صرخة مواطن جابة الكون واتعود=تضرب اذان الي تجاهل سماعي
يا خادم البيتين يا راعي الجود=باسم المواطن جيت ناخي وداعي
ضاقت بنا الدنيا وهي مالها احدود=ضاقت بنا رغم انها باتساعي
شعبك صرخ يا سيدي يطلب اسنود=السوق شبت فيه نار الطماعي
دخل المواطن رغم ما زاد محدود=واسعارنا شبت بدون اي داعي
وش عاد حال الي بلادخل موجود=اطفال وامٍ تنتخي به جياعي
يمضي نهاره ما بقى اي مجهود=مابين شغل او بين همين ساعي
وش حيلته لا جا في اليل مهدود=أمٍ بكت والطفل يبغى الرضاعي
من القهر دمعه على الخد مهدود=وش في يده لا ضاق فيه الوساعي
لازاد همه وان وصل درب مسدود=هانت عليه النفس ما عد يراعي
اما انتحر والا مصيبه ومنقود=والا غدا مقهور بين لضباعي
الحال شانت واليالي بهم سود=ما عاد تفرق لو حياته ضياعي
يا سيدي شعبك ترى يطلب انجود=رد الجشع عنا وناسٍ جشاعي
انت الكريم الي بك الجود معهود=ماهو نفاق الحق علمٍ يشاعي
موروث من اباء واعمام واجدود=تشهد لك اعمالك بكل البقاعي
السوق بيديهم والأسعار في زود=ناسٍ تموت ابيّد ناسٍ شباعي
وين الوزير الي مشى قبله العود=السوق شب او يبتلعنا ابتلاعي
وين انت يا شيخٍ على قومٍ ارقود=السوق غابه والمصالح افاعي
وين االتفاني وين ميثاق واعهود=وين الأمانه وين حسن المساعي
وزيرنا بابه من العز موصود=وقته ولا نرضى عليه انقطاعي
يوم القيامه فيه ناشد ومنشود=وكل راعي في رعاياه راعي
العمر يفنى والجسد ياكله دود=والروح تنزع من جسدك انتزاعي
واعلم بان الكبت له فعل مردود=واعلم بأن العمر يمكن يباعي
والجوع كافر والقهر يذبح اكبود=يلّوع اصحاب الفضيله لياعي
حنا ترى مثل الجسد والملك عود=الا اشتكى عضوٍ تداعت دواعي
حنا الوفا بقلوبنا يرعد ارعود=نعشق وطنا والندا له سواعي
حنا ترى ابن سعودوالدم بن سعود=مهما يصير الي يقوله يطاعي
عشنا وعاش اجدادنا خير واسعود=في ظل اخو نوره غدينا سباعي
لكن شلة كلها اسهود وامهود=والشعب راهي والمساكن قلاعي
اخفوا حقيقة من يعاني ومنكود=ويمنعون الي يعاني مناعي
ياخوفنا لا يصبح النوم معدود=تفرض رسوم النوم في كل ساعي
على الهوى يا شاعر الهم محسود=والخوف لا تغدي ضحيه تذاعي
ودك يسير العدل والحق ممدود=والخير بين الناس يغدي جماعي