أرجووووك الموضوع لا يجلس بإيميلك

[صقر الجنوب]

أرجووووك الموضوع لا يجلس بإيميلك



السلام عليكم ورحمة الله وبركاته

الى كل من يرتاد جسر الملك فهد ..

اليكم ماحدث لي اليوم السبت 11/8/2007للميلاد قررت الذهاب انا واهلي الى البحرين وفعلاً ركبنا السياره وتوجهنا الى الجسر ودخلنا الحدود البحرينيه وتم الاجراءات على مايرام ووصلنا الى اخر بوابة للدخول الى مملكة البحرين الشقيقه وهي بوابة (تأمين المركبات) ..هناك يوجد نوعين من التأمين ..

تأمين شامل لايتعدى دينار ونصف اي 15 ريال سعودي
تأمين شامل ويشمل قسط الطريق قيمته دينارين اي 20 ريال سعودي

طبعاً الانسان لايضمن نفسه ولاسيارته في هذا الجو المميت من الحراره بالفعل اخذت الشامل مع الطريق لو تعطلت السياره تأتين شركة التأمين مشكوره وتحمل السياره الى اي مكان تريدها لو تريد ارجاعها الى السعوديه ..

وبعد نقول لهم مشكورين وماقصرتوا ياشركة التأمين الله يعطيكم القوه هذا اذا كان الكلام صحيح
عند دخولي البحرين سبحان الله تعطلت السياره هذا كله الساعه الواحده وعشرين دقيقه ظهراًالى الان الوضع عادي قلت للاهل ماعليكم الحين التأمين يجون ومعاهم سيارة تصلح سيارتنا والا يسحبونها الى اي مكان تبيه ان شاء الله الصراحه حطيت الامل فيهم بقووه ..

بالفعل اتصلت عليهم الساعه الواحده والربع ظهراً اوووه يدق التلفون والله فرحت يرد عليك الرد الالي شركة التامين مادري ايش انتظر ويحول اتوماتك على اي موظف في الشركه ردت علي بنت وقالت لي معاك شركة التأمين قلت سيارتي تعطلت قالت لي سيارتك سعوديه قلت نعم سعوديه وصارت تسئلني وش لونها وش رقمها كم موديلها ورقم تلفونك وين السياره واقفه وانا اقول لهاا الله يرحم والديك ارسلي اي حد ترى الحين ظهر وحر واهلي معاي ماقصرت قالت زين اخوي 10 دقايق وهم عندك صبرنا 20 دقيقه مااحد جاء اتصلت مره ثانيه ردت علي نفسهاا قلت لهاا وين اللي بيجي قالت ليه مااحد جاء لك (بكل برود اعصاب) ..

اقولها يابنت الناس حر موووت خلي اي حد يجي بسرعه قالت لي اصبر بشبك مع اللي بيجي لك وكلمني واحد اعتقد بحريني وصفت له المكان يعني المكان ياناااااس مايبي له اي وصف على الجسر (حتى اللي مايدل البحرين بيمر على الجسر بيشوف السياره واقفه ) بس الظاهر انهم يستهبلون على الناس انتظرنا اكثر من ساعه بعد ماجاء حد
(وين خدمة الطريق ياشركة التأمين)

والا بس همكم الوحيد ادفع نؤمن لك سيارتك داخل البحرين ؟

اتصلت مره ثالثه رد علي رجال قلت له يااخي انتو شركة تأمين والاشركه تعذيب؟
قال انت اللي سيارتك سعوديه على الجسر (بكل برود اعصاب) ايه وش عليه جالس بمكيف في الشركه وانا واهلي اللي ماكلينهاا في الشارع قلت له اكيد انا مافيه سيارت ثانيه واقفه غيري قال ليه مااحد جاء عندك قلت لا ياخووك وش سالفتكم اليوم ؟

قال لحظه بشبك مع اللي بيجيك الحين واشبك من جديد لا ويطلع لي هندي مايعرف شكله لاعربي ولاانجليزي ورطوني معاه اقوله وينك يقول قريب منك (انا ادفع رسوم الدخول) يعني مسافة الرسوم وسيارتي لاتتعدى(20 متر) والله العظيم انتظرت اكثر من ساعه ولاجاء اي حد.

بعد وجات لي الشرطه
(قال لي عسى ماشر قلت له الحين اكثر من ساعتين واقف هنا انتظر التأمين يجون لي )
اقسم بالله العظيم ورب الكعبه انه رد علي بلسانه وهو يبتسم (ولاراح يجون لك ) ..

قلت له انا اتصلت على اهلي في الخبر بيجون لي الحين قال خير ماسويت الحمدلله اني اتصلت على احد من اهلي بعد لن تعبنا من الحر الشديد والله نمنا من الحر في السياره بعد الساعه 4 العصر وصل (خالي ) الى مكان وقوف السياره يعني الحين خالي شافنا بسرعه وشركة التأمين مايشوفون ؟
سيارة خالي من نوع لاندكروزر جيب وربطنا واير وسحبنا السياره بأنفسنا الى داخل البحرين

اوجه سؤال الى مدير التأمين والى جميع مسؤلي التأمين ؟
هل ماحصل اليوم لي ولااهلي شي عادي في نظركم وهل هو يحصل لجميع من تتوقف سيارتهم؟

اخواني واخواتي ..
ماهو رد فعلكم تجاه هذه الشركه التي اخذت فقط اسم تأمين وليس لها من التأمين حتى سلامة الاخرين يعني تعطلت سيارتك موت انت واهلك والا اتصل على احد من اهلك يجي لك وينقذك من حرارة الشمس والطريق..

في اخر قصتي المحزنه لي شخصياً..
احذر جميع من يذهب الى البحرين بعدم التعامل مع الشركه المذكوره ابداً ولكن للاسف لاتوجد الا هذه الشركه على جسر الملك فهد والتأمين اجباري يعني غصباً عليك ادفع والا ارجع للسعوديه واذا تعطلت اتصل على اهلك يجون لك ياخذونك .

والمصيبه الكبرى الى اليوم مااتصلوا ولاسئلو وش صار لك يامحمد في الطريق؟
قمة السخريه والانحطاط من هذه الشركه

محمد الفهيد (البتار بن زايد)
اليوم السبت 11/8/2007للميلاد

[أبـو مشاري]

وهو يطلع بيسارة تعيسه للبحرين علشان تخترب عليه

الله يهديه بس

وشركات التأمين اقصد النصب في كل مكان

حسبي الله عليهم