@$خذنــــــــي بالاحســــــــــــان واغمـــــــد سيفـــــــك الصيرمـــــي$@

[إبن الجنوب]

ياصاحبي قبلك أيامي سنين وشهور=ساعاتها ماتمر وجوّها معتمي
تغيّر الحال سبحان العليم الغفور=بقدرته جل شأن الواحد المنعمي
صبرت والله يجازي كل قلب(ن)صبور=اللي بحكمه وعدله ينصف إبن آدمي
العام تحزن على صاحبك صمّ الصخور=واليوم يفرح له الغصن اللذي منتمي
تكفى دخيلك تجاوز لو تشوف القصور=أنا بشر وإن تعدّيت اعتذر واندمي
ملكتني وانتبه يأخذك حب الغرور=تراني اقطع يميني لو شكى معصمي
صحيح غيّرتني بدّلت حزني سرور=وارويت بستان شوق(ن)كان قبلك ضمي
مادام سلّمت لك قلبي وكلّ الشّعور=خذني بالاحسان واغمد سيفك الصيرمي
أغيب إذا غبت واحضر لا عزمت الحضور=انكان ماتدري انك سرت لي عالمي
والله اني اضحك معك يوم السوالف تدور=والى زعلت اعتبرني حاضر(ن)ميتمي
إن شاءالله إن السنين القادمه ماتبور=نشرب شهود العسل ونودّع العلقمي