ان كنت في ودّ المخاليق عشمان=تلقا صديقً يوفي الطيب باالطيب
وان كنت ترمي التهمه من غير برهان=تخسر ولاتكسب وهقواتك اتخيب
ترى العلوم ابحور والصدق رُبّان=والكذب يرمي صاحبه للمتاعيب
الصدق مدحً للفتى وين ماكان=والكذب عيبً للفتى واكبر العيب
وكثر الحكي والبلبله ترخص الشان=وتعرّضك للنقد لبعيد واقريب
ترى المزح مايقبله كل انسان=ولا يعلم النيه سوى عالم الغيب
احرص ولا تمزح مع افلان وافلان=وابعد عن ادروب الخطا والعذاريب
قس العلوم وكل علمً بميزان=وخلك فهيم ابكل الاحوال واللبيب
من قاس قبل الغطس ماهو بغرقان=ومن لايقيس ايغيب في غبة اجليب
للطيب تلقا درب واضح وعنوان=ومن تاه دربه ماتصله المناديب
والمدح له ساسً متينً وعمدان=فعله يثمّن قيمة الشب والشيب
والحق مايبنا بزورً و بهتان=الحق مايغلب ولا شمسه اتغيب
ولا كل منهم يملكو خيل فرسان=ولا كل خيلً يافتى خيلً انجيب
ولا ترى من خامد الجمر دخان=والجمره الحيه لها اشرار واللهيب
والذيب يعوي في خلا مابه احيان=وسط المدينه ماسمعنا عوى الذيب