((بوح قلب))

[أحمد مطر]

بعد طول غياب مرّ عليّ بقبحه وجماله وخيره وشرّه وبعد أن قلّ الأحبه الذين أبسط همومي بين أيديهم عدت (هنا) لأنثر من فيض شعوري بعض الأبيات التي أقلعت من مدارج قلبي المهموم وأتمنى أن تجد في قلوبكم مدارجاً تحط عليها بكلّ حبّ وتقدير.......



العيون اللي مسهـّرها عناها=
تسهر الليل الشقاوي بالغصيبه=
تكتحل في كلّ ليله بالظلامي =
والصباح يمرّ ماتسلى بشوفه=

طالت العلـّه وانا ماعرف دواها=
من سبايب جرح ماحصـّل طبيبه=
مايواسيني ولايقصر كلامي=
غير شوفة من تردّت به ظروفه=

والخيالات اللذي فكري بناها=
صار في بنيانها شكٍ وريبه=
يوم شفت اطلالها بعد الهدامي=
وش يفيد القلب لو كثـّر حسوفه=

كنّ علاّت القدر تبسط يداها=
أبتعد عنها وهي منـّي قريبه=
في كنانتها سهام ٍ من سهامي=
كلـّها باسمي ولا عنها نكوفه=

وأكثر الصرخات ماجاني صداها=
لو تعالى صوتها ماحد يجيبه=
كنـّي احيا كلّ عمري في منامي=
لاونيس ولامخاليق ٍ ولوفه=

آه ياصحرا معذّبني ضماها=
كلّ ساعه في متاهتها مصيبه=
خلفي احزان الزمن والموت امامي=
وين ماوجـّهت بانظاري تشوفه=

تنقضي ساعات واعمار ٍ وراها=
ياعجايب منك يادنيا عجيبه=
ورّدتني مثل ميراد الهيامي=
واصدرتني ماخذا قلبي شفوفه=


تحيااااااااااتي

[بحوور]

أحمد مطر لقد أمطرت المنتدى بقصيده مليئه بالحزن أخي عسى الله أن يفرج همك وتأكد بأن الهموم لا تدوم وما هي إلا سحابة وتنتهي
ما أجمل ما سطرت رغم نزف القلب فيه

[علي السبيَه]

رغم ماتحتويه هذه القصيده من معاني مؤلمه الا انّها
تحلّق في سماء الابداع وتعزف على اوتار الجمال
ومثل هذه القصايد تستحق القرائه ولمرات عديده
صح لسانك ياشيخ احمد انت شاعر مبدع بكل ماتعنيه الكلمه

[الهجيــــر]

رااااااااااااااااااائع يا أحمد
تكتب الشعر مره ويكتبك مرات
قرأتك كثيراً وسأقرك أكثر
رغم أنف الحزن

[أحمد مطر]

بحووور ..... علي السبيه ..... الهجير

((لاعطر بعد عروس))
ماأجمل ثنائكم وماأكرم نفوسكم الجياشة بالجمال .......

لكم كلّ الشكر والعرفان على هذا المرور العطري الرائع .........

تحياااااااتي

[بدوية]

صح لسانك والله لايهينك
قصيده جزله ووافيه
ابدعت
كل الشكر