخوفي الا آجيب فيني العيد وأعمل له عمل=بسّ الأكيد ( إنّي نويت أعلّقه ) بسّ الأكيد
خلاص مافيني .. تحمّلت الذي مايُحتمل=مافيني أستقبل وراء هذا التعب جرحٍ جديد
**