رائعة لإبراهيم الشيخي

[بنت الأجواد]

غريبه منك تلعبهـا علـى هامـان يافرعـون
بلاش مـن اللعانـه لعبتـك هامـان خابرهـا
توافقتوا على المبدا تخالفتوا علـى المضمـون
وكـلٍ قـام فـي راسـه يكبرهـا يصغرهـا
نقول العيب في الجمره تقول العيب في الغليون
ونبلـش فالقضـيـه ماتدللـنـا محـاورهـا
غريب اطوار لاصاحي يسمونـك ولامجنـون
نصدرهـا تـوردهـا نـوردهـا تصـدرهـا
بلاهامان يافرعون مهما رحـت مالـك عـون
عصا موسى على راسك بحـول الله يكسرهـا
بعد عقدة لسانـه حلهـا ممشـاه مـع هـارون
ياويل ارض الكنانه ويـل كاهنهـا وساحرهـا
يحق الحق والباطل زهـق والمعتـدي ملعـون
وعجل السامري مـع قـوم ينهاهـا ويامرهـا
على غيك مشيت ودون ظلك عصبـةٍ يمشـون
تسيرهـا علـى شـوك الكتـاده ماتخيـرهـا
جزاك البحر تغرق فيه واللي معك ما من لـون
ليـا شافتـك جثـه هامـده هلـت عبايرهـا
تموت ولايغير موت مثلك شـي فـي هالكـون
وتحيا والبشر تخمش يديـك بـروس اظافرهـا
عرفت انك ضعيف ولانت لافارس ولادنـدون
ماغير الكبر غرر بـك مثـل قـومٍ مغررهـا
تحسب اني مثل من جاملوك وعاملـوك بهـون
لا والله ماهقيـت وهقوتـك مانـي مقـدرهـا
انا راسي عليه رعود وبروق ومطـر ومـزون
مطلات النجـوم أسلـب مواقعهـا واطيّرهـا
وانا ماتابع المقفي ولانشـد حالتـه وش لـون
يجي ويروح ماكنـه خِلِـق طوعـا ولاكرهـا
وانا ادري وش عليّ وويش ليّ وماقفي مامـون
ماتخدعنـي مظاهـر قـوم هافيـةٍ مخابرهـا
وانا ماتجاوز حدودي ولاتمـرد علـى القانـون
ومن يخطي عليّ اكحل عيونه كحـل يجهرهـا
ولو ينسف بحر(ايجه) ولو ينشف بحر (سيحون)
تجدني بحر بحارتـه يسـرف فـي بواخرهـا
مالومك يوم تجهلني يابـو راسٍ بـدون عيـون
ليا جاك البكا تيبس دموعـك فـي محاجرهـا
تشوف الخيل تحسب سر طنختها من الافيـون
عسى الافيون يحقل حيـث ماتاطـا حوافرهـا
وبن شداد مات وكان في راسك تحـس قـرون
عليـك الله وامـان الله قـرونـك لاتغبـرهـا