قال ماركة قال

بالبلدي الفصيح
قال ماركة قال
فتحي حلواني

يا الله خلص رمضان اليوم نحنا في (21) من الشهر الفضيل وأسأل الله سبحانه وتعالى أنه يتقبل مننا ومنكم الصيام في أيامه اللي فاتت ويتقبل مننا ومنكم الصيام في الأيام الباقية منه عشان كده يا حبايب لازم نحاول نجتهد قد ما نقدر في الصلاة والقيام والتهجد في العشرة الأيام الأخيرة لأنها أيام فضيلة وعظيمة وأجرها عند الله كبير. ودحين تعالوا نشوف هرجتنا حق اليوم ايش بتقول .... أكيد كلكم فاكرين التلات الشهور اللي فاتت اللي هيه جماد تاني ورجب وشعبان كيف كانت المولات والمراكز التجارية والأسواق كلها عندها تخفيضات توصل لـ 50 في المية و 70 في المية على كل شي يخطر في بالكم من الملبوسات والعطورات وأدوات التجميل سواء كانت حريمي أو رجالي أو ولادي أو بناتي وكل معرض في كل مول أو كل مركز تجاري كاتب لوحة كبيرة بالبنط العريض على باب معرضوو لا تفوتكم التخفيضات عشان كده كانت المولات والمراكز التجارية متروووسة أوادم حريم ورجال وبنات وأولاد وكلهم جوو عشان التخفيضات واللي هيه في الأساس مو صحيحة، هادول كسبانين مليون في الميه ملابس بيستورودها باعتمادات البنوك وبتراب الفلوس والا ايش يخلي التاجر يعلن عن هادي التخفيضات لأنه في الأساس هدا هوه السعر الحقيقي للطقم وقت التخفيضات وإلا إيش اللي يخلي تنوره أو فستان سعرهم 380 قبل التخفيضات توصل لسعر 90 ريال بعد التخفيضات (لا ويقولك ماركة) والشي اللي يفطسك ضحك انه الماركات اللي ما تنباع هناك في بلد المستورد يجيبوها لنا ويبيعوها بأغلى الأسعار لكن لو رحت لبلاد المستورد حتشوف سعر الماركة الجديد ارخص من سعر القديم اللي عندنا شي يحزن هدا اللي بيحصل هادي الأيام في المولات والمراكز التجارية أسعار نار وما في إلا سلخ في عباد الله .. لكن خلي شهر رمضان يخلص وتعال شوف الأسعار بعد كم شهر حتشوف العجب العجاب لأنه الحكاية ما عندك أحد لأنه وزارة التجارة وجمعية حماية المستهلك ومراقبة الأسواق سكتم بكتم لا أرى لا أسمع لا أتكلم وأنت يا ولد الناس ياغلبان كع فلوس الين تتنفض جيوبك طالما ما في أحد يتابع هادي التخفيضات الوهمية.
وعيشوا كتييييير تشوفوا كتيييييير

abofatoo@hotmail.com
فاكس: 6764070

شـكــ وبارك الله فيك ـــرا لك ... لك مني أجمل تحية . موفق بإذن الله ... لك مني أجمل تحية .

على القوة