جيت واشواقي تسابق والوله ماله حـدود=جيت واعيوني تناظر ذاب بالصمت الكلام
جيت وانا اشم عطرك امتلا منه الوجـود=جيت وانفاسي تلاحق جيت متعبني الهيام
جيت ياخذني حنيني جيت متحري الوعود=جيت والبسمه حزينه شمس غطاها الغمام
المكان الي جمعنا قام يصـرخ يالعنـود=قام ينشد عنك وينك وابتدى فينـي مـلام
قلت انا جيت ابوعدها يوم وثقنا العهـود=جيت ادور عن شذاها جيت ناداني الغرام
قلت تكفى كان مرت قلها حمر الخـدود=عذبوا عينٍ شقيه جفنها جـا فـا المنـام
وان تمادت في سفرها قلها تكفـى تعـود=قلها قلبي وروحي عقبهـا باقـي صيـام
الايادي كيف تكتب والمشاعر في ركـود=والقصايد كيف تطلع والمفاتن في خصـام
زلزلتني يوم غابت مثل زلزلـة الرعـود=كل ما هميت بوقف طحت من قبل القيـام
ملهمتني للقصايد موجعتني فـي الكبـود=يوم غابت عن سمانا قل على الدنيا السلام