هادا يا سيدي يقال إنو الخط المستقيم هوي أقصر الطرق بين نقطتين ، بس هالإيام الناس احترفت اللف و الدوران ولا عاد همها لا الخط المستقيم و لا مثلث فيثاغورث ، و لهيك لازم تتعلم كيف تعامل هالنوعية من الناس ...

الحل بسيط جدا ، أهم نقطة بالموضوع إنو هالناس شاطرين بالمساومة و المفاصلة ... و هون رح يبين إذا من الممكن تحسم المواجهة لصالحك أو لأ ... و هون وصلنا عالمهم !! : أول نقطة مهمة إنك تحط عينك بعينو بكل دم بارد و خلي وشك بدون تعابير و كأنو الموضوع مارق على راسك ألف مرة ، و كتير ضروري يحس اللي عم يفاوضك إنو متلبّك ... يعني كتر من استفساراتك التافهة و ضل اسأل ليش ، بدك تحبطو احباط كامل وهون منجي عالنقطة التانية : لا تجاوب عالأسئلة وكل ما انسألت سؤال جاوب بسؤال ، أو قول فرضا هيك صار ... هادا بيعطيك مجال أكبر للمناورة بحيث تتملص ايمتى ما بدك ، ولما بتوصل للمراد بتجينا النقطةالتالتة : قلل من أهمية المكاسب و ركز على السلبيات و هيك بتخفف الإضاءة عن الحدث و بتحمي طريقتك الناجعة باللف و الدوران .... و اخر نقطة هيي : لف و دور قد ما بدك بس أوعى تجرب الدغري بين اللفات ، لأنو اللي بيمشي الدغري بيكون نظامي و النظامي إذا بلش يلف و يدور بتشك العالم فيه !! فهمتو عليي يا حلوين .. المصلحة صعبة و بدا تمرين ، وإذا لم تكن ذئبا ضحكو عليك الأرانب فلا تفكر قانون الغابة ما بيمشي هون لأنو نجوى كرم بتقول ما حدا لحدا ... لهيك اسمعو نصيحة الهاردروك و لا تخلو الراقصين على الحبال يغررو فيكون ، خليكون متل كيفن كوستنر و ارقصو مع الذئاب ...

طبعا الطريقة الواردة أعلاه أكاديمية و مجربة ، نرحب بكل التعليقات و الإضافات بشرط ما حدا يعملنا فيها !!! لأنو الموضوع ما بيتحمل !!