زفـــر قبـــر أبـــــوي .........

أسعد الله أوقاتكم بكل خير

وكل عام وأنتم إلى الله أقرب

أتمنى أن تنال هذه الأبيات بعض الإعجاب ... وأوفر الدعاء ,,

طبعاً هذه القصيدة بكل مافيها (( لي )) ... ولكن سرقت من قبل شخص يدعى (( فهد الزهراني )) ولكن اسمه في الحقيقة (( أحمد الزهراني )) وقمت بالإتصال به وقام بحذفها من أكثر من منتدى و هنا أوثقها ولأول مرة ,,,

فهي نزف روح لن أتخلى عنه ..

زفر قبر أبوي وقال وينك تعال آبيك=
أنا لي ثلاث أعوام ميت ولا همك
صرخت وكأن الأرض تهتز يالبيك=
وياليت بي قدرة على القبر وآضمك
يبه والله إني كل ماضاقت أناديك=
وأصوت يبه روحي تمنى تجي يمك
أشاهد وجوه الناس وأبكي على ماضيك=
وأبعثر حروف ن رددوها على فمك
نحرت الخفوق الحي قربان لجل أرضيك=
ولجل آصلك وأروي عروقي على جمك
تداعت لك أعماقي وصرخاتها تبكيك=
وشق الحزن صدري وهو يرتجي لمك
جروحي صوامع من وجع كلها ترثيك=
وترثيك دمعة مامسحها طرف كمك
بك إحساس مايوصف ولا يخلق إلا فيك=
وطهارة حرم مكة خذت من بعض دمك
ياقبر تضمه بك من المسك وآهنيك=
وأسابق زهور الكون وأجري على شمك
فقدتك بكبر الهم ذا حل في واديك=
وكثر الجروح وكثر ماهمني همك
وأنا يايبه من كثر ماأشتاق لك وأغليك=
أحسك تناديني وهو مبتسم فمك
(علي) يايبه بأرحل و لكن لاوصيك=
تجمل بربعك و الله الله في أمك
رحل وإنت ياقلبي تصبر ورى غاليك=
زمن لو ضحك لك لحظة ساعة غمك
وأنا يايبه وشلون بأنسى غرامي فيك=
وأنا لي ثلاث أعوام رجواي في ضمك

وسلامتكم جميع

صح لسانك والله يرحم والدك ويغفرله ويرحم اموات المسلمين

رحم الله والدك وغفر الله وادخله جنته. آمين
وغفر الله لنا ولكم والمسلمين والمسلمات الاحياء منهم والاموات
صح لسانك على هذه القصيده . ومادام وصلت هذا المنتدى فهي في الحفظ والصون

رحم الله والدك ووالدي وغفر الله لهم وادخلهم جنته.
آمين

صح لسانك شاعرنا
وبيض الله وجهك
لا هنت
تقديري لك

ابدعت ياسمي وتجلا الابداع في كل بيت وعزفت
اعذب الالحان على اوتار الاشتياق وصح لسانك
مدد بلا عدد ورحم الله والدك رحمة واسعه