انا مدري وش الي صار وش الي قلّب النيات=صديق الأمس عاداني ولا ادري وش هي اسبابه
وليش الصدق لا قلناه نشوف الناس منا اشتات =وليش الحق في قوله عتب وايفرق احبابه
الا بانت حقايقنا تخالفنا وثار الذات=وقمنا نظهر الطيبه ونبدي اوصاف كذابه
ولا منا تحكينا تفننا في الكذبات=وحنا نعرف النيه نواظرنا تحكى به
ترى بعض البشر يضحك ويكثر لك من الضحكات=وهو في داخله عله ونار الحقد شبابه
الا شافك تبسم لك يقول امطول الغيبات=تشوفه يا تلوى بك يشيد او زاد ترحابه
ولا من غبت عن عينه تشوف الضحك والهمسات=وتبدا رحلة التقطيع الا قفيت عن بابه
وبعض الناس يتودد ويصنع لجلك البسمات=ويتصنع ويتفاني عشانك قطع اثيابه
وهو ناوي على نيه وله مصلوح بالجيات=الا منه قضى اللازم رمى بيديه جلبابه
كثير الناس هذولا والا يا مكثر الغايات=عشان المصلحه ممكن يبيع اهله واقرابه
ويبقى للوفا قيمه وتبقى قمة الشيمات=على طول الزمن ما دام لقول الحق طلابه