يامرحبا قدام تفنيد الاجابه للسوال=شرواك نبدي له تراحيب الغلا ونقولها
لفيت غالي عند غالي شيخ عند اهل الكمال=من قوم بذلو للفوايد جهدهم وانحو لها
نبقى على سنّه ومذهب روسنا دايم طوال=ماضن يلحقها مساكين العرب واجهولها
ندك ميدان القصايد باالمعاني اللي جزال=روّضنا في ميدانها فرسانها واخيولها
من واحة الافكار ماتشرى من البندر بمال=يوم اكثر المستشعرين ازرو على معلولها
والناقه جرباء ياطويل العمر من خس الحلال=ولا تخاوي القافله ابترحالها واحلولها
في الحوش دايم باركه ماغير فرجه للعيال=من وهنها واهزالها ما تنتقلها ارجولها
ماحد يقول الشخص الاعزل يكتمل وقت النزال=من بعد ما دقت مزامير الفتن واطبولها
الله رفع شاني وشانك عن سواليف الخبال=نقدر نفرّق عاقل العربان من مخذولها
وش ابتخبّي الاقنعه ياشيخ من وجه الضلال=والا وش اللي يرتجون الناس من مسطولها
ذولاك مثل العمي مايدرون وش وصف الجمال=واقلوبهم من غيهم دايم عليها اقفولها
مكره طبايعهم وياشين العوايد والخصال=نفوسهم بانت مواري حقدها واغلولها
الوصفه انساهم بدون ايّة نقاش ولا جدال=لابد تندم حربة القاتل على مقتولها
لا تعتبرها الا سحابة صيف مالت للزوال=مااخبر سحاب الصيف تغمر للبلاد اسيولها