مرثية والدتي الغاليه رحمها الله

هذا القصيده رثاء في والدتي الغاليه رحمها الله رحمة واسعه واسكنها فسيح جناته
والقصيده بعض مشاعري وشأن الام عضيم لا توفي بقدرها كل مفردات اللغه

ماتت امي وانطفى نور العيون=مابقي لي بعد موت امي حياه
وين بلقى بعدها صدرن حنون=وين بلقى من بيغمرني رضاه
صاب عقلي من وفاة امي جنون=ماتحمّلت الخبر يوم الوفاه
قلبها الطاهر دنت منه المنون=يوم سهم الموت في لحضه رماه
آه ياحزن المشاعر والشجون=وآه ياكبر المصاب ويا عناه
كل مايجري في الدنيا يهون=الا فرقى الام يامكبر بلاه
كانت لي في دنيتي ملجا وصون=وكانت البلسم لعمري والغناه
وكانت لي من عاصف الامواج عون=وكانت المرسى ولي طوق النجاه
ليتكم يااهل المقابر تسمعون=والشرايع ياعسى ينطق ثراه
بعد موت امي لي الدنيا سجون=وطرف عيني مايهوّن من بكاه
بعد موت امي حياتي وش تكون=غير حزن وهم مايقصر مداه
يالله ارحمها عدد قطر المزون=واجعل الفردوس تنعم في رباه
هكذا كل الخلايق ميّتون=والبقا لله عالي في سماه