خيبة .. وطيبة ،،، حضور أول

السلام عليكم ورحمة الله وبركاته

بين أيـديـكـم كـمـا فـُـطـِرت

.

تدري وش اللي ردني بعـد غيبـة = اني على طول المدى مـا نسيتـك
وتدري بعد قلبي وشنهـو يعيبـه = انه جفانـي ليـن طعتـه وجيتـك
أمسى يئن ووسط صـدري دبيبـه = واصبحت لن ضلوعي حدود بيتـك
ان جيت اعاتب هدّ حيلـي نحيبـه = وان جيت اواسي قال تكفى نخيتـك
طالبك تكفـى روح عنـده وجيبـه = واشرح له اني غصب عني عصيتك
علمه بان الشوق مشعـل لهيبـه = واني على بابـه بهمـي حديتـك
قُل يـا.... حـال قلبـي عجيبـة = يكتبك في دمي ولـو مـا قريتـك
وان الحياة بـدون ذكـرك كئيبـة = واني لشحك عنـد ربـي شكيتـك
هذي قليل اشيا من اشيـا غريبـة = قلبي نسجها بس عشاني طريتك !!
وانحل عِقد من الحكي دون ريبـة = يشكي لي اوجاعي بزعمه سليتـك
حكي ٍ يقول العين ترسمـك غَيبـة = وان ايدي تصافحك لـو مالقيتـك
والمبسم اللي كان طعمه يشي بـه = يمسي مثيل العلقم ان مـا حكيتـك
تشكي لي اعضائي تقُل لي صويبة = وتلومني فـي قسوتـي ماهويتـك
واني اخذت السعد منهـا غصيبـة = ياكيف مالمحت لـك واحتريتـك !!
هذي بعض من كل يرجـي طبيبـه = متمـردٍ مـا يـدري انـي بغيتـك
مايدري ان الحال فينـي عصيبـة = واني من اعلـى كبريائـي بكيتـك
مايدري اني فـي بعـادي قريبـة = واني على بعدك بروحـي رعيتـك
واني رسمتك في سماي الرحيبـة = وان اعظم احلامي اقُل لك .. فديتك
هذي أنا مخلوط .. خيبـة وطيبـة = من غير ماتعرف فـؤادي عطيتـك
الحين بان اش ردني بعـد غيبـة = اني على طول المـدى مانسيتـك

وسلامتكم جميعاااا