سلامي سلامن مثل نفح العطر منثور=على اللآبه اللي ماتبيّن سرايرها
عسى اللي يلمّ الشّمل ويفرّق المجبور=ومحصي البشر عالم بما في ضمايرها
يعين اللذي يضحك وهو خاطره مكسور=وعينه من الفرقا تسابق عبايرها
وفي صدره أتشبّ اللواهب كما التّنور=الايام ضدّه عاندت مايسايرها
طرى له يقدّم ساعته والزمن محصور=يبي لحظة التّوديع تبدي بشايرها
سواة الضّرير المشكله مايشوف النّور=ولا راى وافين الخلايق وبايرها
صحيح الوطن غالي ولو فيه بعض أقصور=ولا الغربه اللي يقطع القلب جايرها
يقوله ويثبت قوله الغايب الماسور=حباله قصيره مافتلها وغايرها
الافكار في راسه تروح وتجي بالدّور=وفكره تناسب له وفكره يطايرها
معاناه ماجاء شرحها في جمل وأسطور=تكفّي قبيله ثم تعمي بصايرها
الابيات مادوّنتها إلآ وأنا مقهور=وجنيّتي ماهي بعيده وشايرها
أنا بختصر وانتم خذو منّي الميسور=والاعذار توخذ والدماء في نثايرها