هذي أول مشاركة لي في هالمنتدى اتمنى أن تنال اعجاب الجميع
الـعذاب الـلي بقلـبي وأنا حي مـعاه
وين ماوديـت وجـهي احس إني مـعه
ماسك بعروق قلبي ولاادري وش بلاه
كن مافي الكون غيري بكفه يصفعه
زعـزع الآمال فيني وانا اصـرخ آه آه
مابقى للسعد قسم وفي صدري سعه
داهمتني وحشة العمر من كل اتجاه
وارهقت جسم برته الهموم الموجعه
من سبايب علة القلب يامصعب دواه
ضاع حظه بين كل الجهات الأربعة
ضاقت الدنيا وحزني شديد الانتباه
ماترك فرصة تمر الا وحدد موقعه
بعثـرتني رحلة العمر والخاطر هواه
صار حلم والقدر قام يشر بأصـبعه
أنسرق حلمي وهوطفل تتعثرخطاه
وانقتل عمر السعادة بوسط المعمعة
وانتحر عصفور الآمال ماقاموا عزاه
مابقى من ذكـرياته سـوى ماجمعه
دفتر(ن ) وأبيات شعر تبين مبتغاه
لكن الحظ الردي كيف تقدر تقـنعه
مشكلة قلبي غباءه تزين في ذكاه
وألتبس ثوب التعاسة وبيده يرقعه
إن بغى يبديه للناس عيا واستحاه
وإن رماه اشلون يلقى بديل ينفـعه
أما أنا ياوجد قلبي على ما قد بلاه
اسـتكن بـداخلــه شي ما يـتوقـعه
وجد من في زفة العرس يحفر قبر أخاه
بيده الثنتين والريق جمر يبـلـعه
ضمني ياموت يمكن حنانك مالقاه
في قلوب حقدها بات تحت الأقنعه
خذ بيدي وأرم قلبي وعجل منتهاه
المهم أبـعد وشـريـان قـلـبي إنـزعه
طالما قلبي تعرف على الناس الوشاه
إنهم حولي ومـن خـبثـهم متجمعه
اجتماع الحقدوالرقص من شان العباه
باترك الدنيا وحزني عزمت أودعه