قصة فتاة من احد المنتديات ....واقعية

قصة فتاة من احد المنتديات ....واقعية

السلام عليكم بنات



اللي بكتبه اليوم من جم سنه كتبت نصه في منتدى ثاني وتعدلت حياتي .. ورديت غلطت وكملت النص الثاني من مأساتي

للأسف يقولون المؤمن لا يلدغ من جحر مرتين .. بس انا كل مالي وانلدغ .ما احس بأثر السم إلا بعد فوات الاوان

بنات .. الله العالم بحالي اضحك واونس الناس ومن داخلي هموم تهد جبال الدنيا كلها

انا عضوه من زمان اهني .. بس سجلت بنك ثاني علشان اكتب لكم قصتي عسى البنات يستفيدون


(( ليصلك كل جديد أرسل الرقم 1 الى - 81428 للإتصالات السعودية - 601428 لموبايلي - 701428 زين ))


اللي خلاني اكتبها اني ميته قهر على البنات اللي يكتبون مواضيع ( احبه ويبيني بس .... ) .. واللي كاتبه موضوع عن روحتها شقه مع واحد وتقول خايف عليها

لا تلومونها .. الانثى ضعيفه .. إلا ما رحم ربي

المهم

انا مو الوحيده بين خواتي وعندي هم اخوان وايد ..

كنت مفتقده الحنان من توفى ابوي .. ومالقيته لا عند امي اللي كانت تفضل اخواني علينا وتشوفنا هم ناطره متى ينزاح .. ولا حنان من اخواني اللي كل واحد همه بس الناس وهمه نفسه .. ولا حسيت بحضن يلمني من توفى الغالي .. بالعكس صار التسلط مقذع

بدت مأساتي من دشيت الجامعه .. كنت طفله

اي نعم .. كنت طفله ما اعرف الدنيا ليمن دشيت الجامعه .. شفت ناس غير

وصار عندي تلفون ..( الحين انا بأواخر العشرين ) حزتها كنت تحت العشرين

وتعرفت على ناس وايد .. وكنت حزتها ملتزمه وايد

مع الوقت عرفت الكمبيوتر وغرف التشات وتعرفت على ناس وعالم قضيت وقتي بالمختبرات وايد بين المحاضرات

تعرفت على واحد .. وحسيت بمغص كل مره اكلمه .. مالكم بالطويله .. مع الوقت تجرأت وقصيت على نفسي وقلت يمكن الاقي عنده اللي مالقيته عند اهلي

ومع الوقت وبعد فتره غلطت معاه .. بس مو غلطه تمنع الزواج ( للأسف هذا اللي يفكرون فيه البنات الحين .. ما يدرون ان لكل شي عواقب)

المهم وخرت عنه .. وتبت وقويت علاقتي بصديقاتي المتدينات ومع ربي .. بس مع الوقت تعرفت على بنت معاي بالمحاضره .. وكانت سيئه جدا لكن كان اهتمامها فيني " المصطنع" ... وشفت بحياتي معاها حياة ثانيه .. كل المتع الوهميه .. فراره وهياته وشباب .. وانا كان دوري ( المراقب ) فقط بس اتفرج وانطر اليوم اللي اسوي نفسها.. ماكان عندي مثل اعلى .. حسيت ان حياتها مثل المخدر .. سعاده وقتيه بس وبعدها ارجع البيت بين امي واخواني جني بعالم واهما بعالم ثاني

ماكو اي تواصل غير شلونكم وشخباركم .. جنهم يبونا بس نعيش ناكل ونشرب وننام

ماهمتهم شخصيتنا بالعكس يبونا بدوم شخصيه

المهم

صرت اطلع مجمعات واعرف اماكن ما عمري رحتلها سينمات مطاعم .. ولمن كنت ابي اتعدل .. وكنت اقول لامي وديني السوق او هالمكان كانت تقول وخري عن هالاماكن الوصخه ( سوق وصخ؟؟؟ ) سينما وصخه؟ مطاعم وصخه؟

كانت حدها سوق ومجمع معين ومطاعم معينه .. غيره لا

المهم .. كل شي كان ممنوع في بيتنا كنت اسويه معاها

مع الوقت تناجرت وياها وطبعا ذلتني على ما وخرت عني

وعقب تعرفت على ( حمد) من النت .. الشخص اللي ما اقدر اسامحه لي يوم الدين


شفته وتعرفت عليه اكثر ( لاحظوا الذنب يجر الذنب لمن نتساهل فيه)

ومن كثر ما حبيته سلمته نفسي ... وغلطت اكثر واكثر

وبيوم من الايام اكتشفت انه متزوج وعنده عيال بالمتوسط .. كانت صدمته كسرتني

ومن كثر ما كنت مقهوره كنت اصلي وابجي .. بس كانت توبتي مو خالصه .. كنت اقول انا احبه واردد هالشي ليمن سامحته وزديتله .. وقام يستخدمني اداة ويتظاهر بالحب لي .. واكتشفت خياناته لي مع بنات بعد ( ياللي خان زوجته بيخلصلي مثلا؟ )

من كثر ما كان متأكد من حبي له كان يطلب مني اشياء شاذه جدا .. ماكنت اسويها بس كنت اطوف له

وبيوم صارت لي مصيبه كبيره تغيرت حياتي كلها بسبتها

ساعدت انسانه لكني تأذيت بالمقابل .. بس الموقف كشف وايد اشياء

.. ما اقدر اقول الموقف لأني بنعرف من ( اللي لهم صلة قرابه لي بالمنتدى) واهو ( حمد) وقف معاي فيها بس هم طلع بالاخير على حقيقته وربعه الي المفروض يساعدوني تهجمو علي واستغلوني .. لكن اله قدّر وستر مع انها كشفت لأهلي اني ما عدت بنت

بعد فتره كبيييره

قدرت ارجع لحياتي الطبيعيه وحبيت اني اصلح نفسي واخلص لربي .. سويت عملية ( مو بالهين .. دموع وانكسار امي واحساسها اني مو بنتها اللي تمنتها .. حسيت بالخذلان حدي .. لأن الشرف غالي .. حسيت بقيمتها حزتها .. غير الالم النفسي الم العمليه وتبعاتها )

وتميت جذي جم سنه طورت نفسي وايد ونسيت الماضي .. ليمن قص علي الشيطان مره ثانيه ونغزني بحجة ( الحب) الموموجود بيومنا هذا

كنت اسمع بمقولة ( اللي يحبج يطق الباب ) بس للأسف كنت اتجاهلها احيانا


المهم تعرفت هم على شخص ،،، وهم عن طريق النت ( دمرني هالنت)

كنت اعرفها من موقع الفيسبوك من سنتين .. بس السنه الثالثه قام يصر انه يعرفني اكثر .. قتله يعني شنو ؟

قال احنا ربع اي .. بس انا ابي اعرفج اكثر ،، انتي شوفتج اهني تحرك مشاعري

ياني فضول .. وطبعا كعادة الشباب تعبان على عمره ومجسم وحالته حاله

كلمته بالتلفون .. سألته انت متزوج؟ قال مطلق .. استغربت لأن عمره وشكله صغير

مع الوقت قال ابي اطلع وياج .. قلت اوكي

شفته وافترينا بالسياره .. تمينا نشوف بعض جذي فتره .. ليمن بيوم وداني عند عماره واصر انزل

تنحرت بمكاني وقلت انا ماشيه باي

زعل وزعلت وعقب راضاني

لين يه اليوم اللي خدعت نفسي فيه وصدقته

كنا علطول نبطل الكام ونسولف ليمن ننام والكام مبطل

وكله كنت اشوفه بالبيت وما يطلع .. قمت اضيج عليه واسأله شفيك كله بالبيت وتتم بالايام مادري عنك

قال اشوفج واقول لج

وافقت ورحت معاه بالسياره .. سفطنا عند نفس العماره وقال نزلي .. رفضت واصر .. نزلت

وطلع لي هويته .. ولا اهوا يشتغل بالقوات الخاصه عكس ماكان يقول لي انه موظف حكومي

وقام يقول لي مشكلته وانه تزوج وحده مطلقه واكتشف بعد اول سنه انها تخونه .. وحملت ويابت له ولد وهم تمت تخونه على حسب كلامه .. ما تحمل وطلقها ورفعت عليه قاضيايا وايد لدرجة تفنش من شغله وصار حبيس البيت..

ارتحت انه صارحني .. بس يومها تقرب اكثر وكان بيغلط فيني .. بس ابليس ما يتعب

كسر خاطري وكنت ابي انسيه همه بأي طريقه

قمت اروح معاه هالمكان وغلطت يا بنات للمره الثانيه

وانا اغلط اتذكر كل شي مر بحياتي .. ما كنت مستانسه .. لأني ادري اني غلط بغلط

قاعده اسعده واتعس نفسي ... حاولت اساعده نفسيا وماديا .. كنت ما انام واهو مهموم

تخيلوا راضاني يوم عيد ميلاده طمعان بهديه بعد ما كنا متزاعلين .. جشع جشع جدا

تميت على هالحال اقل من سنه .. وكل هالوقت كانت تصرفاته غريبه .. تجرأت ودقيت على حمد وقتله كل شي .. حاول طبعا يستغل الموقف ويرجع .. بس ما عطيتله فرصه

قتله طلعلي معلومات عن هالشخص ( معارفه وايد حمد) المهم لين صرت بين اني اعرف كل شي عن ( الزفت اليديد) وشعره تناسيت السالفه مادري ليش !!!

بس حاولت اوخر عنه .. بس كان اللي سويته يربطني فيه

شلون بتزوج؟ شلون بواجه امي مره ثانيه بعد اللي شافته مني؟

تخيلو يتم بالايام ما يدق ونتم متزاعلين فجأه يدق مشتاق لج

كنت احيانا اسأله تتزوجني ولا تلعب؟

كان يقول انا بعدي ما طلعت من القضايا اللي عندي

بعدي قلبي مجروح من خيانة طليقتي

ولا انتي ما تتطوفين .. ما كان يقول احبج .. بس يقول اعزج

كل هذا كنت عميه عنه .. ماكنت اشوف انه يستغلني .. كنت اقنع انفس اني احبه وانه بتعدل

بيوم وديتله اكل ولقيت سياره بسرداب مجمعهم السكني .. ومايل على دريشة السياره ( حسيت الوضع مريب ) نريتت بسيارتي بسرعه وطلعت ولا يدق علي ينزرني انتي شلون اتدشيتن المسافط بدون ما تدقين؟ اقول للحارس يسكرهم يعني؟

انصدمت من رده .. لأني كنت اييله البيت واقعد معاه بالساعات .. من الصبح لي المغرب احيانا .. وامه تكون نايمه وتطلع واخوه المتزوج بعد محد يدري اني موجودة

المهم عقب هالاحداث ... قررت اهده .. تعبت منه .قلت بتوب والله يرحمني

قام يدق ويدز مسجات ( قلبي يعورني وانا اكتب) ... اذاني يدق باليوم مليون مره وقام يقول وايد احبج

ومتأكد تموتين فيني

استموت علشان يرد وقلت اعطيله فرصه .. بس هم كان يبي شي مني

لمن رديت بشرني انه رد الدوام وحياته ردت طبيعيه

وباليوم اللي رحتله البيت وطلعت عقبها ما دق علي .. وعقب يومين دق .. ولا وحده تكلمني تقول منو انتي؟

قتلها انتي اللي منو؟ قالت انا زوجة ( الزفت) .. ماني قايله اسمه

سألتها وينج هالفتره؟ سنه كامله وينج؟ كنت ايي البيت وينج

قالت كنت ادرس بره سنتين .. واحنا ماخذين بعض عن حب

وخذيته عالرغم من انه موقوف عن شغله ..لأني احبه

ما تتخيلون لمن اقول سجين انغرست وتحركت بقلبي

سألتني وسألتها .. تأكْدت وتأكدَت انه خاين ،، قتلها قلبي يعورني .. قالت عيل انا شقول

المهم حاولت اكلمه .. ابي اعرف ليش؟

قلتها عطيني بكلمه مره وحده بسأله شغله

اهوا ما رضه يكلمني الجبان

ولمن دزيتله مسج على تلفونه قال

شنو تبين؟ انا اسف بس بلا مجهله وكل واحد بطريج

بناااااات ريلي وجسمي كله قام يرجف ماقدرت اتحرك اختي يت خذتني وودتني الطبيبه اول شي مالت النسا وسألتها تقدرين تسوين لي العمليه اللي سويتيها اعتذرت وقالت ماقدر مو بهالسهوله وتحملي

بس فحصتني وقالت عندج قرحه بالرحم ( تخيلو ماتزوجت وعندي هالمراض .. ومحد يوقف يمي غير نفسي وربي)

كنت ابجي واقول لو متزوجه جان الحين زوجي يمي يواسيني او امي يمي ..

بنات حتى الطبيبه النفسيه ما نفعت معاي .. الالم عميق

رديت لربي مالي غيره ادعي ... وليما الحين هالجرح كاسرني

انا من بره شي ومن داخلي شي ثاني


اتمنى الرساله وصلت يا بنات

لا تصدقين واحد يقول احبج ليمن تشوفينه يمج عالكوشه ...

ترددت اكتب قصتي .. بس ما اتمنى اللس شفته تشوفه اي بنت


ملاحظه : وايد تفاصيل ما قلتها لطولها ... ووايد تفاصيل مؤلمه ماقدرت اقولها لأني راح انعرف


ادعولي بالرحمه والستر لي ولبنات المسلمين
وديروا بالكم على بناتكم .. واحتووهم تره كل زمن غير عن اللي قبله


آسفه لأني طولت

بس احبكم وابيلكم الخير

بكاااااااااءبكاااااااااء

اللهم استرنا فوق الارض وتحت الارض ويوم العرض

تسلمي اختي على الطرح المفيد والمميز