على شاطيء نهر حبك

على شاطي نهر حبك رسى قلبي باشواقه=وحط ابمركبه عندك ويبدي فيك اعجابه
سكنت ابضفةالشاطي ورحي حيل مشتاقه=مقابل قصرك الهادي غدت تمنعني ابوابه
عيوني قمت اصرفها وهي للقصر منساقه=وتتبع نظرة اعيوني شجون الشوق منسابه
فتحت الباب في غفله وجتك الروح تواقه=وصافح قلبي الملهوف مشاعر قلبك اوصابه
تبادلنا مشاعرنا بلوعة حب حراقه=لبس قلبي دفا قلبك وسار الحب جلبابه
وخيلت القصر قصري وصوتي يسكن ابواقه=وفي داخل دهاليزه مشاعر حب شبابه
وروحي طوعت بامرك مطيعه لك وطرّاقه=احسب القصر من حقي اثاري القصر لصحابه
وقررت اركب الموجه بمركب ما بها طاقه=ركبت الموج في غيه بغيت اموت باسبابه
وفي وسط البحر قلبي تزايد فيه خفاقه=وروحي بالعنا قامت لراعي القصر طلابه
غدا قلبي يناديها اثاري الروح سباقه=طعون البعد كاويها ونار الشوق لهابه
وانا في غبة الموجه اشوف الوحشه طواقه=واشوف الوقت عاندني معاه اظروف غلابه
وشفت ان الزمن كذبه وبه لحظات سراقه=نسايرها ولا ندري وهي للروح نهابه
وشفت ان الهموم اوصت على روحي وطباقه=وقلبي قام يتعنى وهو ساجد بمحرابه
لقيت ان الصبريشكي وقلبي يعلن ارهاقه=تعب من كثرة اسفاره وهو يبحث عن احبابه
وانا وسط البحر وحدي بمركب يعلن اغراقه=ولابه شط نرسي به واشوف الموجه غصابه