عصات المتنحش مكسوره ههه ههه

[الشامان]

الليله في راسي حباً ماطحن اماطحنه المبدع والا ذريت به
نبغا نمزح شويه وناخذ من اوقات الاخيار قليل


البدع من الشامان=
*=
المبدع الليله انا باحط فيده كلبشات=
واريح المنتدى واريح الناس شره=
الناس تمسي وتصبح منه والقلب منجور=
وانا معي مطرق اليكسير والخيزراني=
وهو معه خنجراً فيده مكسر نصابه=

[الهجيــــر]

صح لساااانك يالشامان

وانت قلتها من البدايه

موفقين

[بديع زهران]

مخخ مافيهههههههههههههه صح الله لسانك يالشامان
وننتظر المبدع ليضيف ابداع .

[الشامان]

الله يسعدك يالهجير على الطاير ماعندك وقت
اشكرك على المتابعه والمرور المشرف

[الشامان]

بديع زهران الف شكر يالغالي على المرور المشرف والمتابعه
وابشرو انا باريحكم من المبدع
ان كان ماريحكم منيه ههه ههه
هنا فيه علوم وفيهمخخ مافيه مخ

[جار الله الخامس]

صح لسانك يالشامان على هذا البدع في انتظار المبدع والله مايقطع بطني الا التعليقات قبل القصيده لا عدم لاعدم تواجدكم يظفي لنا الفرح

[المبدع.]

الله يبهتك وهو ماقصّر عليك .. منين أنا أطحن حب الجن حليلنيه وكان ؟؟؟ هههه

الله يخارجنا منكم كل واحد يرمي من جهه هههه ههه ههههه

صح لسانك يالشامان ولي الشرف بالحضور وأقبلني بحصلي

ترى ماعد معي الا أتلحف وأرقد والله إني تعبت من القصايد..


الرد : الزيادي*=
**
تريّح الناس .. والملبوش في دهك لبشات=
والخاتمه والعلق حلّت على من تشرّه=
إن قال بيت المثل من يسر .. وإن قال من جور=
الله كم شاعرٌ يخطي وياخي زراني=
في خاطره ينصب البيت المكسّر نصابه=
**

[نديم القوااافي]

خخخخخخخخخخخخخخخخخخ يا الشامان انا لي يومين ادور صورة هيلكس تسحب شيول وما لقيت واليوم كاني اشوفها في هذا المتصفح والله اني اكتب وانا اضحك في غير عقلي ...(تراني امزح امزح الله يبيض وجهك خخخخخخخخخ عشان الكدمات تبان .>>>>>>>>>>>> امزح معك لا تضيق وانا اخوك

صح لسانك ملايين وصح لسان ابو جمعان

[الشامان]

صح لسانك يالمبدع ولو مانحبك مانقصد معك انت محبوب الجميع
واما انت يانديم القواطي هههه اوووفههه قصدي القوافي بعد لك في المقنص
الله يسعدكم واذا مافيه مزح ومرح ماتصلح المحاوره


البدع من الشامان=
*=
ماودي اتلحق العالم بسبه وغيبات=
والهرجه الحاليه في خاطري ماتمره=
والعظم مكسور والا يصبح العظم مجبور=
ماودي اعبث وبي يدعوني العوبثاني=
باميل الغرزه من راسي واشد العصابه=

[المبدع.]

الله الله ... صح لسانك ..


الرد : الزيادي*=
***
لي صاحبٌ قام يجزاني بهجرٌ وغيبات=
ويضيق لاقلت : وينك وش معك ماتمرّه=
يلعب بقلبي .. وأنا قلبي مقيّد ومجبور=
وشدّ ملعوبه الأول بملعوب ثاني=
مايثّر النصح فيه ... ولا تفيد العصا به=
**

[إبن الجنوب]

ياسلام ياسلام
الشامان صح لسانك وشد حيلك انا من جمهورك لايهمك كلام ابو سند ترى ودّه يحطمك...
المبدع:الله عليك ياشيخ (في دهك لبشات)الله يصحح لسانك ويعطيك العافيه ...إلآ ماقلت لي الثلاجه للحين ماخربت ههههه ...

[الشامان]

صح لسانك يازيادي وانا شكلي اتعبتك معاي لكن خذ البدع هذاوان كان ودك نستاوي خاف انه احسن


البدع من الشامان=
*=
ماودي اضحك مع اصحابي بضحكه وشيمات=
وانا اعرف الكون وامداره وبحره وبره=
تسمع نديب البواخر يوم تعبر وبابور=
بي تشرق الشمس بعد الفجر والليل داني=
قراصنة بحر قزوين البشر ماتهابه=

[المبدع.]

حبيب قلبي أبو سالم ..صح بدنك ولاهنت ، هذا من ذوقك ...

صح لسانك يالشامان ملاييييييين ... إن ودك كان تسوي معروف

لي ثلاث ايام وأنا أبدع وأرد تقول عليه كلفه هههه هههه ههه


الرد : الزيادي*=
***
كم من معاريف بين أهل الجمايل وشيمات=
أطلق سراح الزيادي من سجونك وبرّه=
بأضحك معك غير باجيب المطمّه وبا أبور=
كنت أحرز اهداف بيت الشعر والليلداني=
وأدسّ معنى القصايد .. وألبش أرماتها به=
***

[الشامان]

هذا اخربدع الليله كثر خيرك ماقصرت كملت وجملت
واشكر كل من تابعنا هنا وشرفنا بالحظور


البدع من الشامان=
*=
سلام مني وغيري مايقلي سلامات=
نقلت رجلي وفي درب العنا خذت عبره=
ماودي ابدل الكلمه في العلم واغيور=
ونسك ذاك الهواء الخلاب لماء نساني=
من بعد ذاك الجنا صدا وقفا التبابه=

[الشامان]

ابن الجنوب يعلم الله انكم كلكم ملى العين وشطرها وابو سند ادري انه يمزح معي
وانا كذالك ولابيننا الا الطيب والمذهب العريب
هههه ههههه
تصبحون على خير والحين باروح اتعشى ههه وارقدمفطــــــح

[المبدع.]

صح لسانك .. ابدااااع غير مستغرب


الرد : الزيادي*=
***
حسبي على الصاحب اللي مايقلي سلامات=
ياليتني حلت عنه ... وليتني خذت عبره=
ماكان عشت الليالي ضايق الصدر وغيور=
لكن توبه .. نويت أنساه لما نساني=
طويت أنا صفحة الماضي وقفّلت بابه=
***

[الشامان]

صح لسانك يالمبدع وفيت وكفيت والله لايهينك بدعت هذا الليله
واتمنى اني مايكون ثقلت عليك بهذ البدع اللي ماشي هيله
لكن انشا الله الجيات اكثر واحسن
اخوك الشامان

[ابوفطيس]

صح لسانك يالشامان ابدعت حقيقه
والمبدع الحقيقه انا ما اعرفه الاعبر
ماقرات له في هذا المنتدى لاكن شهادة حق شاعر داهيه داهيه

[عاشق المها]

محاوره جميله وفيها معاني راقيه ...

صحّت ألسنتكم يامبدعين ودمتم في سماء الإبداع متألقين .

[**ابو ماجد**]

الله الله
صحت الالسن وتعافت الابدان
كلام معتبر
بدوع ولا اروع وردود ماعليها كلام
تحياتي واحترامي

[شايب العشرين]

صحت الاللسنه وتعافت الابدان
الحقيقه ابداع منقطع النظير واللي يقراء ابيات الزيادي يمرض ويقول ليتني اموت
ابيات مدري منين تتخرجها حسبك الله وكان

[الشامان]

ابن فطيس الله يحييك ويحيي علمك وكلامك تاج على راسي
عاشق المها تسلم يالغالي واشكرك على المرور المشرف
ابو ماجد لك مني جزيل الشكر والتقدير يالغالي
شايب العشرين عشت وراسي يرتفع بقصايد المبدع وانت لك الود والاحترام ربي يسعد قلبك