سحر غريب

قبل كم من يوم وانتي تسمعين=قلت بك سحرٍ ولاني خابره
قلت بك شيٍ جذب قلبٍ حزين=وامتلك روحٍ بريئه طاهره
شيً خافي مثل همسك ما يبين=مثل بسمه في شفاتك حايره
يمكن الخدين او نور الجبين=او سهامٍ من عيونك طايره
والا يمكن وجهك الي له تلين=القلوب القاسيه والقاهره
والا يمكن شعرك الي تنثرين=لا انسدل فوق المتون الجايره
والا يمكن هيبتك وانتي تجين=كنك السلطان هيبه ظاهره
او هي انفاسك وطيبٍ تنشرين=تنتعش منه القلوب العاثره
او هو الحزن الي ابقلبك دفين=يقتل البسمه بروحٍ عاثره
كل هالعالم يجي لك باليدين=دام قلبي عند قلبك يامره
حظك ابقلبك وحظك ترقدين=لا غفت عينك عيوني ساهره
اعرفك كم يوم وكني من سنين=العواصف داخلي لك ثايره
اسمحي لي بس في ها الكلمتين=يا انا مجنون يا انتي ساحره