ديـــــــــــوان شــــاعر الأ نسانية

[السحاب البعيد]

http://www.bin-msaad.com/images/live_7.jpghttp://www.bin-msaad.com/images/live_8.jpghttp://www.bin-msaad.com/images/main020038.jpg
الأمير الشاعر / عبد الرحمن بن مساعد

عجب عُجاب
طيبة قلبها أبيض سحاب
أخلاقها مامثلها .. أخلاقها
أخلاقها تنتظر عشاقها
ومايجون .. !!
ياهي جريحة .. طيبة .. لكن قبيحة

عجب عُجاب
وسيم أنيق شاب .. كسبه حلال مشروع ماجرّب الجوع
ناجح مركزه مرموق
ورغم هذا الحزن ساكن عيونه
ماتت امه .. وحبيبته كانت تخونه

عجب عُجاب
كثر الفقر ماله
كل ٍ يبي قربه ورضاه
رغباته قوانين وزلاته صواب
الناس حوله من شمال ومن يمين
يأمر .. يطاع
الدول تحسب حسابه
والكل يخشاه ويهابه
لكن مريض ياعذابه
ممنوع ياكل لو أكل جايز يموت

عجب عُجاب
مرتاح الضمير لاسرق .. لاظلم .. لاحسد
عنده قليل أصحاب
قلبه كبير .. بيته صغير
والمرض عن صحته بعيد
عنده ثلاث اطفال
أحمد وإيمان ويزيد .. وامهم
وكثر السماء يحبهم
لكن فقير مالقا لصوته مسامع
مايملك الا طيبته وملح المدامع
ولو مادفع مبلغ حقير
ينطرد هو والعيال وامهم في الشوارع

عجب عُجاب
عبقري في الطب ملحد

عجب عُجاب
شاعر عظيم داخله فارغ

عجب عُجاب
أمير كذاب

عجب عُجاب
ملايين البشر .. تعبد بقر

عجب عُجاب
ماتصلي فرضها .. وتلبس حجاب

ياصاحبي عطني يقينك والظنون
من ودك تكون ؟!

[السحاب البعيد]

صدّق أو لا تصدّق
كل ما تباعدت المسافة بين الرغيف والجوع
تلقى الفرح أصدق

صدّق أو لا تصدّق
لامن غدت كل المشاكل جوع الصغار وسقفٍ يداريهم قبل يصحى النهار
تلقى الشعور أعمق

صدّق أو لا تصدّق
كل ما انقفل درب انفتحت أبواب

صدّق أو لا تصدّق
لو فيه احد طيّب .. للطيبة أسباب

صدّق أو لا تصدّق
قليل من يعفي ويسامح .. كثير وده ينتقم
بس ينتظرله وقت سانح

صدّق أو لا تصدّق
القناعة كنز يفنى
ولو كل من ياخذ قنع .. وكل من ياكل شبع
كان الفرح غطى شوارعنا

صدّق أو لا تصدّق
كل النهايات البداية .. وأحلى البدايات النهاية
وكلنا رغم القساوة الظاهرة .. نبكي قدّام المراية

صدّق أو لا تصدّق
به مطوّل لحيته .. والثوب يلمس ركبته
وما قرا في الشهر آية

صدّق .. ان الشعر صدقه .. اعذبه
ودي احكيلك حكاية وقبلها ابغى لسؤالي اجوبة
المال هذا هو وسيلة والا غاية ؟!
لو ماهو غاية .. ليه الحروب ؟ .. ليه السلام اللي تمناه الشعوب ؟
ليه الحسد يملى القلوب ؟
وليه الفقير المُعدم الكادح .. بهجته تملى الملاح
لامن لقى ذاك الثري يعطي هاذيك المطربة مليون
وهذا الثري لامن سرى من حفلته .. وقفت سيارته عند الإشارة
وجاه شايب يطلبه .. الهم عاثي في وقاره
دق بـ اصابع مُتعبه .. على الشبّاك
قال : انا يا سدي مديون .. وانت الكريم
يحكون عنك في الجرايد .. وتقال في جودك قصايد
ويُقال انك للأرامل واليتامى عون
ما ابغى منك الا حاجة .. لبس الشتا لجل العيال
الله يسدد لك خطاك .. اعطني مما عطاك
واعتدل راعي الملايين الكثير في جلسته
وعقد حجاجه ثم قال :
ألا ما اثقلك واغباك .. ليه يا اخي ما تشتغل
انت كسول .. ومستغل
وطلّع من المحفظة فكّه .. رماها وقفل الشبّاك
ابغى لسؤالي اجوبة ...
ليه البر والتقوى .. مليان في جرايدنا ؟!
وليه هموم هالشارع ؟! .. بعيده عن قصايدنا ؟!
ليه الفساد .. ليه الكساد ؟!
وليه الحروب ؟! .. وليه الحسد مالي القلوب ؟!
وشهو الجواب ؟!
اتمنى انه مايكون المال هذا هو وسيلة ماهو غاية
هذي الكلمة النبيلة .. اخترعها أغنيا
لجل مسكين ٍ شقى .. يرضى بقليلة

وصدّق انت او لا تصدّق
ماني الشخص المثالي .. كل مافي الأمر اني شاعر ٍ ماهو يبالي
كان صار اللي اقوله علقم ٍ او صار حالي
كل مافي الأمر اني استريح .. لا مشابي مركبي عكس اتجاه الريح
وما ابرّي من الخطى نفسي ..
واللي اجاهربه مثل همسي
صدّق اني ماني الشخص المثالي
كل مافي الأمر اني اجمع احساس الحواري وسط صدري
وانقل الواقع لشعري
كل مافي الامر اني شاعر ٍ مطرود من جنة خيالي
صدّق اني ما قصدت اني اكون
صوت للي مايبون
صدّق اني ماني الشخص المثالي
والا تدري لا تصدّق

[السحاب البعيد]

فقير وعندي المال الكثير
فقير وملبسي غالي حرير
ويا صاحبي الحافي الفقير
ابنشدك ابسألك وشهو الحصير !!
وابسألك وشلون انا امر وانهي
واذا حكيت قبل انتهي من كلمتي
يقاللي سم ويصير
ولاشكيت من غفلتي طوّل زمنها
يقاللي لاتشتكي .. ماخلقت الشكوى لأمير
وابسألك وشلون انا مع كل ذا .. اقول عن نفسي فقير ؟؟؟
ياصاحبي لاصار للضحكه ثمن
وصاروا اصحابي كثير بس بثمن
والوفاء مابه وفاء الا بثمن
ابسألك ماني فقير ؟؟؟
ولاصارت اقوالي حكم
ولاقالها غيري غدت حكيٍ قديم
ابسألك ماني فقير؟؟
ولاصرت انا مانيب انا
ولاغلطت قالوا صحيح .. وكل شي اعمله يصبح عظيم
ابسألك ياصاحبي ماني فقير؟
وياصاحبي ابنشدك لامن جفتني دنيتي
وابتدأ الدرب الطويل اللى ابد ماينتهي
وانتهي العز القديم وماكنت اظنه ينتهي
والموت بدد فرحتي .. وحطوني في قبر ٍ صغير
وحزنوا علي .. وبكوا هلي وناس من ربعي قليل
وارتاح من وجهي كثير
وبقيت وحدي في حيرتي مابه احد
لا طال عمرك ولا تحت امرك
ماغير انا وخوف ولحد وحساب قدامي عسير
وقتها ذكرت اني من زمان
يوم انه امهلني الزمان
هذا ظلمت .. هذا جرحت .. ياما كذبت
وذنوبي ماتحصي كثير
وقتها الىَ ندمت .. ونفسي كرهت
عرفت ان الله كبير وان الهلاك اصبح اكيد
واني انا مالي رجاء .. ولاهروب من الدجى
من الجحيم الا بأمل عندي وحيد
ان الله غفـّار ورحيم
ابسألك ياصاحبي عني أنا في وقتها
ماني فقير ؟؟؟

[السحاب البعيد]

فرقة موسيقية
كمنجة بثلاث أوتار .. قيتار .. ثلاث طبّالين
اورق .. ناي .. شاي
فـُرقة موسيقية
يجون .. كل ليلة يجون .. ومع أول الصبح يسرون
لجل ثاني ليلة يجون
هم يعزفون .. وما يعزفون في مكان تسمع فيه الناي قانون
ازعاج .. صجة .. دجة
ايقاع خليجي غالبا ً مقلوب
ايقاع خليجي دائما ً مطلوب
شباب .. بنات ترقص .. والعطر في اول الرقصة حلو ..
وفي آخر الرقصة هبوب
غناء وطرب .. عرض وطلب
واحد يغني .. بدلته تلمع .. يُـفترض فنان
ياليلة دانة لدان
قرقعت كيسان .. دخان .. ما اسعد الشيطان
ضوء خافت .. كل شي حلو والضوء خافت
كل شي كذب والضوء خافت

وفي اطرف الصالة .. هناك اثنين .. واحد يقول :
- " شفت هاذيك الطويلة اللي ترقص " ؟
الثاني - " وين؟ "
- " هاذيك اللي مع حسين "
" واعدتها البارحة وجتني .. مالومها حبتني ..اعطيتها ألفين "
" مسكينة هي .. ماودها تجلس في ملهى .. بس انها تساعد اهلها "
الثاني قال : " كل البنات اللي هنا تساعد اهلها "

غسان .. غسان .. مدير هالصالة
ركض غسان .. وصل فلان .. وصل المهاب .. معاه عشر اشخاص
ركض غسان " اهلين وسهلين ..شو هالحلو..يخزي العين "
الفرقة تنهي الأغنية .. وتعزف بسرعة ..
" حمد لله ع السلامة .. ياجاي من السفر "
أحلى طاولة للمهاب .. طاولة على البست
لفلان اللي من اسبوع كان لابس البشت ..
اليوم على البست

غسان قلقان .. مضت ساعة .. وما نقــّط أحد
نادى " ياجارسون " وحط يده في جيب البنطلون ..
" خذ هالألفين ..على المغني ارميها .. وشاور على فلان "
ادريس قام " فلان ينقــّط وانا لا.. ياللإهانة .. والله لنقــّط "
- " يادريس لا .. هذي فلوس التذكرة .. وشلون نرجع .. السفر بكرة "
ادريس قال " بكره اروح لفلان احلف له ( انسرقت فلوسي .. الاوتيل غالي .. وانا معي عيالي ) وارجع انقــّط "

جارسون هناك يحكي مع زميله
غسان قال " الفواتير ماتنزل الا آخر السهرة "
الحق معه .. بهذا الوقت .. مافيه احد يقرا
جوزيف وين .. اليوم فل .. ودوه للشرطة .. غسان شافه يسرق من النقطة
والكل عارف .. الثلث للفرقة .. والثلث للنمرة .. والثلث للصالة
وكله لغسان

طلعت الشمس .. الساعة ثمان
الكل سكران .. الكل تعبان
ماعدا غسان " قفل الصالة ..الوعد بكرة "

[السحاب البعيد]

مجلس رجال
على اليسار مقلـّط .. وعلى اليمين صالة
ضيوف جالسين
قهوجي يلم الفناجين
وينطر اخر ضيف منهم يهز فنجاله
ضيف يقبل من بعيد
يقوم صاحب المجلس طلال لستقباله
شخص جالس على اليمين يهمس لجاره :
" هذا احمد اللي جاي بس ماهو لحاله "
" من معه ؟ "
" يبدولي اطفاله "
ويدخل احمد معه ثلاث اطفال
وعند باب الصالة يستقبله طلال
" السلام عليكم "
الكل يوقف
" هلا والله مرحبا عليكم السلام .. حي الله احمد هلا وسهلا .. تفضل .. كيف الحال ؟ "
" هلا طلال ..اعرّفك على عيالي .. ابني صابر عمره ثمان سنين .. لاتستحي سلّم ياصابر
بنتي هالة .. ست سنين .. سلم ياثامر على الجماعة .. وش هذا اللي في يدك ؟؟
اه .. سجايري والولاعة "
عبدالمعين يطالع الساعة .. ويهمس لجاره
" كيف يجيب اطفاله ؟! .. محد منا معه اطفاله .. ليش يجيب اطفاله "
ويجلس احمد ويجلس حوله عياله
طلال يقول :
" ما شاء الله .. ياحليلهم .. الله يحفظهم ويحرسهم ويحميهم
ماشاء الله يا صابر : ايش هالثوب الجديد "
احمد يقول وملىء وجهه ابتسامة
" هذا صابر موهوب في التقليد قوم ياصابر قلّد اصالة
والا تدري وري عمك كيف يركض سامي الجابر "
ينطلق صابر لخارج المجلس .. يرجع معه كورة يشوتها .. تنزل من السقف ثمان لمبات مكسورة
احمد يقول وملىء وجهه ابتسامة
" شاطر ياصابر ... شفت ياطلال شقاوة هالعيال "
طلال يتمتم :
" ياحليلهم .. الله يحفظهم ويحرسهم ويحميهم "
" تعالي ياهالة سمعيهم و وريهم اغنية و رقصة الخيالة
لا تستحي يا بنت مافيه احد غريب هذا عمك طلال وهذا عمك مثيب
وهذا عمك عبدالمعين وهذا ..... لا مؤاخذة انت مين ؟ "
- انا عبدالكريم
" عبدالكريم .. تخيّل يا اخي ماعرفتك لانك يمكن ملتحي .... لاتستحي يابنت لاتستحي ..
تدري طلال " هالة نجحت بامتياز "
صوت مدوي ينفجر
" اه ياثامر ما اشطنك .. كسّرت القزاز "
احمد يقول وملىء وجهه ابتسامة
" شفت ياطلال شقاوة هالعيال "
طلال يتمتم :
" ياحليلهم ..الله يحفظهم ويحرسهم ..... ؟؟؟؟!!!!
" وش كنت اقول ايوا طلال كنت اقول هالة نجحت بامتياز اعطيتها البارح فلوس
وقلت لها ياهالة ايش ما تبغي اشتري "
طلال يقول
" مبروك .. مبروك .. ايش تبغي تصيري لما تكبري "
هالة تتفل على طلال .. وتقول :
" ايش دخل ابوك "
احمد يقول وملىء وجهه ابتسامة
" شفت ياطلال شقاوة هالعيال "
طلال يتمتم :
"ياحليلهم .. الله يحفظهم ..................... ؟؟!!!
" تعال ياثامر .. عد لعمك من واحد الى العشرة "
ثامر يبتدي يعد
" واحد ..اثنين .. ثلاثة .. سبعة "
احمد يقول وملىء وجهه ابتسامة
" دايم يعد .. ولما يوصل اربعة يلخّبط "
يالله ياثامر من جديد
يبدا ثامر من جديد
" واحد .. اثنين .. ثلاثة .. سبعة "
" شاطر يا ثامر شفتوا كيف لخبط "
ينفتح باب المقلّط ويدخل النادل شايل دخون
والصالة في حالة جنون
احمد يصفق .. صابر وثامر يرقصون
طلال يقوم
" العشاء .. تفضلوا ..الله يحيكم "
احمد يقول
" يالله يا اولاد الله يحميكم .. اتعشوا اول .. بعدين سووا اللي تبون "
يركض الاولاد قبل الضيوف .. وللمقلط يدخلون
صابر ياخذ برتقالة .. يرميها على النادل .. تطيح المدخنة والدخون
ثامر هناك .. يكسر بياله .. ويرمي شظاياه على اللي ياكلون
هالة ترمي على طلال صينية ... وتاخذ علبة مياه غازية
تخضها .. تخضها .. تخضها .....
وترقص رقصة الخيالة .. وتفتح العلبة
احمد يقول وملىء وجهه ابتسامة
" ايوه ... هذي رقصة الخيالة "
والضيوف في ثياب من المياه الغازية يرفلون
مجلس رجال
على اليسار مقلط .. وعلى اليمين صالة
كل شي فيها ماهو على حاله
قزاز مكسور .. سجادة محروقة .. غترة مشقوقة
صينية هناك مرمية ...
ضيوف مبللين بمياة غازية
على وجه عبدالمعين جرح قطعي . .ومهلبيّة
نادل مصاب بحروق من الدرجة الاولى .... وجروح سطحية
كورة ... لمبات مكسورة
يضهر احمد من المقلط وملىء وجهه ابتسامة
" اكرمك الله يا طلال..شايف شقاوة هالعيال
اقول طلال .. اشكر ام العيال نورة .. العشاء كان رائع .. ماقصرت مشكورة
عشاكم ياجماعة بعد اسبوع عندي ... لازم تشوفو ولدي الصغير ؟!!
اخر العنقود .. منصور .. عمره ثمان شهور .. شيطاني يعقد ..اظن له معي صورة
شوف يا طلال هالصورة .. لاتغرك نظرته .. ترى والله ذكي مره
ما يضحك ولا يبكي لما يبدا اخوه ثامر يعد "
طلال صامت ما يرد
وترتسم على وجهة احمد علامة استفهام ويتساءل في داخله
" طلال كن وجهه متغير ..اكيد احد من هالضيوف زعله
مسكين طلال .. دايم في حاله مايخلوه .. زين جبت العيال سلوه "
ويخرج احمد من الصالة .. فخور بعياله
تارك وراه مجلس .... كان مجلس رجال
وعلى اليسار بقايا مقلط ... وعلى اليمين شبه صالة

[السحاب البعيد]

إحترامي .. للحرامي !!
صاحب المجد العصامي ..
صبر مع حنكة وحيطة ..
وابتدا بسرقة بسيطة ..
وبعدها سرقة بسيطة ..
وبعدها تَعدى محيطه ..
وصار في الصف الأمامي .. !
احترامي .. للحرامي .. !!

احترامي .. للحرامي ..
صاحب المجد العصامي ..
صاحب النفس العفيفة ..
صاحب اليد النظيفة ..
جاب هالثروة المخيفة ..
من معاشه في الوظيفة ..
وصار في الصف الأمامي ..
احترامي .. للحرامي .. !!

احترامي .. للحرامي ..
صاحب المجد العصامي..
يولي تطبيق النظام ..
أولوية واهتمام ..
ما يقرب للحرام ..
إلا في جنح الظلام ..
صار في الصف الأمامي
احترامي .. للحرامي .. !!

احترامي .. للحرامي ..
صاحب المجد العصامي ..
يسرق بهمة دؤوبة ..
يكدح ويملي جيوبه ..
يعرق ويرجي المثوبة ..
ما يخاف من العقوبة ..
صار في الصف الأمامي ..
احترامي .. للحرامي .. !!

احترامي .. للحرامي ..
صاحب المجد العصامي ..
صار يحكي في الفضا ..
عن نزاهة ما مضى ..
وكيف آمن بالقضا ..
وغير حقه ما ارتضى ..
صار في الصف الأمامي ..
احترامي .. للحرامي ..
احترامي للنكوص ..
عن قوانين ونصوص ..
احترامي للفساد ..
وأكل أموال العباد ..
والجشع والازدياد ..
والتحول في البلاد ..
من عمومي للخصوص ..
احترامي للصوص .. !!

[السحاب البعيد]

في زمن وهمي من الأزمان

كان ياما وياما كان ..

سلطنة وسلطان ..

وف يوم من الأيام ..

يتصفح السلطان جريدة ..

موضوع يسترعي اهتمامه ..

أحمد محمد سلامة ..

فـرد من أفراد شـعبه ..

يائس وأوضاعه صعبه ..



في الصبح يشتغل بواب ..

في مدرسة أطفال ..

وفي الليل يشتغل شيّال ..

عنده ثلاث عيال

فيهم مرض نادرعضال ..

ماله علاج إلا فبلدان بعيدة ..



كلفته ما يحتملها وفاقته أصلاً شديدة ..

انسدت الدنيا أمامه ..

وارتأى أن الطريقة الوحيدة ..

لفتح أبواب الأمل ..

انه يوجه ندا .. عبر الجريدة ..

لاهل الكرم .. واهل الشهامة

تبرق .. في عين سلطان البلاد غمامة ..

ويهطل الدمع من عينه ..

يمسح الدمع بكفوفه ..

ويخلع العمامة ..

ويرفع للسما راسه ..

ويقول ..

ياربي الفرد الصمد ..

سترك وعفوك ..

ألهتنا عن الناس ..

أمور الحكم والسياسة ..

ينادي سلطان البلد :



يا حاجب ..

استدعي معالي وزير السلطنة الأول .. رعد ..



يجي رعد .. ويبدي ولاَءه واحترامه ..

ـ صاحب المجد والكرامة ..

سيدي السلطان أمرك ..

ـ أي كرامة يا رعد .. أي كرامة

والمواطن في البلد .. ضايع مقامه ..

اتركك عن هالحكي .. واسمعني زين

هذي مليونين خذها ..

وصلها لمحمد سلامة

أحمد محمد سلامة

خذ الجريدة .. تلقى التفاصيل في الجريدة

لكن اسمع يا رعد .. ما أبي يدري أحد

أحذرك .. لا صحافه .. ولا جرايد

هذي لوجه الله أبيها ..

ويعلم الله .. من وراها ..



ما أبي مدح وقصايد ..

أرتجي عفو الكريم ..

في يوم بالأهوال زايد ..





ـ سيدي السلطان خيرك .. في القديم وفي الجدايد

ربي يجزيك المثوبة .. ويعينك بوقت الشدايد

ـ يخرج رعد .. ويستدعي وزير المال والأحوال ..

مرسال ..

يجي مرسال .. أمرك معالي وزير السلطنه الأول ..

تعال يا مرسال .. فوراً وفي الحال

خذ المليون هذا ..

وسلموه .. للمواطن أحمد محمد سلامه .. من سيدي السلطان

خذ الجريدة .. تلقى التفاصيل في الجريدة

مرسال .. لابد هذا يتم الآن .. فوراً وفي الحال

وبأقصى درجات السرية والكتمان ..

هذي أوامر سيّدي السلطان ..





يخرج مرسال .. ويستدعي كبير الحراّس

فراس .. يجي فراس

أمرك يا وزير المال والأحوال ..

ـ فراس .. تعال

خذ هذي خمسمية ألف ..

سلموها .. للمواطن أحمد محمد سلامه .. من سيدي السلطان

خذ الجريدة ..

تلقى التفاصيل في الجريدة

خذها الآن ..

فوراً وفي الحال سلمها .. وبأقصى درجات السرية والكتمان

هذي أوامر سيدنا السلطان ..

يخرج فراس .. ويستدعي النقيب ..

حبيب ..

يجي حبيب .. أمرك ياكبير الحراس

ـ حبيب تعال ..

خذ هذي المية ألف ..

سلموها للمواطن .. أحمد محمد سلامه .. من سيدي السلطان



خذ الجريدة ..

تلقى التفاصيل في الجريدة ..

خذها الآن سلمها .. فوراً وفي الحال ..

وبأقصى درجات السرية والكتمان ..

هذي أوامر سيدنا السلطان ..

يخرج حبيب ..

ويستدعي مسئول المساكن

مازن ..

ـ مازن .. تعال .. خذ الخمسين ألف هذي

سلموها للمواطن .. أحمد محمد سلامة .. من سيدي السلطان

خذ الجريدة .. تلقى التفاصيل في الجريدة

خذها الآن سلمها ..

وفوراً وفي الحال ..

وبأقصى درجات السرية والكتمان ..

هذي أوامر سيدنا السلطان ..

يخرج مازن .. ويستدعي رئيس الحي ..

اللي ساكن فيه أحمد ..



عبد الحي ..

يجي عبد الحي ..

ـ عبد الحي تعال

خذ هالعشرين ألف

سلموها .. للمواطن أحمد سلامه

خذ الجريدة .. تلقى التفاصيل في الجريدة

خذها الآن .. وسلمها لأحمد سلامة

عبد الحي ..

أهم شي السرية والكتمان ..

هذي أوامر السلطان ..

يخرج عبد الحي ..

ويتوجه لمكتبه في الحي ..

ويستدعي مساعِدُه أمين ..

ـ تعال ياأمين .. تعال .. شوف الجريدة

وخذ الألف هذي ..

سلمها لأحمد سلامه

ساكن هناك .. عمارة في آخر الشارع

جنب مدرسة الكرامة ..

الدور الرابع .. شقة ستة

وديها الآن .. وقل له ..

هذي من سيدنا السلطان ..

واسمع ياأمين ..

احرص على السرية والكتمان ..

هذي أوامر السلطان

أمين واقف ورا باب شقة

أحمد محمد سلامة ..

يدق الباب ..

صوت من خلف الباب ..

ـ مين ؟ ..

ـ أنا أمين .. مساعد رئيس الحي ..

عبد الحي

يفتح الباب .. أهلين وسهلين ..

ـ هذا بيت أحمد سلامه

ـ نعم أنا أحمد سلامه

ـ أحمد محمد سلامة ؟ ..

ـ أحمد محمد سلامه ..

ـ ممكن إثبات

ـ طبعاً أكيد

ـ فعلاً أحمد محمد سلامة

سيدنا السلطان .. موضوعك استرعى اهتمامه

سيدنا بيسلم عليك

وحب يطمن عليك

وكلفنا ننقل لك رسالة :

سيدنا السلطان .. أدام الله أيامه

يتمنى للأطفال عندك ..

كل الشفا وكل السلامة

مبروك يا أحمد تستاهل ..

مع السلامة .. !

* * * *

[السحاب البعيد]

العادة جرت
كل طالب مجتهد دمه ثقيل

العادة جرت
كل مخلص في الهوى حظه قليل

العادة جرت
العطوف اللي كريمٍ في الجرايد
في الأزقة والحواري له عوايد .. يصبح القاسي البخيل

العادة جرت
جُل من يصبح ثري .. يكتب شعر
والقصائد تحتري اغلى سعر
الشعر اصبح مجلة .. جلها غث وهزيل

العادة جرت
لمّا نسافر كلنا في الصيف .. نمشي مخشبين
كلنا نحكي بفخامة .. نمشي بفخامة .. والابتسامة لما نسّلم
نبتسم كأن فيه مصورين
ورغم اننا نسافر لجل نلقى بعض .. ونعرف بعض
الا اننا لما انتقابل نلتفت متجهمين
ماهو جنون .. ولا عبط
تظهر أغاني من نمط .. أربع سنين انتطالع بالعيون
وفي المواعيد اللي ماادري منهو كان العبقري اللي عطاها
نجلس في نفس الاماكن .. ننتظر نفس الوجيه
تظهر بكامل بهاها
ويبتدي ذاك الحوار السرمدي :
- شف هذاك شلون لابس .. ماهو صاحي
- شف هذاك موجود في كل النواحي
- شف هذيك شلون تضحك .. ياخزياه ياعيباه يالله
- شف هذيك شلون تمشي .. شف هذاك شلون جالس
- شف رفيقك .. ليش عابس ؟؟ خل نروح ونسأله
- لا انتظر هذا ماشي مع هله
وينتهي هذا الحوار السرمدي
فينا نقول : وش هالصخب .. هالديرة مليانه عرب !!
كأننا متفاجئين
ولما نرجع بالسلامة .. العادة جرت .. انا نكون متنكدين
ومافي سبب غير اننا ما كنا حنا
غير اننا لما نسافر .. دايم نكون ممثلين
ولجل نطلع من تقمص دورنا .. لما نرجع
نحتاج نقعد ناطرين أسابيع وأيام .. ونظهر من الانفصام

العادة جرت
انّا نجل الأجنبي .. ونقصي القريب

العادة جرت
انها الايام تمضي ومسجد الاقصى سليب

العادة جرت
كل ما جو الخليج صفي وراق
يبتدي العم سام .. عزف موال العراق

العادة جرت
كل ما اكتب قصيدة .. اوصف الواقع بها
القى جاهل ما اريده .. يعتقد انه لها

العادة جرت
كل ما اكتب يقيني أو ظنوني ..
يكاد المريب أن يقول خذوني

[السحاب البعيد]

بدء ذي بادىء ..
هذا تعريف المبادىء ..
كل وقت .. وله أذان ..
الزمان .. غير الزمان ..
ياكلام الليل .. يمحيك النهار ..
باختصار ..
المبادىء .. شىء تحكمه الظروف ..
مثل طفل .. ترتبك في الحروف ..
ما اجمل أغلاطه ..
المبادىء .. للأسف ..
كلمة مطـّاطة ..

بدء ذي بادىء ..
يا بايع إحساسك ..
وش احساسك ..
وأفكارك لغيرك ..
ياشاري إحساسك ..
وش احساسك ..
واحساسك لغيرك ..
ليتك توصف متعتك ..
لاخذت من غيرك مشاعر ..
تدري لو تقدر ترى ..
ماهو بعيد تصير شاعر ..
كيف الخلاص .. من ناس تغتال الشعر ..
و حد القصاص في كل سرقة ..البتر
الا الفكر ..

بدىء ذي بادىء ..
هذا تعريف المبادىء ..
يا بايع أموالك .. لفقرك ..
وللعذاب اللي في بيتك .. ودمعة عيالك ..
ليت توصف متعتك ..
ليت أوصف ضيقتك ..
لو جرى لك ..
في القمار .. اللي جرالك ..
ليت نعرف ..
متعتك أو ضيقتك ..
أيهم اللي بقالك ؟

يا بايع أعصابك .. لخمرك ..
ياكثر ماحرت بـ امرك ..
يابايع الصحة .. لخمرك ..أو سمومك ..
وش يفيد أني ألومك ..
كيف تلقى متعتك .. لا ضاع عقلك !
وبان بين الناس ذلك
وكيف تسعد في شعورك ..
وانت خارج عن شعورك ..
يا بايع اعصابك و وعيك ..
ياللي تهرب في عذابك ..
من عذابك ..
لو بغيت في يوم ..
تهرب من هروبك ..
وش هو احساسك ؟

بدء ذي بادىء ..
هذا تعريف المبادىء ..
يابايع بلادك .. بكم كان الثمن ؟!
يا بايع بلادك ..
انسى المباني .. والبيوت .. والحب الأول
انسى غبار المدرسة .. و وجوه اصحابك ..
انسى فؤادك .. وميلادك ..
وارمي ورا ظهرك ..
كل العبارات الكبيرة ..
عن الوفا .. والتضحية ..
وعن حب الوطن ..
يا بايع بلادك ..
لو كبروا أولادك ..
وكان السؤال في عيونهم ..
سجنك وجلادك .. !
" احنا يابوي من وين ؟! "
وش هو احساسك ؟!

يابايع آخرتك .. يالعاصي القاسي ..
اسمع نصايح صاحبك " ابليس " :

" لا تترك التدليس ..
اظلم ولا تفكر في باكر ..
هيم في العصيان جاهر ..
واختار من بين الذنوب ..
مايسعدك ..
ولاسار عمرك للغروب ..
لاتتوب ..
لا تحسب للعمر ..
ولا تفكر بالقبر ..
ولا العذاب ..
توك شباب .. "
هذي نصايح صاحيك ابليس ..
يابايع آخرتك بدنياك ..
لا عدمناك ..
لو عدمناك ..
وش هو إحساسك ؟

[السحاب البعيد]

حسبي اللي انزل التوبة وعمّا
كيف نحمل كلنا نفس المُسمّى
*****
سيف قاطع في الوغى يغشى المنايا
مثل سيف ظـــــــــل في غمده ولمّا
*****
حل وقت الغنم خذ مما يريده
وسيفنا القاطع بقا له ما يرمّى
*****
حسبي الله كيف كنّا كيف صرنا
الأعادي تفوقنا كيفٍ وكمّـا
*****
وش يضر اللي كرهنا لو كرهنا
وش يفيد اللي نحبه حب جمّا
*****
هو بقابه ضيّ واهي نهتديبه
هو بقابه خطب داهي ما ألمّا
*****
يا مدوّر خير والشر متزاحم
عزتيلك ابرةٍ هو وسط يمّى
*****
لا تنادي وش تنادي من تنادي
كيف يوحي الصوت منهو كان اصمّى
*****
يرحم الله وقت كان الخير شامل
ما ترك من ورث يؤكل اكل لمّا
*****
مير من يرجي من الانذال حاجة
يستحق الخزي ويسام ويذمّى
*****
ومن سعى بمعروف مع سقط الاراذل
خاب في المسعى وزاد الغم غمّى
*****
ايه ياوقت الرزايا والبلايا
وقت شح الجود والبخل استعمّى
******
من يقيسك بالدقايق والثواني
العقارب ؟ وافق الاسم المُسمّى

[السحاب البعيد]

ما هي حكاية.. خطبة أو مَنْبَرْ..
ولا حكاية..
مجتمع عَنْه التَّرَف أدبرْ..
ولا حكاية مناهج..
فجأة اكتشفوا..
انّها لابد تتغيّر..
ما هي حْكاية بطالة..
ولا هي حْكاية جهالة..
ولا هي حْكاية عمالة..
ولا هي حكاية كراهية تقادم أو وراثة..
ولا هي حكاية صراع بين الثوابت والحداثة..
ولا هي حكاية حقد من أصغر.. على الأكبر..
ما هي حكاية.. وضع بائس..
أو شباب.. مُعْدم ويائس..
فارقوا كل المباهج..
دُرّبُوا في ليل حالك..
وخاضوا لامريكا معارك..
وبعد ما أدّوا الغرض..
صاروا مرض..
ما كوفِئوا.. بما يرونه..
مُسْتَحَق من الثّمن..
وبعد فترة من الزمن..
أصبحوا أعنف وأخطَر..
وأصبحوا بالأمر أخبَر..
خلّطوا حابل بنابل..
وقرّروا يكونوا قنابل..
موقوته من ناس آخرين..
في وقت يأتي بعد حين..
في اللحظة المثلى تُفَجَّرْ..
ما هي حكاية صُدَفْ..
ولا هي تخطيطٍ مُدَبّر
الحكاية ما هي هذي..
الحكاية قد تكون..
أكبر .. أو أصغر..
لمّا تاريخ الحقائق يطمسوه.. بالأدلّة والشواهد
لمّا أولى القبلتين يدنسّوه..
والدنيا تشاهد..
لمّا طفل يموت.. بين أحضان أبوه..
والدنيا تشاهد..
لمّا تنهدّ البيوت.. فوق روس أصحابها..
والدنيا تشاهد..
لمّا يُقْتَل شخص في مسجد.. وهو ساجد..
والدنيا تشاهد..
لمّا تندكّ الكنائس بالرصاص..
والدنيا تشاهد..
لمّا تُفقَد كل آمال الخلاص..
وتضرب الحسرات.. في كل الصدور أطنابها..
لمّا تفقد أم.. نصف أطفالها..
ويصبح زوجها معوّق..
ولا مناص..
تصير الكل في الكل..
وما في في المنزل أكل..
وجيش مدجّج بأعتى السلاح..
يحاصر بابها..
لمّا تصبح كل فكرة للقصاص.. تُهْمَه..
والله أكبر تصبح إرهاب..
لمّا الفلسطيني تُهَان أخته وأمّه..
ويلاقوا لهذا أسباب..
لمّا يومياً تكون المعركة..
ما بين أطفال بحجارة..
ودبّابة..
لمّا يومياً يمارس..هتلر العهد الجديد..
حصاره.. وإرهابه..
لمّا كل هذا البغي.. بكل صفاقه يؤيدوه..
لمّا تاريخ المذابح يطمسوه..
لمّا أولى القبلتين يدنسّوه..
لمّا تُصبح.. سيّدة هذا الزمان..
أمنّا الغولة.. كذّابة..
لمّا تصبح.. أمّة العُرْب الأشاوس..
أُمّة ندّابة..
لمّا كل هذا يصير..
ويَحُدث الحدث الكبير..
يحدث الأمر المحال..
وتصبح إسرائيل..
هي بس وحدها..
المستفيد الأكبر..
ينطرح في كل هالدنيا سؤال..
هي حكاية خطبة أو منبر..؟
أو حكاية مجتمع.. عَنْه التَّرَف أدبر..؟
أوحكاية مناهج.. لابد تتغيّر..؟
ما ندري ليه..؟
جاوب يا سبتمبر..!

[السحاب البعيد]

الخليج خليجنا
بانوا اللي يحسدونه
يبون ثروات الخليج
ويوم الخيلج مرافق الظما والجوع
مادروا به كنهم ما يعرفونه
ويوم أنعم المولى علينا
من غير مَنّ ياما عطينا
خيرنا ما يلحقونه
لو ينكرونه
هيلنا ودخوننا في سماهم ينشقونه
واليوم يوم الله أمر
وحقدهم بان وظهر
كنّي بالخليج يقول: ..
مافات فات .. لا تذكرونه
طيبنا لا ما تغير
وودنا لاهل الوفا اكثر واكثر
ولغير من يوفي لنا
ان صفحنا وان عطينا من طيبنا
يحمدون اللي عطانا ويشكرونه
وان مسكنا ما عطينا
هو خيرنا.. حنا به أولى
جايز لهم وإلا البحر ..
ما اكثر من الما في البحر... يشربونه

[السحاب البعيد]

أنا مدري وش إحساسك
ومدري وش تظنيني
أنا الصادق في عينك كنت
و صرت الكاذب الخوّان
أنا أخطيت ما انكر ولافيه عذر يكفيني
سِـوا اني احبك حيل واني دايما ً انسان
انا ادري بمدى جرحك
وادري الحظ جافيني
يطول الوقت ما أخطي
وإذا أخطيت كل شي ٍ بان
انا شفت الزهر مايل
وظنيته يناديني
قطفته .. يوم ضميته .. لقيته للأسف ذبلان
عرفت انك زهر عمري
عرفت انك بساتيني
وغيرك قيض مايروى .. سرابٍ يشقي العطشان
انا لو ماحصل ماكان وشهو اللى يدرّيني
بأنك ماسواك انتى .. سكنتى القلب والوجدان
انا اسف على اعذاري
عجزت ألقى عذر فيني
يليق بغلطتي في حقك ويرجع كل شي ٍ كان
احبك كثر أخطائي
وادري انك تحبيني
وادري لو تفارقنا فلا نقدر على النسيان
اذا تقوي على فراقي وبعدي عنك .. خليني
انا مليت من دور الكرامة
ولعبت الغفران
قليل العمر ياللي انتي دموعك ما تساويني
حرام انه يضيع فراق
هي من قلها الأحزان ؟؟

[السحاب البعيد]

أجهلك .. و لي سنين اتخيلك
اتمثلك في كل طيف .. والقاك في قسمات ضيف
كل المشاعر له تقول .. حنـّا هلك

أجهلك .. ولي سنين اتخيلك
القاك في بعض الوجيه .. ويمرني طيفك واجيه
يا باكر اللي اجهله .. ارقتني الأسئلة
وابطى العمر يستعجلك ..

أجهلك .. ولي سنين اتخيلك
بالعيوب وبالمزايا .. بالألم
لامن هجرتي يجتاحبي ضلوع وحنايا
اتخيل شكوكك وظنك .. اتخيل التقصير منك
حتى الجفا اتخيله .. وكيف انا باتحمله .. واتحملك

أجهلك .. ولي سنين اتخيلك
وجهك اللي قد حبسته داخلي في غمضة عيوني
واللي ياما قد رسمته .. من عبث طيشي وجنوني
وجهك اللي دوم يظهر لما ألقى نشوة الفكرة الجديدة داهمتني
لما القى انكساراتي قصيدة واكتبتني
وجهك اللي دوم يظهر في اعاصيري وسكوني
في الجبال الشاهقة في أجمل خيالي
في السفوح الخافقة بين نبضي وانفعالي
وجهك اللي قد نحته في عظامي والجوارح
وجهك اللي قد حفظته وبتفاصيل الملاح
بالنهار في بسمته .. بالضيا اللي في ورودة
بالعبوس في غضبته .. بالتضاريس وحدوده
من جنوحه في البها .. لين اقصى نقطة في كاسر جماله
للعذوبة .. من شروق النور في ضيه
للشعر في غروبه
من شطوط الكحل في عيونك لنحرك
من بياض الثلج في خدك لجمر ٍ قاد في ثغرك
وجهك اللي ما ابد يوم لمحته .. او عرفته
لي سنين اتخيله .. واتخيلك
ياللي كلي بك معرفة .. واجهلك
ما اصعبك .. كيف الاقيك
ما اسهلك .. لو الاقيك
ياللي دوم اتخيلك
مملكة حسن الزمن
وأنا الملك

[السحاب البعيد]

ابسألك .. هو أنا استاهلك ؟!
استاهل الدمع اللي جرّح وجنتك ؟
استاهل اني اعشقك ؟
ابسألك عن حالنا .. انتي وانا
ياللي احس .. انك انا
حالنا ما هو غريب
انـّا نكون متأكدين ان الفراق ما هو بعيد
بالرغم من جرح السنين
عشقنا دايم يزين
ماهو غريب .. اني لو مرة في همي
نسيت وبكلمة جرحتك
قبل ما تتألمين .. اللي ينزف هو دمي
ابسألك ماهو غريب .. استاهلك
ابسألك لو قلت لك ان الحنان اللي في قلبك
ينبت من الصخر الزهر ..
وان النهار اللي في خدودك يخلي النسمة عطر ..
وان العذاب اللي في عيونك يعلـّم الناس الشعر ..
ولو قلتلك اني احبك اكثر من هموم البشر
وكثر الجفا وكثر السهر ... لو قلت لك
وانك اقرب من عيوني للنظر
كل الذي اقدر اقوله
واللي ما اقدر اقوله
استاهلك .. حبيبتي ؟!
وباجاوبك .. للأسف ما به احد يستاهلك

[السحاب البعيد]

انتي .. تدرين من انتي ؟!
تدرين انك لي غديتي كل شي
وانك غديتي شمس ليلي وفي الهجير الفيّ
وانك اصدق ماكتبت
وانك احزاني وفرحي .. لاضحكت اوانجرحت
وانك غديتي ياعذابي اغلى من حبك علي ّ
قبل أحبك .. يا ما كذّبني القصيد
وبعد حبك .. صار يكتبني القصيد
هو يوصفك بسمة وطرف
وأنا اعشقك في كل حرف
منك شكالي .. وصف حسنك اتعبه
وانا شكيتك .. وعشقي لحبك اعجبه
ومهما شكى ومهما وصف
انتي احلى ماكتبت .. انتي اصدق ماكتبت
وانتي احساسي وجرحي .. لاضحكت أو انجرحت
وانك غديتي يا عذابي اغلى من حبك عليّ
تدرين من انتي .. !!

[السحاب البعيد]

على مدى الأيام .. كان البحر بالنسبة لي
هو البحر
رمل .. أمواج .. صخر
كان البحر بالنسبة لي بس البحر
وعلى مدى الأيام ماقد لمس فيني المشاعر
الا ذاك اليوم .. يوم انك معي
يومها كان الوداع
وكان البحر دفتر والموج بيت من شعر
وبيتٍ ورى بيت .. وموجه ورى موجه
تكتب قصيدة حبنا
وتمحي الجراح بجراح
ومثل الفرح في دنيتي كان الفجر
عمره قصير .. وبكل حب اهدا نسيمه وراح
وتشرق الشمس .. لجل الخلايق كلها تقرا
قصيدة حبنا
ويومها ماكان للشمس اي نور
وبعض السبب كان الوداع
وباقي السبب انتي خذيتي .. من سماها النور
ولجل الصدق .. يومها كنتي انتي الشمس
وكان البحر عينك .. وادموعك امواج الشعر
وخدك الدفتر
آه يا اللقى ماخذت من طبع البحر
ما للبحر آخر
آه يالفراق .. ماخذت من ذوق الفجر
يمرنا عابر
وآه يالعيون اللى انا منها عرفت
ان البحر دفتر وان القصيد امواج
وإن الغرام شاعر

[السحاب البعيد]

قلتيلي انسى
ومن يومها وانا كل ليلة .. قدامي البرواز
حبر العيون ودمع القلم .. في دفتري
وصورتك .. رغم الألم .. ورغم انها خذت من اطباعك كثير
وخانت البرواز .. اشوفها في خاطري
حبيبتي مابيدي حيلة
لاصرتي الصورة .. وعيوني البرواز
وشلون ابنسى

اتعبتي الصورة مشاوير
وتعبت انا بلقى لغدرك معاذير
وصورتك اللي سجنت بروازها طول السنين ..
كانت جسد وبروازها الروح
ويوم انزعت منها الجسد .. تجرّحت اطرافها
وبجروحها راحت لمين ؟
لبروازها الثاني !!
مسكين .. بيسجنك ويبقى سجين
مسكين
تشبهلك اقداره .. خانته
وصورتك يجي يوم وتخونه
حبيبتي ..أو للأسف حبيبته
لاصرتي الصورة .. وجفونه البرواز
وشلون ينسى ؟!

حبيبتي لجل انسى جرحك واستريح .. ببكي
وبعد البكى .. ببكي
وأكيد فيه لحظة بتجي .. وبيجف دمعي
وعندها صورتك اللي في عيوني
بتموت من ظلم العطش ..
بروازها بيصبح نعش
وبتمرني الدمعة الأخيرة ... تاخذ معاها صورتك وتطيح
وكني بالمسافة تطول مابين عيني .. ودمعتي .. وخدي
وكني بقلبي الحاير المسكين
نبضه يقول لا تودع الفرقى .. الدمع مايرقى
وعندها لانزلت الدمعة لمثواها الأخير
وفارقت وجهي
بغمض عيوني .. واكسر البرواز
وانسى

[السحاب البعيد]

الصبر ... مالي انا الا الصبر
الغدر .. وشلون جاء منها الغدر
ياقلب ابي منك العذر
انا ما هقيت ان الفجر يقدر يخون وقت الفجر
وان السنين تقدر تمر ابلا عمر
لا ماهقيت ان الوفا في قلبها ماله قدر
واني انا محتاج مني الصبر
ياقلب ابي منك العذر .. وان مارضيت مالي جدى كود الصبر
ياجرحي في كل الدهر فارقت انا الدنيا
يا طعنةٍ وسط الظهر .. لابد انا انساك
بنسى انا كل اللي راح .. بنسى الفرح لجل الجراح
بنسى قصيدي والشعر .. بنسى سنيني والعمر
مع الهجر يمكن في يوم اسلى
وان ماسليت او ما نسيت
منك العذر .. مالي جدوى كود الصبر
ياللي خذلتي مدمعي .. ان كان ودك ترجعي
عندي طلب .. لاترجعي
ياللي خذلتي مدمعي .. ان كان ودك ترجعي
شرطي صعب ! ..
لو تجمعي آهات قلبي اللي انجرح
وتنسي السعادة والفرح
وتتعذبي
وبعد العذاب تتعذري

[السحاب البعيد]

تجاعيد ..
في وجه الزمن صاروا ..
تجاعيد ..
رماهم حزنهم اوراق ..
خريف وعاث بالعشّاق ..
عطاهم الأمل لحظات ..
ورسم أوقات الآلام ..
وللذكرى مواعيد ..
وتجاعيد ..
في وجه الزمن صاروا ..
تجاعيد ..
جروح تؤلم الإيلام ..
عذاب يضج باستفهام ..
متى قد كانت الدنيا مع العاشق ؟
متى قد كانت أعظم خاتمة للحب ..
ما هي افراق .. !!
هذا طبعها الأيام ..
كذوبة كانت الأحلام ..
بالتأكيد..!

تفاؤل زاد في الإغراق
وصدّق بهجته عشاق
خذلهم .. بدّل ضحكهم تنهيد ..
وتجاعيد ..
في وجه الزمن صاروا ..
تجاعيد

[السحاب البعيد]

يااللي قريتوني شعر ..
وشفتوا ملامح حبها ..
بين المعاني والحروف ..
يااللي عرفتوني صبر ..
وفراق .. وجروح .. وحزن ..
وظروف خانتها الظروف..
تخيلوا..!!
إن القصيد إللي كتبت ..
كل القصيد ..
أصبح كذب ..
تخيلوا..!!
أصدق إحساس فـ زماني ..
يصبح كذب ..
تخيلوا..!!
إني ماكنت الوحيد في قلبها ..
تخيلوا ..!! إني الوحيد ..
إللي أبد ..
ما قد سكن في قلبها ..!!
والغريب .. أحبها .. إلى هلحين ..
أحبها..
تخيلوا ..!!
ما ودي جراحي تطيب ..
لأنها الشيء الوحيد ..
إللي بقالي منها .. تخيلوا..!!

[السحاب البعيد]

تدرين وادري بنفترق
تدرين قلبي بيحترق
حنا اتفقنا في كل شي الا الزمن
عيى الزمن لا نتفق
ولاتزعلي لو نفترق
قلبك خلي
وقلبي انا اللي بيحترق

ياوردة في كل الفصول
يافرح عيّى لايطول
قولي واقول
ان كان عندك لي حلول
يافرحة القلب الحزين
الوقت يمر ..
ومالك عذر
كانك تبين ننسى العمر ..
ننسى السنين
وانذوب في حب وحنين
تدرين وش سر الحكاية
الوقت يمر .. ولكل شي لابد نهاية
وحنا قربنا من النهاية
ومالك عذر
يابسمة الثغر الخجول
ان كان عندك لي حلول
وان كان ودك نتفق
والا ترانا بنفترق
ولاتزعلي لو نفترق
قلبك خلي
وقلبي انا اللي بيحترق

ياحب .. يادنيا جديدة
يا احلى ابيات القصيدة
ان كان جرحي ما كفى
انزفلك جروح ٍ جديدة
وان كان شعري ماوفى
انسى الحكي وانسى القصيدة
يا احلى ايام العمر
كثر الحكي وش بيفيد
ومابقى عندي صبر
والجرح في قلبي يزيد
مالك عذر
يابسمة الثغر الخجول
ما اظن عندك لي حلول
وما اظن ودك نتفق
واحنا ترانا بنفترق
ولاتزعلي لو نفترق
قلبك خلي
وقلبي انا اللي بيحترق

[السحاب البعيد]

تعالي مابقى حولي .. سوى ظلي وبُعدك
بَعدك ألهب أيامي أنا قيض الملل
في بُعدك ضاع من ليلي الدفى والأمل
غدت متشابها الأيام .. تلاشى النوم والأحلام
أنا لحالي .. تعالي

تعالي .. مالقيت أصحاب
يحلف لك .. أنين الباب
انه مابقى حولي .. سوى ظلي وبُعدك

ماغدى للشمس معنى .. من تركتي ..
سوى القيض
وماغدى لليل معنى .. من هجرتي ..
الا الكدر والغيض
وماغدى للأجوبة في خاطري .. الا سؤال !
ليه .. ليـــــــــه ؟!

يالأمان اللي أبيه ..
في غيبتك .. مابه ربيع و ورد
يالأمان اللي أبيه ..
في غيبتك مافي العمر الا الشتا والبرد

من رحلتي .. مابقى في مسمعي الا بُكى الريح
ومابقابي من البُكى .. سوى قلب ٍ جريح
ومابقى حولي أحد يسمع سؤالي ..
من فيني يبالي ؟؟؟
من غيرك في بالي ؟؟

تعالي .. مالقيت أصحاب
يحلف لك .. أنين الباب
انه مابقى حولي .. سوى ظلي وبعدك

تعالي ... تعالي
ضاعت الأحلام ..
وماظني بلاقيها لحالي ..
تعالي .. نبعد الألام من حولك .. وحولي
تعالي ..

لجل حربي مع الغربة .. مع الوحدة ..
أبيلي سلاح حبك ..
لجل حربي مع اللي جاي
بلاقي قوتي في ضعفك
لجل حربي مع نفسي ..
أبيلي سلاح منك
أبيك انتي .. تعالي
أبيك انتي .. تعالي

باكر أجمل .. من خيالك
أو خيالي

تعالي .. وان لقيت أصحاب ..
مايسكت أنيين الباب ..
الا لو لقى حولي دفى حبي وحبك
تعالي

[السحاب البعيد]

نحكيلك أجمل حكاية ..

عن قصة حب وقلبين

صارت بك دنياهم أجمل .. يا أغلى من ضيّ العين

جيتي وصرتي انتي الأبدا .. انتي الدنيا والأيام

انتي الحاضر .. انتي باكر ..

انتي العذب من الأحلام

ربي يخلي هذي الضحكة ..

تملا عمرك فرحة ونور

ربي يخلي .. ربي يسلّم

ويحميكِ من كل شرور



بكرة لما الحلوة تكبر ..

والقامة تطّول شبرين ..

لما تمسك قلم ودفتر ..

وتدرس علم وعربي ودين

ولما تكبر .. اكثر واكثر

ويتمّم ربي بالخير

ولما انشوف الأم الحلوة ..

تحكي حكاية عن قلبين

[السحاب البعيد]

هو فيه مثلك .. ياللي الحسن ظلك
ليه العطر ؟!
وانتي انفاسك دخون
وليه الكحل
وانتي ماغيرك عيون
وليه تفكيرك يكون
انك تكوني دايم اجمل
انتي اجمل
من جمالك
من دلالك
من خيالك
ياللي كل افراح قلبي والحزن
في المسافة بين فرقاك ووصالك
وليه يالقلب الحنون
تاخذك فيني الظنون
ضيعتي عدلك .. هو فيه مثلك .. ؟!
انتي ماغيرك عيون
وانا احبك .. وانتي انفاسك دخون
ياللي احبك .. ليه احبك ؟
او ليه ماحبك .. ؟!
وانتي علـّمتيني ان الحب كله اسئلة ما تنتهي
ليه ما احبك .. ؟!
وانتي علـّمتيني ان الحب لا غدا لمثلك .. ابد ماينتهي
ياللي علـّمتك عذابي والهجر .. ليه ما احبك ؟!
ياللي علـّمتك تكوني ..في ضعف ضعفك .. اقوى مني
يا انتي ضحكاتك تغني .. وابتساماتك شعر
يا انتي ضحكاتك تغني .. وكل ما شفتك اصر
انك اجمل من جمالك .. من خيالك .. من دلالك
على حبك انا .. بقفل ابوابي
وبطيوفك انا.. بسقي اهدابي
يا انتي .. يا انتي احبابي
تصدقين .. تصدقين .. صدقي
قلبي لكي وحدك . .صدقي
ماقوى على بعدك دقايق .. بس دقايق
ياظلي .. يا داري
يا اجمل ..افكاري ..
تظلميني لوتقولي اني عاشق .. بس عاشق !!
ياللي وحدك تسمعي صمتي وكلامي
ياللي ضيك ..اتعب همومي وظلامي ..
صدقي اللي في قلبي لك ِ ..
اكبر من افكار القصايد والحكي
تصدقي انك اجمل في عيوني من جمالك من خيالك من دلالك
لا يالقلب الحنون
لا تاخذك فيني الظنون

[السحاب البعيد]

رحل اشتاق لجراحه
رحل
اشتاق لجراحي ... رحل
يحق له طيبتي ماتحتمل
قليلة في وقت الهموم
ما كنت اعاتب أو ألوم
يحق له ما يحتمل .. هذا الملل
اسدلت أيامي لعناده
حبيته في قربه .. وبعاده
متعبه هذي السعادة
رحل اشتاق لجراحه
رحل

[السحاب البعيد]

إنه أمامي .. العاشق الأصدق
في صمته المُدوي .. يبُثني شكواه
إنه يحب .. وحبه في هذه الدنيا
هو الأصدق
إنه أمامي .. يا لها من نظرةٍ حزينة
تحجب النهار .. تطل من عينيه
يا لها من وجنةٍ في دمعته
يقرأ في ملامحها الضياع
كأنها بحّار قد ا ُنسي العوم
ومن حوله تنهد الموج
ولا يرى مرساه
إنه أمامي ساءت في طباعه .. الطباع
لا يقبل اللوم .. يبكي على ليلاه
إنه أمامي يا لها من قصةٍ حزينة
تطل من عينيه
تطل من عينه تلك .. سنينه العجاف
والذكرى
وتلك التي أحبها .. سنين
تلك التي رمت به في البحر
ومع غيره ركبت سفينة
وتركت له المجداف للذكرى
أحمق
يا له من أحمق هذا الذي أمامي
العاشق الأصدق
لها هذه الرسالة
لمن علمته الصبر والغضب
لها لعلها تلقى من الإحساس ما يكفي
لكي ترثي حاله
لها لعلها تعلم إنه إن أدبرت
أو أقبلت هالكٌ .. هالكٌ
لا محالة
لمن علمته الصبر كتبت هذه الرسالة
كتبتها ألقيتها في ماء هذا الغاضب الأزرق
في البحر
كتبتها كي أنقذ الأصدق
هذا الذي أمامي العاشق الأصدق
كتبت في الرسالة .. تحياتي حبيبته سلامي
إنه أمامي .. له من المتاعب ما يكفي لكي يُعشق
فجرحيه بأن تريحيها .. له روحٌ أبت إلا على يديك أن تـُزهق
فقتليه بالرحيل .. أو تعالي وأزهقيها
لمن يحب كتبت هذه الرسالة
فعلت ما علي كتبتها .. ألقيتها
في ماء هذا الغاصب الأزرق
في البحر
كتبتها كي أنقذ الأصدق
هذا الذي أمامي العاشق الأصدق
يا صاحب لا اعرفه في الشاطئ الآخر
لربما ستلقى ما كتبت
لربما ستقرأ الرسالة
اقرأ من الأخر .. إن كنت تعرف من يحب
خذها لها .. وقل لها إن الذي أمامي
لا.. لا.. لا
يا صاحبا ً لا اعرفه مزّق الرسالة
مزق الرسالة واضحك على المأساة
اضحك على المأساة
عرفت من أمامي .. إنها المرآة

[السحاب البعيد]

سألتها ..
لية البحر ساكن عيونك ؟!
جاوبتني .. للغرق
سألتها ..
ليه السواد اللي في عيونك ؟!
جاوبتني .. للأرق
سألتها ..
ليه الخدود ؟
قالت .. عبق
سألتها ..
هي رقتك مثل النسايم والورود ؟!
قالتلي .. لا .. يمكن أرق
سألتها ..
عن حسنها كنّه يقول : ما للشعر فيني حدود؟!
قالت .. صدق
سألتها ..
يا اغلى الأنام .. وشهو الغرام ؟!
قالتلي .. انك ماتنام .. وأوهام .. وتنتظر شمس اللقا
وماتجي شمس اللقا
مشوار مايعرف وصول .. ولحظة بها كل الفصول
وقلب واحد يحترق .. وبعض الصدق
وقتٍ عصيب يتبعه وقتٍ عصيب
وليل يتعدى الصباح ..
وجراح تدمى لو تطيب
وفي الأخير ..
خل عن خل افترق
في الأخير .. كل النهايات الفراق
مافيه فرص ..
مافيه نهايات بلقا .. إلا في خيالات القصص
سألتها ..
وشهو الوفا ؟!
قالت .. كفى ..
النور من ضيي اختفى
والليل في عيوني غفى
اترك كثير الأسئلة ..
اسأل عن عيوني وكفى
اسألني .. ليه البحر ساكن عيونك ..
ليه السواد اللي في عيونك
سألتها ..
جاوبتني .. للغرق .. للأرق
سألتها عن حسنها كنه يقول : ما للشعر فيني حدود ؟!
قالت .. صدق

[السحاب البعيد]

بيني وبينك سبعة ارقام وجفا
عندي بقايا جرح وعندك بقايا وفا
لاجزا الله هالدنيا خير
في كل لحظة طبع غير
ياللي جفاك طوّل
ترى المغيب اقبل
وما عاد به شي ٍ نخافه
لامن غدت كل المسافه بيني وبينك سبعة ارقام
سبعة ارقام وجفا

بيني وبينك كان شي ٍ يسمى حب
كنا بنقطع به درب ٍ طويل ٍ صعب
فيها الحسد والخوف
فيها العذول اللي يستمع بالشوووف
فيها الرجوع اصعب من النسيان
فيها الصديق اقسى من الانسان لامن جرح انسان
ياللي احبك غصب
الدرب ماله درب
وكل شي صرنا نخافه
دام انها كل المسافه .. بيني وبينك
سبعة ارقام وجفا

ياللي ضيعتي الوفا
اليوم ضيعني الوفا !
اقبلي مني الجفا .. واقبلي عمري اللي ضاع
وارضي لي بـ الهم رفيق
ولا لمحتي مركبي في بحر حبك غريق ..
ابعدي .. لاتضعفي .. لا تمدي لي الشراع
ياللي قتلتي كل شي
ما ابغى منك الا شي
حققي لي اللي ابي واقبلي مني الوداع
ولاذكرتي ما مضى ... اكتبي سر الضيااع
سبعة ارقام .... و دفا ,,,

[السحاب البعيد]

شبية الريح
وش باقي من الآلام
والتجريح
وش باقي من الأحلام
وش باقي من الأوهام
غير اني .. الاقي في هجيرك فيّ
الاقي في ظلامك ضيّ
واوقد شمعتي في الريح
شبية الريح
اذا تسمح بغيب شوي
ابجمع همي الباقي
وادفن صبري الذابل في أوراقي
و برجع لك اذا باقي بنفسك شي

شبية الريح
أنا مقدر أكدر صفوك العاصف
شبية الريح
أنا من لي سوى إحساسك الجارف
بقايا زيف أشواقي
سما أمطار أحداقي
شبية الريح وش باقي
ابي أعرف
متى تسكن رياحك
وابي أعرف
غرورك هو متى يطلق سراحك
وابي أعرف
متى تعصف
متى تعطف
متى تنزف جراحك
وابي أعرف
إذا باقي في بحرك موج اكسر فيه مجدافي
وابي أعرف
إذا باقي في همك هم ماشالته أكتافي
وابي أعرف
إذا باقي في هالدنيا حزن مامرني واستوطن أطرافي
وابي أعرف
إذا باقي من المعجز في هالدنيا
سوى العنقاء
والا الغول
والا خلك الوافي
بقايا زيف أشواقي
سما أمطار أحداقي
شبية الريح وش باقي ؟!

سنيني يم
وقلبي المركب المتعب وانت الريح
مجاديفي عذاب وهم
وزادي الوجد والتبريح
وصبري صبر بحّارة
بغوا في اليم محّارة
غشاهم موج كان من الغضب أغضب
وكانوا للهلاك أقرب
لولا كثروا التسبيح
شبية الريح
حبيبي الأصدق الأكذب
عجزت اوصل شواطي طبعك الأعذب
تعبت أنطر في وسط العاصفة
قلب وشعور وعاطفة
تعبت أجمع ألم كل الموادع
في المواني وأحضن أطيافك
تعبت السهد في ليل الشوارع
والثواني تنطر انصافك
تعبت الظلم واجحافك
شبية الريح
أنا ودي أكدر صفوك العاصف
شبية الريح
أنا كني نسيت إحساسك الجارف
بقايا زيف أشواقي
سما أمطار أحداقي
شبية الريح
كيف أسألك : وش باقي ؟
وأنا الباقي من إحساسي
ذرته الريح

[السحاب البعيد]

ياللي تحبيني شهر ..
ثم ٍ تجافيني شهر
ثم ٍ تحنيلي شهر .. وتفكري كيف الرجوع كذا شهر
وترجعيلي في شهر ..
ماقد خطر في خاطرك .. ان السنة اثنعشر شهر ؟!
وقتي معك نصفه هموم
ونصفه الباقي اسى .. ولو طبعك القاسي نسى
وبالصدفة جاء مرة صباح .. وكلمة منك فرحتني
لابد ما همس الجراح .. تسمعيني في المسا
ولو تعتب جروحي عليك .. وتشتكي منك إليك
بترجعي تحبي شهر .. ثم ٍ تجافيني شهر
ثم ٍ تحنيلي شهر .. وتفكري كيف الرجوع كذا شهر
وترجعيلي في شهر ..
ولا يجي في خاطرك ان السنة اثنعشر شهر

اعذريني لو اقول .. حبك نسى معنى الفرح
اعذريني لو اقول .. وشلون يذكرنا الفرح ؟!
مادام اذا كنتي قريبه .. كل تفكيري يكون ..
بُعدك متى ؟! .. وإلى بعتي ابلا سبب
الاكيد بترجعي .. بس الأكيد هذا متى ؟!
ولو تعب مني الصبر .. وملّ من صبري العذول
وقلت ياناس اسألوها .. الحب هو كله هجر ؟!
ردك يجيني في شهر ..
قالوا تقول :
" ماينتظر .. بس يشتكي !
يصبر عليّ .. ترى السنة اثنعشر شهر " ؟!

[السحاب البعيد]

قالت احبك
واحضنتي ثم ٍ قالت من انت ؟؟
وضحكت .. ثم ٍ بكت
ثم ٍ حكت .. ثم ٍ سكتت
ثم ٍ قالت لي من انت !!

اللي جرى .. ماهو غريب
الزمن فعله .. عجيب
نسّاها اسمي ..
نسّاها حبي ..
نسّاها دمعي ..
في يوم انا ..
في احضانها طفل وحبيب !!

ياهي جرحتني .. يوم نكرتني
حاولت اداري عبرتي .. بس ماقويت
خانتي دموعي .. وبكيت
وبعدت عنها واتبعتني وامسكت يدي
واحضنتي ومسحت دمعتي من فوق خدي
رجعت البسمه لشفاي
نسيت انا همّي وشقاي
صرخت للدرب الطويل
لا مانستني .. مستحيل
الزمن او اي شي ..
يقدر يقسيها علي
يقدر ينسيها هواي
وفجاءه سكتت
ثم ٍ ضحكت
ثم ٍ قالت لي من انت ؟

[السحاب البعيد]

قد الحروف
قد الحروف اللي في اسامي العاشقين بحبك
قد الثواني
والدقايق والسنين ،، بحبك
قد الهموم اللي في قلوب البشر
قد العيون اللي كحلها السهر
قد ما ليلي اشتكى من نار حبك ،،،
قد ما ليلي حكى عن طول بعدك

ليه القمر غالي عليا ؟؟
يمكن عشان في نوره وبعده في حاجه منك
ليه الشتاء ،،، في قلبي حزين ؟؟
يمكن عشان برضه بقساوته ،،، في حاجه منك
ليه السحاب بعشق بياضه ؟؟
يمكن عشان زي قلبي ،،، في قربي منك
ليه المطر ،، بيصعب عليا ؟؟
يمكن عشان يشبه دموعي ،،،، في بعدي عنك
ليه لما تبعد .... عن عنيا ،، بخاف عليك ،،، وبرضه منك
ليه لما اشوف في السماء نجوم كتير ،،، منها بغير ؟؟
يمكن عشان قد السماء وقد النجوم ،،، بحبك

[السحاب البعيد]

مُذهلة .. !
ماهي بس قصة حسن ...
رغم ان الحسن فيها بحد ذاته .. مشكلة

مُذهلة ..
كل شي فيها طبيعي .. ومو طبيعي
أجمل من الأخيلة
طيبها .. قسوة جفاها ..
ضحكها .. هيبة بكاها ..
روحها .. حدة ذكاها ..
تملأك بالأسئلة ..
مُذهلة ..

مُذهلة ..
تملأك بالأسئلة ..
هي ممكنة والا محال ..؟!
هي أمر واقع .. أو خيال ؟!
هو سهلها صعب المنال .. ؟
أو صعبها تستسهله !

مُذهلة ..
تملأك بالأسئلة ..
ليه كل معجز مر هذا الكون .. فيها له صلة ؟؟
ليه كل شي فيها تظن انك تعرفه .. تجهله !؟
ليه كل (لا معقول) فيها ورغم هذا تعقله !؟
طيبها .. قسوة جفاها ..
ضحكها .. هيبة بكاها ..
روحها .. حدة ذكاها ..
تملأك بالأسئلة ..
مُذهلة ..

يا بدايات المحبة ..
يا نهايات الوله ..
كيف قلبي ما احبه ؟
وانتي قلبك صار له !
يا أعذب من الأمنيات ..
يا عالم من الأغنيات ..
يا أجمل الشعر البديع ..
من آخره لين أوله ..
ما راودتك الاسئلة ؟!
ليه عمري ما لقى لبرده دفى ..
الا دفاك ِ !
ليه قلبي ما بدقاته عزف لحد ٍ ..
سواك ِ !
ليه أنا عيني تشوف وماتشوف ..
الا بهاك ِ !

يا أجمل من الأخيلة ..
هذا جواب الأسئلة ..
كي تكوني من حنيني ..
وبس فيني .. ومو بدوني مُذهلة

[السحاب البعيد]

قالت لي مليت .. ودي بحد غيرك
جمّع جروحك .. لمّلم مشاويرك
واذا قضى صبرك .. جّرب صبر غيرك
لو اشغلك وعذبك طيفي .. ابكي
واذا بكيت اكتب بدمعك شعر .. اشكي لمراسيلك
وبوعدك اذا صرخ جرحك ونادى .. دمعتي تنزل عليك
بضحك على ايامي معك .. واخذ على غدري عهد مايخلص لغيرك
اعذرني .. مليت

ماتبيني .. ملّت الصدق المشاعر ..
يانور ايامي وسنيني اللي مضت
يالظلام اللي بيديني ..
مابقى فيني بقايا اتركيني
سل الحزن لغدرك خناجر .. ومالقاني فيني
وجرحي نادى .. يامحاجر الدمع مايكفيني
ضاعت بداياتي .. بقيت نهاياتي .. واسأل اجاباتي ..
هو أنا اخطيت ؟!
هو بقى في اللي بيجي ياليت .. ؟1
ماتت اجاباتي
قالتلي .. مليت

يا اكثر جروحي الاخيرة ..
لو عرفتي اليوم قلبي ودعك
يا آخر جروحي الكثيرة ..
ماعرفتي اليوم ما عاد اذكرك
وما اذكر من اللي مضى .. الا غرامك والفراق
و بعض اللقاء والإشتياق ..
وكل الاحاسيس الصغيرة ..
يابرد عمري و يا هجيره .. تخطين لو يخطر في بالك
انك في بالي كل دقيقة ..
وانك خيالي والحقيقة
واني احبك مهما كنتي ..
يابرد عمري وزمهريرة
ان كان قلتي اني فقدتك .. ماصدقتي
وان كان قلتي مانسيتك .. ماصدقتي
لو عرفتي مااذكر من اللي مضالي الا انتي
وما اذكر من اللي مضى الا انتي
وما اذكر الا اني بكيت
وفي ليلة مافيها وفاء .. قلتيلي مليت
يا انتي اخر أولي ..
لاتصدقي اني نسيت !!

[السحاب البعيد]

وش تبين ؟!
تجرحي ؟! ..
افرحي .. مابقى مني أنا غير الجراح
وش تبين ؟!
تعذبي ؟! ..
ابشري .. الفرح من دنيني ولىَ وراح
والحين سويتي كل اللي تبين ..
اتركيني دمعة في خد الجراح ،،،

الثواني عمر .. والفرقا دهر
والحقيقة كذب .. والدنيا حذر
حبك انتي شمس .. ناسيها الغروب
بالحيل تحرقني .. ولا منها هروب
وش تبين ؟! .. اشكي !؟
والا تبين ابكي !؟
ياللي الملل طبعك ،،
طبعك نسى همي ،،

كانك تبين الكل يدري بقسوتك ,,
عليّ أنا سمي ,,
بَعاهدك أني أقول انك قتلتيني ,,
و اكتبت على صدر السما ..
أصدق قصيدة حزن ,,
واني كثر عشقي لكِ ..كنتي تجافيني
و ان شككوا في ضعفي فيك وفي قسوتك ,,
كونك جرحتيني ,,
أبوعدك أني .. أسقي العِدا دمي

[السحاب البعيد]

يا عذبة الخد ياللي اشتاك الصد
اليوم عيدك ..
لا .. انتي عيد اليوم
ياللي عذابي فيك اكثر من سنينك
تصدقي اني في عيدك مادري وش اهديك
اتعبني الأرق باهديك شي مثلك
قالوا لي ورد واتعبني الأرق
قالوا اكيد أرق شي الورد
قلت الاكيد ان انتي أرق
في حل وحيد ..
لو تسمحي لي فيه ..
اهديك انا للورد

[السحاب البعيد]

ياللي خذيتي الشمس
لو تتركي لليل بعض النور
ياللي جرحتي أمس
ماعاشك إلا يوم .. وودّه يكون شهور
يا أغلى من دمعي.. واقرب لي من إحساس
ياشوفي يا سمعي
لو تتركي للناس بعض الدفا والنور
دامك خذيتي الشمس
داوي جروح الليل.. واهدي الحزن بسمه
لا تجرحين الصبح.. وتخفي الحسن عنه
مدي جسور الهمس
قولي أحبك حيل..
لاجل امحي أحزاني
واحيا فـ زمن ثاني
حيث الزمن غيرك .. فيه الفرح مهجور
يا أغلى من دمعي
واقرب لي من إحساس
يا شوفي يا سمعي
لو تتركي للناس بعض الدفا والنور
دامك خذيتي الشمس
ياللي الحسن دربك وموت الفرح دمعك
ان كان مابه شمس
لو تظهري خدك أو همس من عطرك
علّه يدفي الليل
الليل عذّبه الجفا والناس في برد وظلام
و منك الدفا يبغا الدفا
والنوم وده لو ينام
ياعذبة الضحكه كفا
كل الفصول صارت شتاء .. من يوم اخذتي الشمس

[السحاب البعيد]

يسعد صباحك .. يا حبيبي
حالي طيب
كل شي مثل اللي كان
المدامع .. والمواجع ..
والأمان اللي اختفى لحظة غيابك
والليالي اللي مضت .. مثل الليالي اللي مضت
الهم عازف .. والدمع نازف ..
والعمر في غيبتك حاير وخايف
حتى جراحك وسط قلبي مثل ماهي
وفي شفاهي باقيٍ نفس الكلام اللي بقى .. آخر لقا
مثل منتَ يا حبيب الروح شايف
كل شي مثل اللي كان
وحالي طيب
يسعد صباحك .. يا حبيبي

هذا انت
كل ما ضاقتبي الدنيا تغيب ...
وكل ما ضاقتبك الدنيا تجيني
هذا انت
ان كساك الهم صرت أوفى حبيب
وان نساك الهم تتباهى بـ أنيني
مثل منت .. دايم تجي فـ وقتك حبيبي
بعد ما وقتك يروح
يا آخر دموعي وشجوني ..
وأول إحساسي جروح
ما بقالي من عذابي يا حبيبي .. الا انت
وهذا انت يا حبيب الروح شايف ..
كل شي مثل اللي كان
وحالي طيب
يسعد صباحك .. يا حبيبي

هذا ضي الصبح .. او هو بعض نورك ؟!
هذا همس الورد .. او دافي شعورك ؟!
منهو مثلك في غرورك ؟!
جيت متأكد بسامح ..
راسم الطيبة ملامح
ماهو بدري !! ..
انت تدري
ما قتلني غيابك اكثر من حضورك
ايه كان العمر داكن ..
ايه كان الهم ساكن .. وقتي بعدك
بس أنا يا ضيّ عمري ..
كنت عودت الأماكن تألف بعادك وصدك
ياللي ما يرضيني ضعفك ..
ما ادري انثر فوق كتفك أغلى دمعي .. او أردك