ديـــــــــــوان شــــاعر الأ نسانية

الأمير الشاعر / عبد الرحمن بن مساعد

عجب عُجاب

طيبة قلبها أبيض سحاب

أخلاقها مامثلها .. أخلاقها

أخلاقها تنتظر عشاقها

ومايجون .. !!

ياهي جريحة .. طيبة .. لكن قبيحة

عجب عُجاب

وسيم أنيق شاب .. كسبه حلال مشروع ماجرّب الجوع

ناجح مركزه مرموق

ورغم هذا الحزن ساكن عيونه

ماتت امه .. وحبيبته كانت تخونه

عجب عُجاب

كثر الفقر ماله

كل ٍ يبي قربه ورضاه

رغباته قوانين وزلاته صواب

الناس حوله من شمال ومن يمين

يأمر .. يطاع

الدول تحسب حسابه

والكل يخشاه ويهابه

لكن مريض ياعذابه

ممنوع ياكل لو أكل جايز يموت

عجب عُجاب

مرتاح الضمير لاسرق .. لاظلم .. لاحسد

عنده قليل أصحاب

قلبه كبير .. بيته صغير

والمرض عن صحته بعيد

عنده ثلاث اطفال

أحمد وإيمان ويزيد .. وامهم

وكثر السماء يحبهم

لكن فقير مالقا لصوته مسامع

مايملك الا طيبته وملح المدامع

ولو مادفع مبلغ حقير

ينطرد هو والعيال وامهم في الشوارع

عجب عُجاب

عبقري في الطب ملحد

عجب عُجاب

شاعر عظيم داخله فارغ

عجب عُجاب

أمير كذاب

عجب عُجاب

ملايين البشر .. تعبد بقر

عجب عُجاب

ماتصلي فرضها .. وتلبس حجاب

ياصاحبي عطني يقينك والظنون

من ودك تكون ؟!

صدّق أو لا تصدّق

كل ما تباعدت المسافة بين الرغيف والجوع

تلقى الفرح أصدق

صدّق أو لا تصدّق

لامن غدت كل المشاكل جوع الصغار وسقفٍ يداريهم قبل يصحى النهار

تلقى الشعور أعمق

صدّق أو لا تصدّق

كل ما انقفل درب انفتحت أبواب

صدّق أو لا تصدّق

لو فيه احد طيّب .. للطيبة أسباب

صدّق أو لا تصدّق

قليل من يعفي ويسامح .. كثير وده ينتقم

بس ينتظرله وقت سانح

صدّق أو لا تصدّق

القناعة كنز يفنى

ولو كل من ياخذ قنع .. وكل من ياكل شبع

كان الفرح غطى شوارعنا

صدّق أو لا تصدّق

كل النهايات البداية .. وأحلى البدايات النهاية

وكلنا رغم القساوة الظاهرة .. نبكي قدّام المراية

صدّق أو لا تصدّق

به مطوّل لحيته .. والثوب يلمس ركبته

وما قرا في الشهر آية

صدّق .. ان الشعر صدقه .. اعذبه

ودي احكيلك حكاية وقبلها ابغى لسؤالي اجوبة

المال هذا هو وسيلة والا غاية ؟!

لو ماهو غاية .. ليه الحروب ؟ .. ليه السلام اللي تمناه الشعوب ؟

ليه الحسد يملى القلوب ؟

وليه الفقير المُعدم الكادح .. بهجته تملى الملاح

لامن لقى ذاك الثري يعطي هاذيك المطربة مليون

وهذا الثري لامن سرى من حفلته .. وقفت سيارته عند الإشارة

وجاه شايب يطلبه .. الهم عاثي في وقاره

دق بـ اصابع مُتعبه .. على الشبّاك

قال : انا يا سدي مديون .. وانت الكريم

يحكون عنك في الجرايد .. وتقال في جودك قصايد

ويُقال انك للأرامل واليتامى عون

ما ابغى منك الا حاجة .. لبس الشتا لجل العيال

الله يسدد لك خطاك .. اعطني مما عطاك

واعتدل راعي الملايين الكثير في جلسته

وعقد حجاجه ثم قال :

ألا ما اثقلك واغباك .. ليه يا اخي ما تشتغل

انت كسول .. ومستغل

وطلّع من المحفظة فكّه .. رماها وقفل الشبّاك

ابغى لسؤالي اجوبة ...

ليه البر والتقوى .. مليان في جرايدنا ؟!

وليه هموم هالشارع ؟! .. بعيده عن قصايدنا ؟!

ليه الفساد .. ليه الكساد ؟!

وليه الحروب ؟! .. وليه الحسد مالي القلوب ؟!

وشهو الجواب ؟!

اتمنى انه مايكون المال هذا هو وسيلة ماهو غاية

هذي الكلمة النبيلة .. اخترعها أغنيا

لجل مسكين ٍ شقى .. يرضى بقليلة

وصدّق انت او لا تصدّق

ماني الشخص المثالي .. كل مافي الأمر اني شاعر ٍ ماهو يبالي

كان صار اللي اقوله علقم ٍ او صار حالي

كل مافي الأمر اني استريح .. لا مشابي مركبي عكس اتجاه الريح

وما ابرّي من الخطى نفسي ..

واللي اجاهربه مثل همسي

صدّق اني ماني الشخص المثالي

كل مافي الأمر اني اجمع احساس الحواري وسط صدري

وانقل الواقع لشعري

كل مافي الامر اني شاعر ٍ مطرود من جنة خيالي

صدّق اني ما قصدت اني اكون

صوت للي مايبون

صدّق اني ماني الشخص المثالي

والا تدري لا تصدّق

فقير وعندي المال الكثير
فقير وملبسي غالي حرير
ويا صاحبي الحافي الفقير
ابنشدك ابسألك وشهو الحصير !!
وابسألك وشلون انا امر وانهي
واذا حكيت قبل انتهي من كلمتي
يقاللي سم ويصير
ولاشكيت من غفلتي طوّل زمنها
يقاللي لاتشتكي .. ماخلقت الشكوى لأمير
وابسألك وشلون انا مع كل ذا .. اقول عن نفسي فقير ؟؟؟
ياصاحبي لاصار للضحكه ثمن
وصاروا اصحابي كثير بس بثمن
والوفاء مابه وفاء الا بثمن
ابسألك ماني فقير ؟؟؟
ولاصارت اقوالي حكم
ولاقالها غيري غدت حكيٍ قديم
ابسألك ماني فقير؟؟
ولاصرت انا مانيب انا
ولاغلطت قالوا صحيح .. وكل شي اعمله يصبح عظيم
ابسألك ياصاحبي ماني فقير؟
وياصاحبي ابنشدك لامن جفتني دنيتي
وابتدأ الدرب الطويل اللى ابد ماينتهي
وانتهي العز القديم وماكنت اظنه ينتهي
والموت بدد فرحتي .. وحطوني في قبر ٍ صغير
وحزنوا علي .. وبكوا هلي وناس من ربعي قليل
وارتاح من وجهي كثير
وبقيت وحدي في حيرتي مابه احد
لا طال عمرك ولا تحت امرك
ماغير انا وخوف ولحد وحساب قدامي عسير
وقتها ذكرت اني من زمان
يوم انه امهلني الزمان
هذا ظلمت .. هذا جرحت .. ياما كذبت
وذنوبي ماتحصي كثير
وقتها الىَ ندمت .. ونفسي كرهت
عرفت ان الله كبير وان الهلاك اصبح اكيد
واني انا مالي رجاء .. ولاهروب من الدجى
من الجحيم الا بأمل عندي وحيد
ان الله غفـّار ورحيم
ابسألك ياصاحبي عني أنا في وقتها
ماني فقير ؟؟؟

فرقة موسيقية
كمنجة بثلاث أوتار .. قيتار .. ثلاث طبّالين
اورق .. ناي .. شاي
فـُرقة موسيقية
يجون .. كل ليلة يجون .. ومع أول الصبح يسرون
لجل ثاني ليلة يجون
هم يعزفون .. وما يعزفون في مكان تسمع فيه الناي قانون
ازعاج .. صجة .. دجة
ايقاع خليجي غالبا ً مقلوب
ايقاع خليجي دائما ً مطلوب
شباب .. بنات ترقص .. والعطر في اول الرقصة حلو ..
وفي آخر الرقصة هبوب
غناء وطرب .. عرض وطلب
واحد يغني .. بدلته تلمع .. يُـفترض فنان
ياليلة دانة لدان
قرقعت كيسان .. دخان .. ما اسعد الشيطان
ضوء خافت .. كل شي حلو والضوء خافت
كل شي كذب والضوء خافت

وفي اطرف الصالة .. هناك اثنين .. واحد يقول :
- " شفت هاذيك الطويلة اللي ترقص " ؟
الثاني - " وين؟ "
- " هاذيك اللي مع حسين "
" واعدتها البارحة وجتني .. مالومها حبتني ..اعطيتها ألفين "
" مسكينة هي .. ماودها تجلس في ملهى .. بس انها تساعد اهلها "
الثاني قال : " كل البنات اللي هنا تساعد اهلها "

غسان .. غسان .. مدير هالصالة
ركض غسان .. وصل فلان .. وصل المهاب .. معاه عشر اشخاص
ركض غسان " اهلين وسهلين ..شو هالحلو..يخزي العين "
الفرقة تنهي الأغنية .. وتعزف بسرعة ..
" حمد لله ع السلامة .. ياجاي من السفر "
أحلى طاولة للمهاب .. طاولة على البست
لفلان اللي من اسبوع كان لابس البشت ..
اليوم على البست

غسان قلقان .. مضت ساعة .. وما نقــّط أحد
نادى " ياجارسون " وحط يده في جيب البنطلون ..
" خذ هالألفين ..على المغني ارميها .. وشاور على فلان "
ادريس قام " فلان ينقــّط وانا لا.. ياللإهانة .. والله لنقــّط "
- " يادريس لا .. هذي فلوس التذكرة .. وشلون نرجع .. السفر بكرة "
ادريس قال " بكره اروح لفلان احلف له ( انسرقت فلوسي .. الاوتيل غالي .. وانا معي عيالي ) وارجع انقــّط "

جارسون هناك يحكي مع زميله
غسان قال " الفواتير ماتنزل الا آخر السهرة "
الحق معه .. بهذا الوقت .. مافيه احد يقرا
جوزيف وين .. اليوم فل .. ودوه للشرطة .. غسان شافه يسرق من النقطة
والكل عارف .. الثلث للفرقة .. والثلث للنمرة .. والثلث للصالة
وكله لغسان

طلعت الشمس .. الساعة ثمان
الكل سكران .. الكل تعبان
ماعدا غسان " قفل الصالة ..الوعد بكرة "

مجلس رجال
على اليسار مقلـّط .. وعلى اليمين صالة
ضيوف جالسين
قهوجي يلم الفناجين
وينطر اخر ضيف منهم يهز فنجاله
ضيف يقبل من بعيد
يقوم صاحب المجلس طلال لستقباله
شخص جالس على اليمين يهمس لجاره :
" هذا احمد اللي جاي بس ماهو لحاله "
" من معه ؟ "
" يبدولي اطفاله "
ويدخل احمد معه ثلاث اطفال
وعند باب الصالة يستقبله طلال
" السلام عليكم "
الكل يوقف
" هلا والله مرحبا عليكم السلام .. حي الله احمد هلا وسهلا .. تفضل .. كيف الحال ؟ "
" هلا طلال ..اعرّفك على عيالي .. ابني صابر عمره ثمان سنين .. لاتستحي سلّم ياصابر
بنتي هالة .. ست سنين .. سلم ياثامر على الجماعة .. وش هذا اللي في يدك ؟؟
اه .. سجايري والولاعة "
عبدالمعين يطالع الساعة .. ويهمس لجاره
" كيف يجيب اطفاله ؟! .. محد منا معه اطفاله .. ليش يجيب اطفاله "
ويجلس احمد ويجلس حوله عياله
طلال يقول :
" ما شاء الله .. ياحليلهم .. الله يحفظهم ويحرسهم ويحميهم
ماشاء الله يا صابر : ايش هالثوب الجديد "
احمد يقول وملىء وجهه ابتسامة
" هذا صابر موهوب في التقليد قوم ياصابر قلّد اصالة
والا تدري وري عمك كيف يركض سامي الجابر "
ينطلق صابر لخارج المجلس .. يرجع معه كورة يشوتها .. تنزل من السقف ثمان لمبات مكسورة
احمد يقول وملىء وجهه ابتسامة
" شاطر ياصابر ... شفت ياطلال شقاوة هالعيال "
طلال يتمتم :
" ياحليلهم .. الله يحفظهم ويحرسهم ويحميهم "
" تعالي ياهالة سمعيهم و وريهم اغنية و رقصة الخيالة
لا تستحي يا بنت مافيه احد غريب هذا عمك طلال وهذا عمك مثيب
وهذا عمك عبدالمعين وهذا ..... لا مؤاخذة انت مين ؟ "
- انا عبدالكريم
" عبدالكريم .. تخيّل يا اخي ماعرفتك لانك يمكن ملتحي .... لاتستحي يابنت لاتستحي ..
تدري طلال " هالة نجحت بامتياز "
صوت مدوي ينفجر
" اه ياثامر ما اشطنك .. كسّرت القزاز "
احمد يقول وملىء وجهه ابتسامة
" شفت ياطلال شقاوة هالعيال "
طلال يتمتم :
" ياحليلهم ..الله يحفظهم ويحرسهم ..... ؟؟؟؟!!!!
" وش كنت اقول ايوا طلال كنت اقول هالة نجحت بامتياز اعطيتها البارح فلوس
وقلت لها ياهالة ايش ما تبغي اشتري "
طلال يقول
" مبروك .. مبروك .. ايش تبغي تصيري لما تكبري "
هالة تتفل على طلال .. وتقول :
" ايش دخل ابوك "
احمد يقول وملىء وجهه ابتسامة
" شفت ياطلال شقاوة هالعيال "
طلال يتمتم :
"ياحليلهم .. الله يحفظهم ..................... ؟؟!!!
" تعال ياثامر .. عد لعمك من واحد الى العشرة "
ثامر يبتدي يعد
" واحد ..اثنين .. ثلاثة .. سبعة "
احمد يقول وملىء وجهه ابتسامة
" دايم يعد .. ولما يوصل اربعة يلخّبط "
يالله ياثامر من جديد
يبدا ثامر من جديد
" واحد .. اثنين .. ثلاثة .. سبعة "
" شاطر يا ثامر شفتوا كيف لخبط "
ينفتح باب المقلّط ويدخل النادل شايل دخون
والصالة في حالة جنون
احمد يصفق .. صابر وثامر يرقصون
طلال يقوم
" العشاء .. تفضلوا ..الله يحيكم "
احمد يقول
" يالله يا اولاد الله يحميكم .. اتعشوا اول .. بعدين سووا اللي تبون "
يركض الاولاد قبل الضيوف .. وللمقلط يدخلون
صابر ياخذ برتقالة .. يرميها على النادل .. تطيح المدخنة والدخون
ثامر هناك .. يكسر بياله .. ويرمي شظاياه على اللي ياكلون
هالة ترمي على طلال صينية ... وتاخذ علبة مياه غازية
تخضها .. تخضها .. تخضها .....
وترقص رقصة الخيالة .. وتفتح العلبة
احمد يقول وملىء وجهه ابتسامة
" ايوه ... هذي رقصة الخيالة "
والضيوف في ثياب من المياه الغازية يرفلون
مجلس رجال
على اليسار مقلط .. وعلى اليمين صالة
كل شي فيها ماهو على حاله
قزاز مكسور .. سجادة محروقة .. غترة مشقوقة
صينية هناك مرمية ...
ضيوف مبللين بمياة غازية
على وجه عبدالمعين جرح قطعي . .ومهلبيّة
نادل مصاب بحروق من الدرجة الاولى .... وجروح سطحية
كورة ... لمبات مكسورة
يضهر احمد من المقلط وملىء وجهه ابتسامة
" اكرمك الله يا طلال..شايف شقاوة هالعيال
اقول طلال .. اشكر ام العيال نورة .. العشاء كان رائع .. ماقصرت مشكورة
عشاكم ياجماعة بعد اسبوع عندي ... لازم تشوفو ولدي الصغير ؟!!
اخر العنقود .. منصور .. عمره ثمان شهور .. شيطاني يعقد ..اظن له معي صورة
شوف يا طلال هالصورة .. لاتغرك نظرته .. ترى والله ذكي مره
ما يضحك ولا يبكي لما يبدا اخوه ثامر يعد "
طلال صامت ما يرد
وترتسم على وجهة احمد علامة استفهام ويتساءل في داخله
" طلال كن وجهه متغير ..اكيد احد من هالضيوف زعله
مسكين طلال .. دايم في حاله مايخلوه .. زين جبت العيال سلوه "
ويخرج احمد من الصالة .. فخور بعياله
تارك وراه مجلس .... كان مجلس رجال
وعلى اليسار بقايا مقلط ... وعلى اليمين شبه صالة

إحترامي .. للحرامي !!
صاحب المجد العصامي ..
صبر مع حنكة وحيطة ..
وابتدا بسرقة بسيطة ..
وبعدها سرقة بسيطة ..
وبعدها تَعدى محيطه ..
وصار في الصف الأمامي .. !
احترامي .. للحرامي .. !!

احترامي .. للحرامي ..
صاحب المجد العصامي ..
صاحب النفس العفيفة ..
صاحب اليد النظيفة ..
جاب هالثروة المخيفة ..
من معاشه في الوظيفة ..
وصار في الصف الأمامي ..
احترامي .. للحرامي .. !!

احترامي .. للحرامي ..
صاحب المجد العصامي..
يولي تطبيق النظام ..
أولوية واهتمام ..
ما يقرب للحرام ..
إلا في جنح الظلام ..
صار في الصف الأمامي
احترامي .. للحرامي .. !!

احترامي .. للحرامي ..
صاحب المجد العصامي ..
يسرق بهمة دؤوبة ..
يكدح ويملي جيوبه ..
يعرق ويرجي المثوبة ..
ما يخاف من العقوبة ..
صار في الصف الأمامي ..
احترامي .. للحرامي .. !!

احترامي .. للحرامي ..
صاحب المجد العصامي ..
صار يحكي في الفضا ..
عن نزاهة ما مضى ..
وكيف آمن بالقضا ..
وغير حقه ما ارتضى ..
صار في الصف الأمامي ..
احترامي .. للحرامي ..
احترامي للنكوص ..
عن قوانين ونصوص ..
احترامي للفساد ..
وأكل أموال العباد ..
والجشع والازدياد ..
والتحول في البلاد ..
من عمومي للخصوص ..
احترامي للصوص .. !!