سجد قلبي على رمل الضلوع وهزه التنهيد
وانا في جوفي خيام الندم والخوف منصوبة

يارب افهق هلاكي والمنايا والدروب بعيد
مادام المودماني للتراب تقوده دروبه

ياغياث الظوامي والثمام وجرهدي البيد
أعذني من جهنم والحشر والموت وكروبه

انا مانبيب لامشرك ولافاسق ولا عربيد
انا اللي لاعصى وأخطأ تجهم وأقلقه ثوبه

انا عبدك ولد عبدك وجداني هلَ التوحيد
خطاياي أخجلتني يالله الغفران والتوبه

وانا اللي يرتجف مثل ارتجاف الخايف الرعديد
اذا شاف القبور الضيقات وحس بذنوبه

انا الانسان حمال النقايض والكمد والكيد
غريق الطين واللذات من راسه لعرقوبه

انا عبدك ياربي وانت تفعل ماتشاء وتريد
سألتك يالله العفو العظيم وهين دروبه