من قصيد الأسطورهـ محمد السديري

[صقر الجنوب]

سلطان شفت الموت


سلطان شفت الموت مـره ومـره
و الثالثه يـا ميـر كشـر بنابـه
مـا بيـه لكنـه بلانـي بشـره
زود على خيلـه يجمـع ركابـه
لو هو ظهر لي في صحاصيح بره
نذر علـي انـي لبيـن صوابـه

---------

حلو نباه وقلبه اسود من الصاج



الله مـن هـم بروحـي سهجهـا
بخافي ضميري في كنين الحشا لاج
احـر مـن نـار توقـد وهجهـا
منها خطر روحي على سلك ديباج
وعين عسى المولى يعجل فرجهـا
يفوح ناظرها كمـا عيـن هـداج
استرسلت للدمع من مـا رهجهـا
غيظ يكظ عبارها مثـل الأمـواج
كم واحد لـه غايـة مـا هرجهـا
يكنها لـو هـو للأدنيـن محتـاج
يخاف من عوجا طـوال عوجهـا
هرجت قفا يركض بها كل هـراج
يقضب عليك المخطيه من حججها
حلو نباه وقلبه اسود مـن الصـاج
الله خلـق دنيـا وسـاع فججهـا
وعن ما يريب القلب لك كم منهاج
والرجل وان شطت لياليك سجهـا
عسـى تواليهـا تبشـر بالافـراج

-----------

لاخاب ظني بالرفيق الموالي


يقول مـن عـدا علـى راس عالـي
رجـم طويـل يدهلـه كـل قرنـاس
فـي راس مرجـوم عسيـر المنالـي
تلعب به الأريـاح مـع كـل نسنـاس
في مهمـه قفـر مـن النـاس خالـي
يشتاق له من حس بالقلب هـو جـاس
قعـدت فـي راسـه وحيـد لحـالـي
براس الطويل ملابقـه تقـل حـراس
متذكـر فـي مرقبـي وش غـدالـي
وصفقت بالكفيـن يـاس علـى يـاس
اخـذت اعــد ايامـهـا والليـالـي
دنيا تقلـب مـا عرفنـا لهـا اقيـاس
كـم فرقـت مابيـن غالـي وغالـي
لو شفت منها ربـح ترجـع للافـلاس
يا ما هفـا بـه مـن رجـال مدالـي
ما كنهم ركبـو علـى قـب الأفـراس
ولا قلطـوهـن للكمـيـن المـوالـي
و لا صار فوق ظهورهن قطف الأنفاس
و لا رددوا صـم الرمـك للتـوالـي
كل يبـي مـن زايـد الفعـل نومـاس
مـن بينهـم سمـر القنـا والسلالـي
مثـل البـروق برايـح ليلـه ادمـاس
يقطعـك دنيـا مالـهـا اول وتـالـي
لو ضحكت للغبـن تقـرع بالاجـراس
المستريـح اللـي مـن العقـل خالـي
ما هـو بلجـات الهواجيـس غطـاس
مـا هـوب مثلـى مشكلاتـه جلالـي
ازريـت اسجلهـن بحبـر وقرطـاس
حملـي ثقيـل وشايـلـه باحتمـالـي
واصبر على مـر الليالـي والاتعـاس
وارسى كمـا ترسـى رواس الجبالـي
ولا يشتكي ضلـع عليـه القـدم داس
يا بجـاد شـب النـار وادن الدلالـي
واحمس لنا يا بجاد مـا يقعـد الـراس
ودقـه بنجـر يـا ظريـف العيالـي
يجذب لنا ربع علـى اكـوار جـلاس
وزلـه إلـى منـه رقـد كـل سالـي
وخلـه يفـوح وقنـن الهيـل بقيـاس
وصبـه ومـده يـا كريـم السبـالـي
يبعد همومـي يـوم اشمـه بالانفـاس
فنجـال يغـدي مـا تصـور ببـالـي
وروابع تضرب بها اخماس واسـداس
لا خـاب ظنـي بالرفيـق المـوالـي
مالـي مشاريـه علـى نايـد النـاس
لعـل قصـر مـا يجيلـه اظـلالـي
ينهـد مـن عالـي مبانيـه للـسـاس
لا صـار مـا هـو مدهـل للرجالـي
و ملجا لمن هو يشكي الظيـم والبـاس
بحسناك يـا منشـى حقـوق الخيالـي
يا خالق اجناس ويـا مفنـي اجنـاس
تجعـل مقـره دارس العهـد بـالـي
صحصاح دو ٍ دارس ما بـه اونـاس
البـوم فـي تالـي هـدامـه يـلالـي
جزاك يا قصر الخنـا وكـر الأدنـاس
متـى تـربـع دارنــا والمفـالـي
وتخضر فياض عقب ما هيـب يبـاس
نشـوف فيهـا الديـدحـان متـوالـي
مثل الرعاف بخصر مدقوق الألعـاس
وينثر علـى البيـدا سـوات الزوالـي
يشرق حماره شرقة الصبـغ بالكـاس
وتكبـر دفـوف معبسـات الشمـالـي
ويبني عليهن الشحـم مثـل الاطعـاس




ارى الليل بساعات النحوس طويل


يقولـه مكظـوم الـفـواد علـيـل
ارى الليل بساعات النحوس طويـل
ينـام مـن لا جـال هـم بخاطـره
وناشيـل مـن ظيـم الهمـوم ثقيـل
اشيل مالا شـال حيـد مـن الصفـا
ولاني علـى شيـل العظيـم هزيـل
إلى صارت النفس العزيزة تسوقنـي
إلـى مرقـب عـال ذراه ظلـيـل
اصبر على ظيـم الليالـي وكودهـا
وناجـي القلـب بالـفـواد علـيـل
علـى أي درب يـا لنديـم تدلنـي
واظنك على عسـر الـدروب دليـل
ونا عارف يا قلب ما راد هاجسـك
ولك خالق مـا هـو عليـك بخيـل
الواحـد اللـي مـا تعـدد فضايلـه
مـده إلـى شـح البخيـل جـزيـل
ولى عشقة ما بين الاضلاع غاطسـه
علـى تبعـد والمسـيـر طـويـل
عشقتهـا والمـوت بينـي وبينـهـا
ابتعـب وراهـا لـو يقـال هبيـل
عهـد المـوده تـم بينـي وبينـهـا
ولا ينفصـم دام البـحـور تسـيـل
ما صاب قيس بحب ليلـى اصابنـي
على واحـد مـا بـي حـذاه بديـل
همـه يداعبنـي بنمـي ويقظـتـي
وارجى متى غصنـه علـي يميـل
خليـل يخايلنـي بعينـه وخايـلـه
مالـه بنفسـي بالعـبـاد عـديـل
اخيله مخايله العـرب بـارق الحيـا
وناله علـى عسـر السنيـن عميـل
ان تم حبـل الوصـل بينـي وبينـه
مـا يلتفـت قلبـي لكـل جمـيـل
هواها يعيفني من النـوم مـا حـلا
متـى نلتقـي بالفرقـديـن نـزيـل
الايا مهات الريـم روفـى بعاشـق
اسرتيـه ولالـه بالعـبـاد خلـيـل
ماله من الفزعه حـذا وجـه خالقـه
وقلـب تحاشـا ان يـقـال ذلـيـل
قلب على الصكات اقسى من الصفـا
لإلى صاب مرعوب الفـواد جفيـل
وعلى البال يطرى لي من الناس نادر
جنسه إلـى ضـاق الزمـان قليـل
ان كبرت القـالات مـارف خافقـه
والـذل مـا يلقـي عليـه سبـيـل
اليا عتت جـرد السنيـن واجذبـت
سحب الحيا واصبـح ثـراه محيـل
كريم ولا يرخى من البخـل حاجبـه
جوده إلـى شـح السحـاب يخيـل
اعنـى فتـى وايـل وذروة سنامهـا
سيـف بحـزات اللـزوم صقـيـل
عبـدالله الفيصـل مـن يلـوذ بـه
لـه فـوق نجـم الفرقديـن مقيـل
احب من يصبـر علـى كـل شـده
إلى شاف من خطب الامـور جليـل
ولا هوب رجاف فـواده مـن العـدا
دخيـل للـى مــا وراه دخـيـل
اخا الجود من يرقى من المجد ما علا
وخـا الـذل يصبـح للذليـل قتيـل
من عـاش بالـذل الطويـل لقيتـه
ردى العـزايـم للجـبـان زمـيـل
قيل الفتى بالعجز مـا يـدرك العـلا
ومرقا المعالـي يـا لعظيـم يهيـل





أنا الوحيد وقومي أكثر من الروم



يا شن بقلبي منه أصبحـت مكظـوم
يعلم به اللي عـن عبـاده غنـاوي
وعيني يا بو ماجد حريب لها النـوم
وكنـه يعالجهـا الطبيـب المـداوي
شوف البغيض بنونها عمس وهـزوم
والقلـب ناشـه بالمعالـيـق لاوي
ونا إلى جاني من النـاس مزحـوم
احـل عنـه الكايـدات الـدعـاوي
ارخص له النفس العزيزه بلا سـوم
ونا على فعـل الجمايـل رهـاوي
وعديت من جور العنا راس مزمـوم
في راس مرقاب جديـد المطـاوي
رجم طويـل نايـف كـل مرجـوم
مهايـف راسـه عسيـر المهـاوي
وهيضت من وسط الحشا كل مكتوم
زفرات ما يقوى لهـن كـل قـاوي
وانا بعون الله ولـو كنـت مظلـوم
لكسب المعالـي بالشدايـد مهـاوي
ارومها لو دونهـا حـرب وسهـوم
ويا مـا حوينـا بالشدايـد محـاوي
عساك يللي تنقـل الكبـر والـزوم
من المرض تصلي بحـر المكـاوي
انا الوحيد وقومي أكثر مـن الـروم
وفي لمـة العربـان كنـي خـلاوي
وحتى صديقي صار من حسبة القوم
وضاعت عزوم مكثريـن العـزاوي
طير بحـزات الهـدد يلحقـه لـوم
اللي قنص به ضايع الفكـر غـاوي
خسران والخسران من ينقـل البـوم
يبشـر بخيبـات الرجـا والبـلاوي
الناس في دنياك معطـي ومحـروم
وكلا ً على طيب المعانـي شفـاوي
الطيب لا هل الطيب والرزق مقسوم
وطير السعد طير تعـدى الحـراوي
طيـر نقلتـه طالنـي منـه مثلـوم
وبعض الطيـور يضيعـن الهقـاوي
انا احسبنه صاطي القلـب ملحـوم
وثره عن الصيدات مثـل العمـاوي
من المذلـه بـارد الوجـه ماسـوم
وقلبه علـى درب الرذيلـه نحـاوي
هقيت به لاشك انا صـرت منجـوم
وتوي دريت اني عن الدرب غـاوي
من خلق في دنيـاه بالفعـل مذمـوم
على الردا بالحيـل مشيـه نحـاوي
الله لا يسقيـك يـالـواد ابــو دوم
وعساك صحصاح بك الذيب عـاوي
خمسين عام ما يقولـون مـا سـوم
يصحى سماك وكل ما فيـك خـاوي
يجيك ما جا قوم صالح مـن الشـوم
والبـوم باركانـك يجـر الحـداوي
يا لله يا معبود يا فـارض الصـوم
تقبل دعات اللي بجـودك رجـاوي
موحد ٍ يطلبـك فـي ثانـي التـوم
يرجى العفو وارضاك وامرك سماوي
من خلقت الدنيا الـى يومنـا اليـوم
صبح يفوت وليـل يقفـاه ضـاوي
والناس تفني بين مذنـب ومرحـوم
وهنيت من له عنـد ربـه عـراوي






سيل حدر مع وادي ٍ غير وادية


شي بقلبـي يـا مـلا حايـر ٍ فيـه
شي تحيـرا بـه العقـول الفهامـي
مخفيـه بفـوادي ولا ودي ابـديـه
وادور الخيـرات شـرق وشـامـي
احترت به ما شفـت شـي يحاليـه
واليوم ابا انشد عنه ما نيـب كامـي
سيل حدر مـع وادي غيـر واديـه
مـدري حـلال مـاه والا حرامـي
كانه حلال و جأيز شـرب صافيـه
وش حلله يـا مفسريـن الاحلامـي
هاتـوا تفاصيلـه وهاتـوا معانـيـه
نبي الدليـل اللـي عليـه الكلامـي
نبـي دليـل يفهـم الـدرب ماشيـه
يمشـي بـه التايـه بليـل ظلامـي
يمشي بـه التايـه ويقـدي مواطيـه
ويشرب قراح الما ليا صار ضامـي
لاشك هاجسى يـوم خـلا مماشيـه
انـه حـرام ومنـه زود الاثـامـي
احرم مـن الزقـوم مـره وحاليـه
وشربه على الضامي يزيـد الهيامـي
الله مـن قلـب همـومـه تقـزيـه
تـدك بـه مثـل الجـراد التهامـي
من ما جرى قامـت تتلـه مشاحيـه
تل الرشا من فـوق هـدف المقامـي
روابـع قامـت تصيبـه وتخطـيـه
شاف الهوايـل واختـلاف الاسامـي
ما يسمع الداعـي ليـا قـام يدعيـه
يعوم في بحـر مـن الهـم طامـي
مـا ينتبـه للـي بصوتـه ينـاديـه
يزيـد همـه يـوم كــل ينـامـي
يشـوف وقـت مـا عرفنـا تواليـه
وقت يشيـب مـن بسـن الفطامـي
هـذا زمـان كـاثـرات بـلاويـه
الغيـم يقلـب فيـه عـج وكتامـي
يا بعد شرب الما على كبـد راجيـه
ما سيل الغبـرا زعـوج الجهامـي
انبيك يا من كلمـة الحـق ترضيـه
اعطيك مـا ينفعـك وافهـم مرامـي
قصـر يذلـك لا تقـابـل مبانـيـه
خله عسى شامـخ طويلـه هدامـي
خله عسى ما صاب اغاديـر يفنيـه
يـودع منازلـه الطويلـه رجامـي
لـوزان مدخالـه وطالـت حواميـه
شيد علـى الخيبـه قليـل الرحامـي
وحـي يوريـك المـذلـه وتغلـيـه
انا اشهد انـك ميـت القلـب عامـي
مـن لا يـودك لا تـوده وترجـيـه
ارفع مقامـك يـا عزيـز المقامـي
ارفع مقامك عـن عـدوك وتوذيـه
ويلحقك من تركـت رفيقـك ملامـي
حـق الرفيـق و واجبـه لا تخليـه
يلزمـك مثـل الوالديـن الحشامـي
اختر عزيز الجـار والحـق يعطيـه
شبل علـى هـرج يقولـه يحامـي
مادك بـه عـرق المذلـه وطاريـه
ويسبق على فعل الفضيلـه شمامـي
ومن مرقاب الاجرب بالامراض يعديه
عـداوه تسطـي باللحـم والعظامـي
درب السلامـه بيـنـات مماشـيـه
ودرب العطب يرث عليـك اللكامـي
ابعـد وقلبـك نـازح البعـد يشفيـه
وتلقى عن الـدار البغيضـه مقامـي
دار بدار و داعـي الـذل عاصيـه
ولا تقبـل الذلـه نفـوس الكرامـي
الـذل مـوت حأيمـات ضوامـيـه
ادخل على منزل فروض الصيامـي
عن مقعـد بالـذل عينـك تراعيـه
الموت عنـد الـذل امـان وسلامـي
يرضى المذله مـن تـردت هقاويـه
والذل يجفـل منـه قلـب العصامـي
والعبد له رب عـن النـاس يغنيـه
ولولاه ما صاب الهدف كـل رامـي






عين تروم العز



ارى الوقت من بعد الوضوح ظلام
ولا عـاد بـه للغانميـن مـقـام
توارت بدوره من غياهيب ظلمـه
وغشاه من بعد الوضـوح ظـلام
الا يا زمان الغدر لا عـاد يومـك
وعلى الدهر الاول كل يوم سـلام
عليك منـي كـل مـاذر شـارق
سواد على روس الهضـاب يقـام
نجزاك بالسودا على واضح النقـا
ولا عاد لي بك يـا زمـان مـرام
بالوقت هذا شفت ما يبحث الخفـا
ضعاف المعاني صوروها جسـام
اشوف فيه البـوم يدمـي مخالبـه
والحـر بيـن الطايـرات يضـام
والنمر مجلد والحصانـي تهومـه
اصابه من شـوف الهـوان هيـام
يشـوف بالعيـن العزيـزه مذلـه
ولا طاب لعيـون العزيـز منـام
عين تروم العز ما تالـف الكـرى
حـرام عليهـا ان تنـام حــرام
نصبر على هذى وهـذى ومثلهـا
وافراجهـا عنـد الكريـم شمـام
يا مدورين الطيب ما هوب بالمنـا
الطيـب عنـد الغانميـن اقسـام
اقوله على مـن هيجتنـي مثايلـه
وحطـت علـى الهينـات عظـام
فتا ً ما بلغ بالعمر عشرين حجـه
وصعد لنجـم الحاجزيـن وحـام
مشابين صفات الجموع وصفقـت
لـه القلـوب الساميـات غــرام
ونا على مـا راد والـم وحاضـر
ومالـي ونفسـي باللـزوم عـدام
خذ العهد من رجل إلى قال ما كذب
وده يمـوت ولا يجـيـه مــلام
يرى الموت بالعز الرفيـع سعـاده
وبالذل مـا يرضـا الحيـاة دوام
الذل يرضى به من الناس خامـل
والحر عـاف الخامـلات وشـام
يشـوم مـن دار لـدار يرومهـا
وعساك يـا دار البغيـض هـدام
على من بحث سدى وهيج صبابتي
سـلام عـدد وبـل ذراه غـمـام





الحر يجزع يوم توطا حدوده


مرقا العلا خطر ٍ عسيـر صعـوده
ما يطلعه من لا تجلد علـى الكـود
والبيـت مـا يبنـي بليـا عمـوده
والحيف يزعل من عن الحق مردود
والحر يجزع يـوم توطـا حـدوده
وتشرهه نفسه على الطيب والـزود
ولا يشتكي مـن لا تضـره لهـوده
ان شاف جور الحيف والعدل مفقـود
والوقت شفنا كـل بيضـه وسـوده
وشفنا نهاره مـع لياليـه مضهـود
والغيم لو تسمع صواعـق رعـوده
لا ممطر وبـل ولا هـوب مريـود
يا مدورين الطيـب قيسـو عـدوده
والطيب عد ٍ بين الاجـواد مـارود
والناس بارض الله تراهـم شهـوده
وحق بلا فعل ٍ على الرجل مجحـود
والنذل حيلات الـردي مـا تكـوده
واليا بغا الطولات ما يدرك الجـود
على المراجـل قاصـرات زنـوده
طير العشا يصبر على كـل منقـود
الخيل ما تشكي مضاريـب عـوده
وبالقيض ما ركب النضا مثل صاهود
يعيـش فـي دنيـاه همـه رقـوده
ولا نفضنـه قـرح الخيـل والقـود
لا عل رحمـة خالقـه مـا تعـوده
وعساه من زمرة هل النـار بخلـود
هـذا زمـان هايـبـات فـهـوده
والناس نادو عنتره باسـم مسعـود
و اشوف لي رجـل يعـدد جـدوده
لو ان ابوه وجده اضعف من الـدود
كلت من الماطـا رواسـي حيـوده
والبوم شـاش ولابـس درع داوود
والنيص حط لهامه الـراس خـوده
عقب المذله لـه طوابيـر وجنـود
ما كـن شـي فـي زمانـه يكـوده
شاهد بها الدنيـا سلامـات وركـود
وحتى الغراب اليوم يفخـر بجـوده
والفار بذراعـه قطـع كـل بالـود
والشري والحرمـل تباهـت وروده
وقامت تشيل غصونه الماس وعقـود
يا حسين زانت لـه ليالـي سعـوده
وصدق حياة بزايد الوبـل ورعـود




اخترت بعد الدار عن قرب الأنجاس



قالو وحيد وقلت ما عنـدي اونـاس
وقالو غريب وقلت بـارض بعيـده
ابعدت مابي شوف ناس من النـاس
بعدت عن بعـض المـلا وتعديـده
مطاوع قلبي علـى كـل الأجنـاس
والبعد عن شـوف المكـاره يفيـده
اخترت بعد الدار عن قرب الانجاس
عن دارهـم نلقـى ديـار جديـده
في وسط نجد اتبع هوا كل نسنـاس
واطرب لشوف اطيورها وتغريـده
اعشق ليالي نجد لو انهـا ادمـاس
و ايامهـا عنـدي جنـان سعيـده
شمي لعشب رياضها يقعـد الـراس
وما فات من ساعات عمري بعيـده
شوف الزهر يبعد عنا كل هوجـاس
ويريح عن قلب الشقـا مـا يكيـده
وحس الرعد في رايح المزن رجاس
دقات عـود عنـد سمعـي فريـده
وان قال لي بعض المخاليق لا باس
قلت الهضايـم بالضمايـر مجيـده
الله من هـم بالاضـلاع غطـاس
اقام وسط القلـب وابطـى شديـده
فكرت بالدنيـا بتقديـر واحسـاس
ولاجت لي الدنيا على مـا نريـده
اللي نبي تقطعـت عنـه الارمـاس
وعنه اختفت كـل العلـوم الوكيـده
القلب يبغض كـل غـادر وبـلاس
اللـي يلطـخ دم الاجـواد بـيـده
واحب من يتعب على كل نومـاس
ومن فيض جوده ما يمـد الزهيـده
اللي ليا كـادت والاريـاق يبـاس
يصبر على كود الامـور الشديـده
وللنفس عن طرق المثاليـم حبـاس
يتعب على كـل العلـوم الحميـده
واحب نجد وكل حبي علـى سـاس
حب بقلبـي لـه قصـور مشيـده
عندي وعرها مع سهلها والاطعاس
غابات ورد ٍ في زهـور ٍ نضيـده
برياضها محلا هـدد كـل قرنـاس
ان شاف حفان الحبـاري يصيـده
عدل المناكب لا برق الريش دواس
ما ناش في مخـلاب كفـه يجيـده
يا حلو هداته على الجـول غـلاس
ينحـر كثيـره ويتعـدى الفريـده
اجرد عديم لهايش الخـرب فـراس
والطايره لـو ترتفـع مـا تكيـده
أيام عجـات الهـدد كلهـا اونـاس
يـا حلـو بالخـد البيـاح تهديـده





اقفوا عن الدنيا هل الخيل والقود


قلت آه من صبر ٍ صبرته على الكود
ومن ونة ٍ للقلـب جاحـت وقـدت
ونة عتب ونة غضب مالها حـدود
يا ليتها عن مغلق الصـدر صـدت
لو هي بحيد ٍ ذوبـت كـل جلمـود
على الضمايـر بالهضايـم تحـدت
قامت تعرض لي بالايـام والسـود
ان قلت قفـت عـودت لـي وردت
ان قلت هانت بالحشا جابت الـزود
وجاحت خفايا ضامري واستجـدت
وزادت جروح القلب بجروح ولهود
ودنياي مالت عـن سنعهـا ولـدت
والعين كـن بنونهـا ملـح بـارود
على السهـر كـل الليالـي تحـدت
تسهر وبعض الناس هجاع ورقـود
وهي تبـي فرقـاه مـا فيـه لـدت
ونشدت يا تركي عن اللي بهم جـود
وقالوا ضعون اهل المروات مـدت
العدل من شد ومـع النـاس مفقـود
وبفعالهـم عمسيـن الاريـا تقـدت
منزالهم خال ٍ تصافـق بـه النـود
من يوم عنه اسلاف الاجواد شـدت
اقفوا عن الدنيا هل الخيـل والقـود
اللي فضايلهم علـى النـاس بـدت
هل الفعـول ولبسهـم صنـع داوود
وهل المهار اللي على الضد كـدت
عصمان الاريا مشرعة كل مجـرود
ليت الليالي السـود عنهـم تعـدت
النـاس بالايـام طـارد ومطـرود
يـا ليتهـا باهـل المـروه تحـدت
وطير الفلاح اللي عن الصيد مردود
عقبـه تبـوع علمـت واستهـدت
اشوف ناس عندها الحقد مـا جـود
ونفوسهم عـن كـل عليـا تـردت
العدل في ساحاتهـم صـار مفقـود
وعن الفضيلـه جنبـت واستـردت
ما يرفعون النفس عن كـل منقـود
ان ما تعشت عرضهـا لـه تعـدت
تعطي عن العليا محاريف وصـدود
ووجيههم مـا قيـل بالجـود نـدت







ولا يغرك بالرخم كبر الأزوال




دنياك يا مخلوق يظهر بها أشكـال
توريك صفحات وتكشف لك الغيـب
تخفي عنك حال وتبدي لك احـوال
تكدر مشاريب وتصفـي مشاريـب
يهفا بها جيل وتخلـق بهـا اجيـال
ولو اضحكت تبكي وفيها عذاريـب
للمفتهـم فيهـا جديـدات واسمـال
بيـض لياليهـا وسـود غرابيـب
وفيها نهار واضح يشعـل اشعـال
وفيها نهـار مظلـم بـه لواهيـب
احد ٍ تدعذع له على روس الاقـذال
واحد ٍِ يعيش من الوزا عيشة الذيب
دنياك تجري بين الاقفـا والاقبـال
واليا اوجهت غارات خيل مهاذيـب
يا لادمي ما طاوعـت كـل عـذال
كم ليعت بالبوق من يفعـل الطيـب
دنيـا يبيـد حيلهـا كـل محتـال
تدور بك دورات عجـل الدواليـب
باقفيها تعـرض ولا ترحـم الحـال
وباقبالهـا تمـلا كبـار المحاليـب
انبيك يا من سلت عن بعض الاحوال
انشد وانا لك حاضر الفكر ومجيـب
ان كان تبي الرشد يا طيـب الفـال
ازبن على رزاق عكف المخاليـب
ازبن على اللي في يده علم الاجـال
علام ما بالكـون مـذر المعاطيـب
الواحـد اللـي للصعيبـات حـلال
منقذ مداريـك ومبـري مصاويـب
اخلص لعـلام السرايـر بالافعـال
وناجه اليا صكت عليـك اللواليـب
ادعه يفرج لك ليـا صكـك الجـال
حلال عسرات الامور المصاعيـب
اللي دعاه أيوب من ضيم الاهـوال
وانجاه من حال ٍ تزايد بها الشيـب
الناس في دنياك كـل لـه اعمـال
اتبع طريق العدل وابعد عن العيـب
درب النقا بين ولـك فيـه مدخـال
ومن باق ماله عند ربـه مقاضيـب
واليا رضا حلال عسـرات الاقفـال
لا تلتفت للخلق لو هـم مغاضيـب
لا تلتفـت للخلـق راحـل ونـزال
مالـك علـى ذريـه آدم مطاليـب
ورفيقك المامون حطه علـى البـال
واذره اليا جـن الليالـي شلاهيـب
اجعل بقلبـك لـه محـل ومدهـال
تلقاه ذخـر بمعضـلات المواجيـب
عديل روحك لا تـدور بـه ابـدال
عونك ليا صكوا عليـك المغاليـب
ما هوب من شيل العظايـم بمـلال
يصبر كما تصبر على شيلها النيـب
مفراص ماص للصعيبـات حـلال
صميل قيض وماضيا ً له تجاريـب
واحذر ترى بالناس مبغض وختـال
ماله مراجل كود شـذب العراقيـب
عن مذهبه خلك على راس ما طال
وخله على فالـه يشـم المغاريـب
البوم يسكن بالخرايـب والاطـلال
والحر مسكانـه بـروس المراقيـب
طير السعد من كفـه الـدم شـلال
بالمخلب الساطي عطيب المضاريب
ولا يغـرك بالرخـم كبـر الازوال
وكبر النسور المهدفـات المحاديـب





الهواجيس



قالوا من الحكمـة لـزوم ٍ تصانـع
حتى تكفى شر ناس ٍ مـن النـاس
وانـا يناجينـي عـن الـذل مانـع
وعييت لا أرضي تطمينـة الـراس
يرضي المصانع من على الذل خانع
وعلى دروب الذل يلقا لـه أجنـاس
الـذل يـوذي لا بسـات المقـانـع
وشلون يرضونه رجال ٍ لهم ساس!!
يا بو عبيد الوقت مـا هـو مسانـع
وعيني يذاودها عن النـوم حـراس
وفكري بغبـات الهواجيـس دانـع
وان فات هوجاس ٍ دخل فيه هوجاس







أرواحنا بأفلاك الأيام تومي !!!



ينام من هو ما يعـرف الهمومـي
وعيني إلى نامو حريب لها النـوم
الله يلـوم اللـي لحالـي يلومـي
لا ساهر ٍ سهري ولا هوب مهموم
ما هوب مثلي يزعجه كل يومـي
هم يلوج بداخـل الصـدر مكتـوم
لا مبديـا اسـرار قلبـي لقومـي
واللي بسر الغيب ما هوب مفهـوم
أخاف ابوح السر تبـدا الثلومـي
وتاقف على مكنون سرى هل اللوم
عاهدت قلبي ما يبـوح العلومـي
ولا يويـق بغايتـه كـل مذمـوم
بالليل اساهر ساريـات النجومـي
والصبح اعدى بالنبا كـل مزمـوم
اوجس بقلبي مثل حـر السمومـي
ولا صفالي خاين الدهر لـو يـوم
يا سيف قم لعـل حظـك يقومـي
ولعل ابوك بساعة الحشر مرحـوم
النار شبـه يـا قـوي العزومـي
وهات الدلال وترك النوم لرخـوم
خابرك يا لطيب ودود ورحومـي
قم سو ما يبعد عنـا كـل شغـوم
فنجال بن ما يحضـره رخومـي
مبهر من بيـن الأجـواد مقسـوم
أرواحنـا بافـلاك ألايـام تومـي
ولو يطول العمر فالاجـل محتـوم
روحي بيد فارض صلاتي وصومي
اللي بحبل اليسر ينجي المضيـوم
الواحد اللـي نطلبـه كـل يومـي
منجي ليوسف عقب ما هو مظلـوم
دنيا الشقا يا سيف ما هي تدومـي
كم واحد فيهـا مشيـح ومنجـوم
وافرح الى قالـو تقافـت غيومـي
على شفا الباطن وهو قبل ما سوم
حيثه مرب لكل وضحـا ردومـي
اللي بها زود على الطوق برشـوم
عسى تعله مرهشـات الوسومـي
يمطر عليها الوبل يوم بعـد يـوم
عشبه يغطـي نايفـات الحزومـي
فيه الزهر فوق الزماليق منضـوم
مخالـف النـوار غـاد سهومـي
والعشب من وبل المراهيش كيهوم
فيه أم سالم مـن طربهـا تعومـي
تلفح بسمح الريش في كل مرجـوم
من الطرب في كل روض تحومي
وتقضي الدنيا زغاريـت وسجـوم
ان شافت النـوار نبتـه يزومـي
ما سايلت عن حال معطا ومحروم





حورية


حوريـة كـن المهـا مرضعتهـا
وكنه يجريهـن عليهـا قرابـات
كن الغـزال ام الغزيـل غذتهـا
العفو مالي من خطرها سلامـات
ان سلهمـت بعيونهـا واطرقتهـا
منهن سهوم الموت للقلب عجلات
يمناي بالكف الشمـال اصفقتهـا
واحسرتي ضيعت روحي وحاجات
نفس مخاليـب الفـراق خطفتهـا
تاهت بها مابين الاحيا والامـوات



يم نجد



طارشي يم نجـد هـي واهاليهـا
ردنـي سـلام عاطـر حـالـي
من حـرار تكافـخ يـم داعيهـا
في فلسطين تبغى صيدها جزالـي
شوفة ديارنـا مـا عـاد نبغيهـا
لين نشرب من الماء كدر وزلالي
والمحـارم نخليـهـا لواليـهـا
سامك العرش ربي يعلم الحالـي
يا عمار بسـوق المـوت نهديهـا
لـو ثمنهـا علينـا كايـد غالـي
إن رجعنـا بعـز نهتنـي فيهـا
وإن هفينا نفـوز بجنـة العالـي
نكحل العين من عج سمـك فيهـا
يوم ضرب المدافع تقـل زلزالـي
والحرايب إلـى شبـت نصاليهـا
والمراجل كسبها طيـب الغالـي
بنت ياللي تخطى فـي تمديرهـا
الحذر لا يغرك بعض الازوالـي
لا تغـرك علومـه يـوم يبديهـا
مثل بعض التنك يبرق على الخالي
تـارك واجبـه والنفـس يغليهـا
قاعد عقب ربعه يجمـع المالـي

[علي السبيَه]

شكرا لك ياابواحمد على اتحافنا بهذه الروائع
للشاعر الاسطوره والاعملاق محمد السديري