وقت الرخا عديت الأصحاب مليون =لكنهم وقت الشدايد قلالي
في ساعة البسطه بالارواح يفدون=كني ملكت الكون واصبح حلالي
وابحاميات الوقت عني يّقفون=لامالت الدنيا وضاق المجالي
لكن به ناسٍ في الضيق يبدون=ناسٍ لها والغيرها باكتمالي
البارحه وانا مع الناس مغبون=من كبر همي كني احيا لحالي
الهم جاني فاقد العقل مجنون=وانساق يمي كن جاه الهبالي
جتني ظروفٍ ضيقت واسع الكون=تنهد منها عاليات الجبالي
غديت كني داخل الحبس مسجون=كن القدر خلا الخلايق وجا لي
روحي عليله شارد الفكر محزون=دعيت رب الكون يلطف بحالي
من كثر همي ضاقت العين بالنون=ما اشوف حولي غير رسمة ظلالي
كني كسير او داخل الصدر مطعون=ماله سند والا رفاقه تسالي
حتى الحبيب الي له القلب مرهون=كنه وهم عشته ومر ابخيالي
لا هو وقف جنبي ولا قال وشلون=والا سأل عني ولا وش جرى لي
وابشدة الضيقة ظهر برق وامزون=وارجال بيديها تبني العلالي
اصحاب تبذل بالوفا كل مكنون=هي للمواقف والتحدي رجالي
جزا الشدايد كل خيرٍ وممنون=هي علمتني بابن عمي وخالي
واصحابي الي بالشدايد يصفون=لهم تدني نايفاتٍ طوالي
لهم شداد الناس غصبٍ يوطون=تغدي ظروف الوقت معهم ذلالي
اهل الكرم والجود عاشق ومفتون=في المجلس الي زينته الدلالي