سلام الله على شعب وحكومة وامـراء وأميـر=على جابر وابن عمه سعد والحفـل وضيوفـه
سلام من الصدور وبالجمهور معطـر تعطيـر=على صحن المحبه مع طلوع الفجـر مقطوفـه
تقطف من مهانيـع الغصـون ولا سقتهـا بيـر=سقتها الناشيات الممطـرات وجـات زخروفـه
تزخرفها فراشات النبـات وحـط فيهـا الطيـر=على اوتار النشيـد يـردد الالحـان معزوفـه
سعـودي يعبـر عـن مشاعـر دولتـه تعبيـر=من الشعب السعودي جاء يضم الـورد بكفوفـه
يشارك ليلـه الذكـرى بالاستقـلال والتحريـر=نحبك يا كويت ولك عـروس الشعـر مزفوفـه
نزف اسمى التهاني والنفـوس تعـود بالتذكيـر=تعيد الذاكـرة مـا تطـوي الأيـام ونشوفـه
تمر الاربعين العـام والعشـر السنيـن تسيـر=موثقـة الخطـى بالعـز والنامـوس محفوفـه
نهنيكـم باهـل دار بنعمتهـا ربيـت صغـيـر=ولا انساها ولا انسى فضل اخو مريم ومعروفه
صحيح الملح يقنى كل حـر ولا يبـي تفسيـر=نـروح ونلتفـت وقلوبنـا بالـدار مشغـوفـه
انا من نـاس تقلـط ماتهـاب وتحسـن التـدر=مواقفها ما هوب اليـوم قبـل سنيـن معروفـه
بطولات نسطرها على وضـح النقـا تسطيـر=صفحات الشرف مثل الدلال الصفـر مصفوفـه
سمعنا بالاذاعـة علـم طـاري والكـلام يثيـر=بعد ما صـرح القايـد شقيقـة نجـد مخطوفـه
تسابقنا ولبينـا النـدا واللـي يصيـر يصيـر=عوايدنا ولو راحـت علينـا غبـن وحسوفـه
تجهزنا وجهزنـا لبـاس الحـرب والتحضيـر=شـوي بنبـرة القـوات والاعتـاد مصروفـه
تقدمنـا بعـون الله وراس الخيـره التبكـيـر=مباشرة الهدف تردع هـوى الطمـاع وشفوفـه
طلايع قوةٍ صكت على الجبهة ضحى وعصيـر=تواليهـا بوايلهـا سـوى ماهيـب منصـوفـه
فهد فينا وعبد الله مثـل عنتـر ومثـل الزيـر=الياحـل الخطـر بحدودهـم تطابحـو جوفـه
فطاحله الملوك اللي تـدور المعركـه وتديـر=رحى التوجيه وتبرمج جهاز الحرب وصنوفـه
زعامتنا لها الصدر ولها القـدر ولهـا التأثيـر=الاصحاب القرار وهم جدار العـرب وسقوفـه
لنا في الملحمة حـق ووجـود ومرتبـة تقديـر=نهار تصبّح الجـاره وتفجـع كـل غطروفـه
حشدنـا مـا قعدنـا واتخذنـا موجـز التقريـر=وجازفنـا بحكـم تعـدل الغلطـات بسيـوفـه
دخلناهـا بضـرب النـار والتهليـل والتكبيـر=وركزنـا بهـا الرايـات والفزعـات مشيوفـه
صواريخ تساقط باالغضـب والطايـرات تغيـر=كرابيس الظلال بسابقـات الصـوت مقصوفـه
حصل رزق النسور وما بقي ياطابها الجنزيـر=على ارقاب العدا تمشي جيوش الحق مرصوفه
من الجيران والصدقان أمانه ما جـرى تقصيـر=وفوا بالواجبـات وخطـة العـدوان مكشوفـه
حماقات تصدرها البشر منهـا العقـول تحيـر=مهلـوس الزعامـة بـالأذى والشـر مكلوفـه
من المخرب تخرّب ما اكتمل في نهضة التطوير=وجدنا المنشـآت ومعظـم الحـارات منسوفـه
حرايب تشتعل وافعـال نكـرى مالهـا تبريـر=قريب الظهر قطعة ليل كن الشمـس مكسوفـه
طبايع تقشعر بهـا الجلـود ومبشـع التصويـر=تقـول ان الكويـت بفوهـة بركـان مقذوفـه
طعنّا جارنا من خلف طعنه مـا طعنهـا الغيـر=يميـن لطخـة بالخـزي والاجـرام منـدوفـه
تنجس من يصافحها واقول انجس من الخنزيـر=وعن بيض الايـادي بالشيـال السـود ملفوفـه
كويت العرب لا ترهب من الانـذار والتحذيـر=وراك البر صامد والسفن في البحـر مجدوفـه
هبت والله شوارب من غزاك وسبـب التدميـر=شوارب ما تصـون الجـار مطليـه ومنتوفـه
نظام ما يراعـي حـف جيـره طبـه التغييـر=يجي غيـره نظـام يستتـب الامـن بصفوفـه
على الكرسي غبي ومكابري ومغامري شريـر=ملا راسـه بنشـوة كبريـاه وطـق بالطوفـه
عمى ما يستشير ولا يشيـر ولا يطيـع مشيـر=وقع في فخ موت ومات من ذلـه ومـن خوفـه
كويت العرب يا بيت العرب ما حركك معصيـر=صفا جوّك وطاحت ريح اخو مره عاصوفـه
تحوّل للعراق وفـي سبـاق الذبـح والتهجيـر=دمر شعبٍ على الله يشتكـي بلـواه وظروفـه
يا كثر الرعب والارهاب في الاحزاب والتطهير=تفرس في الجرايم واصبحـت عـاده ومألوفـه
بساطوره يقطـع باللحـم متحضـنٍ لـه كيـر=يشبـه طاغيـه بغـداد فـي بغـداد وضعوفـه
كويت ارسي وبنّي واطمئني وانسـي التفكيـر=على شط الخليج مثبتـه مـا انتـي بمحذوفـه
تواعيده وتهديـده يمـر بهـا الهـوى وتطيـر=طموحاتـه ورغباتـه بخشـم الزنـد موقوفـه
هذا خبلٍ يمـرر لعبتـه مـن جعبتـه تمريـر=يبي يضحك على العالم وهو صـدام بوصوفـه
ما عاد الا يجيـب المتـر ويمتـر لنـا تمتييـر=يحسب ان الكويـت وخيـة العشـار والكوفـه
ما هي شيك يوقع في البنـوك وقابـل التجييـر=بلادٍ عنها الايـدي باشهـب البـارود مكفوفـه
عليها خارطـه مـا تقبـل التعديـل والتزويـر=ثلاث مية سنه من يمسـح التاريـخ وحروفـه
تبي ترقد على اليمنى وبامان ودونهـا الحجيـر=على صهوة جواده ناسف رمحه علـى كتوفـه
للراعي ما غدى ناقه ولا ضيّـع عقـال بعيـر=عيونه من وراها لو يحـوف القـوم وجفونـه
صباحيـة وقادتهـا الصبـاح قيـادة التعمـيـر=بنوهـا واخدموهـا خدمـة بالفعـل مخلوفـه
صباحية مبارك خـص وعيالـه احـداة العيـر=شيوخ حصونها وارتمـت بالحضـن مضفوفـه
تتالت بالعهـود وتوّجـت بالنصـر والتيسيـر=مذللـة الصعـاب تقودهـا بالـدرب معسوفـه
هل العادات اهل دسمان قصر ولا بنوه قصيـر=تلافـاه الركايـب مـن بعيـد الـدار مردوفـه
طوو ساسه وشدوا بالسواعـد لبنـة التسويـر=ورى البيبان سـور مزبـن اللاجيـن بكفوفـه
كويت المستجير ومن ترعرع في ثـراك يجيـر=عسى الأحداث عنك بقدرة الرحمـن مصروفـه
على ارضك ترجع الاسرى وتلتم الشمول بخير=فرح طفل يغـرد بـه حمـام الـورق برفوفـه
يسر الام ويعـود الولـد عاجـل بـلا تأخيـر=وتبصر عين كانت من دموع الحـزن مكفوفـه