قال سمّار المعارف......لاي واحد

[سمّار]

ياسلامي والمثايل عند من يبني المثال=
قال سمّار المعارف ريت اهلها يحتصون=
ما اندروا بحر الهماج ولا خذوا منْ مرّ ماه=
بعض الاسماء انتاجها من روعته تحتث ايابي=
غير ما يفضون لي وانا فلا اجرى ادعي بها=

[محمد الحسني]

بدع راااائع



مشكوووور سمار ننتظر من يكمل القصيده ليكتمل جمالها

[إبن الجنوب]

صح لسانك ياسمار وأسمح لي بالرد واعذرني على القصور...

الرد:إبن الجنوب=
*=
أهل البلجيك ياسمّار يرمون المثال=
وأمّنوا فيض الديار من المخالف تحت صون=
حظّهم مرفوع والاهداف طاحت من رماه=
أترك اللي يأخذ السّكين من تحت الثيابي=
ماابغي أعلّق على السّكين واجرد عيبها=

[نديم القوااافي]

طيب طيب يا سمار صح لسانك ولسان ابن الجنوب وليتكم تقبلوني انا وابو طلال طرف ثاني وخلوها قارعه

بدع : نديم القوااافي=
0=
مرحبا بك وانت مكسب للرجال وراس مال=
ليت ربعك ذا تسميهم يجون وينقزون=
في رباع العز تلقون القصايد منعماه=
وابنسجل من لفا في منتدانا والغيابي=
واللحى تتحمل اللي جاي من شاريبها=

[علي السبيَه]

صحت السنتكم وابدانكم يا ربعي ويشرفني مجاراة شعار كبار امثالكم
واشكرك ياابو سند على اختياري وترى معرفتي على قد الحال


الرد:علي السبيه=
.=
راس يثبت في المواقف يانديم وراس مال=
ويل منهم وسط موج البحرالاحمر ينقزون=
وافتكر فاللي انتزى مابين موجه من عماه=
مايمدي خفر السواحل ينقذون اللي غيابي=
ما نجا منها غريق ولا روت شاريبها=

[عاشق المها]

الله ...الله

محاوره جميله وتلفت الإنتباه ...متابعين يالنشامى تكفون واصلوا وأمتعونا لا عدمناكم.

[عبدالله اللبيدي]

سمّار

ابن الجنوب

نديم القوافي

علي السبيه

صحت الألسن وتعافت الأبدان شعار كبار وكلام كبير عسى الله يوفقكم

[ربيع الفاضل]

ابدعتم الجميع يعطيكم العافية

[شايب العشرين]

علم علم
الله يجاور بنا مسلمين
موفقين واصلو

[سمّار]

ارحبوا ياحُبّانيه كلكم
اتشرف بمشاركتكم جميع
المعلم ابن الجنوب
والاستاذ القدير نديم القوافي
وشيخ القصيد السبيه

واشكر كل من تداخل معنا كلٌ باسمه وعساهم يشرفونا بتواجدهم ومتابعتهم



هكذا ربي خلقنا شُمّ انوف ابكل حال=
الشيّم في روسنا وامداحنا نصب العيون=
سجّل ياتاريخ واحفظ وانتم ارووا يارواه=
انّها ما هي سوالف وإلا اساطيرٌ كذابي=
من نهولٌ صافيه ما كدّر اعواذيبها =

[إبن الجنوب]

يمكن ردودي ماتكون على مافي خاطرك ياسمّار لكن تحمّلني وانا رفيقك...

الرد:إبن الجنوب=
*=
العرب لا يحسبون إن السيول بكلّ حال=
الله يرزقنا بجود الغيث من نصب العيون=
حاشرن في دقلته للوادي الضامي رواه=
لا تجي بي من طريق السيل وابعد من كذا بي=
روحي ماتقوى فلا تتعمّد اعواذيبها=

[سمّار]

الله يرحم االحال لاعاد ردك ما يعجبني من هو اللي ابيعجبني رده
تستاهل لثمة على جبينك يابطل ....تحياتي وامنياتي لك بالتوفيق

[شاعر بالمفضل]

سمار
ابن الجنوب
نديم القوافي
علي السبيه


صحت الالسن وتعافت الابدان

واصلوا علمكم واهي قارعه من العيار الثقيل

[نديم القوااافي]

طيب طيب صحت السنتكم يا اخوان والف شكر لكل من مر وشارك كل واحد باسمه .


بدع : نديم القوااافي=
0=
وانحن نشرب دم الاعدا مثل كيفً في دلال=
تقصر الاعمار يوم انحن نجيها مخيّلون=
هذا قول الحق ما فيها سوالف واشتباه=
انت تقرا من كتابك واني اقرا من كتابي=
كل كلمه في قصيده بكتب امرادي بهااا=

[علي السبيَه]

الرد:علي السبيه=
.=
المعارك ماتجي للي تربى في دلال=
كلن يحضر للسبق والاكثريه امخيلون=
مدري اثبّت كلامك واعتمد والا اشتباه=
ابعد ياراع المشاكل عاد روحي منك تابي=
مانبي هرجه تغيض الناس وامرادي بها=

[ملك الليل999]

طيب طيب


سمّار
ابن الجنوب
نديم القوافي
علي السّبيه

صحت السنتكم والله يبيض وجوهكم
متابعين لاعدمناكم

[سمّار]

طيب طيب
ترى كسوة الشعار على اللبيدي


سمّار=
علّم انديم القوافي وانصحه يابو طلال=
ربما من سوء فهمه يحسبنّا اعلى جنون=
ليت بدّأ وكّد آخرعلمنا من مبتداه=
ما لفيت الا محبة سيف مصقولٌ وشابي=
قد تركنا المال في ديرة يفئ احطيبها=

[إبن الجنوب]

طيب طيب مادام فيها كسوه فاللبيدي كفو ويقدر وانحن نستاهل...

الرد:إبن الجنوب=
*=
البشر من طبعهم يبدون مايابو طلال=
أشهد إن المنظر الطيب دواء واعلاج نون=
والمريض الله كتب شرّه ولا سبّبت داه=
واللذي من حقرته في كلّ مقعادن وشى بي=
علّموه إنّا مجالسنا يفيّح طيبها=

[عبدالله اللبيدي]

الكسوة من ساع ما سميتم أعطيتها نديم القوافي لكم كلكم أدري إنكم بتاجون بكلام يستحق الكسوه لكن أخاف إنه رغب فيها,هيا ابشروا بالعوض لا راحت العروس

صحت الألسن وتعافت الأبدان والله هنا كلام يطرب الله يعطيكم العافية

[الهجيــــر]

يا سلام يا سلام
كلام ينومس ويرفع الراس
واصلو وحنا متابعين

[نديم القوااافي]

صحة السنتكم يا ربعي وبيض الله وجوهكم .. وبالنسبه للكسوه هههههههه ترو اللبيدي استاذ في النحو والصرف .. جاب لكم تصريفه في جمله مفيده




نديم :القوااافي=
0=
يا جمل شد الحبل ذا دارجً وعلي محال=
وانتبه من طعنة الخنجر ترا الخنجر سنون=
النماره جتك ما يمديك لفه وانتباه=
الجمال اثنين ما تحسب وتذكر بنّصابي=
لنّ حتى البدو باعو المزرعه وجليبها=

[علي السبيَه]

اللبيدي يقول اعطاك الكسوه ياابو سند لكن تدري ابنقتسمها
انا وياك ولا حد يدري ورفاقتنا ابنشوف لهم صرفه


الرد:علي السبيه=
.=
المحال اللي يريد المستحيل اكبر محال=
لا يغر ابن ادمي طولة حياته والسنون=
اللي مايمديك ياسيدى تناله ون تباه=
وانا فيدي دمشقي بارع موثّق بنّصابي=
ما اقتنينا من موارد سوريه واجليبها=

[سمّار]

لنا الله انا وابن الجنوب ............ما يرزا بيت اللبيدي ما يضيع من بغاه

سمّار=
لا تعافا سوق الاسهم واستقر بعت الحلال=
واشترينا باسهمه لكن مدري اش تنصحون=
ياخبير السوق ليت انك بتفتي لي اش نباه=
كنى اعشى يحتري له ولعةٌ والا شهابي=
كم سوال ابخاطري لكن من بيجيبها=

[إبن الجنوب]

الرد:إبن الجنوب=
*=
ضيفنا يلقى الدّسم والذّبح في روس الحلال=
يلتقي ضيفه وكيفه عندنا وأمتن صحون=
مايخوّفنا معادينا بتفتيل اشنباه=
أحتمينا حدّنا في مامضى واللآش هابي=
ولدنا ماينقصر والكايده بيجي بها=

[نديم القوااافي]

بدع : نديم القوااافي=
0=
انحن ابعد مثلكم فينا الشهامه والنبال=
منحن ابضيفان غير انحن معاك مضيفون=
كان معكم شي خافي ف اكتباه ورّداه=
قد حمينا حدنا والريع وصفاح الجنابي=
والغشيم اللي رمانا رميته من جنبها=

[علي السبيَه]

الرد:علي السبيه=
.=
الدروع الواقيه من يخترقها باالنبال=
لا زدتم زدنا وحنّا للعلوم امضيفون=
والردي يقعد على جاله ولا فاده رداه=
عندنا حد السيوف الدمشقيه والجنابي=
وعندنا سوره نكتّف ماردين الجن بها=

[شايب العشرين]

وعندنا سوره نكتّف ماردين الجن بها

الله الله صح الله لسانك يابو طلال بدون قصور بالاخرين

[سمّار]

وش رايكم
ما نختم كلام الصالحين
الا بالصلاة على النبي

مشكورين جميع وحصلت البركه.....تشرفت بردود الاستاذ ابن الجنوب ومحاورة الاساتذه نديم القوافي والسبيه ...ومنهم نتعلم ونستفيد على امل اللقيا في محاورات قادمه
ما نختم كلام الصالحين
الا بالصلاة على النبي

[نديم القوااافي]

صلى الله على سيدنا محمد واله وصحبه اجمعين .. كان لي عضيم الشرف بمحاروة عمالقه امثالكم .الف شكر لكم ودمتم بود