أعتذر والعذر يشرح ضيق صدري وإكتئابي=لو يكون الورد ما له عذر من قطر الندى
وإعتذاري مو لأني غبت ،،، لكن في غيابي=ربما غابت معي روح الشعر في المنتدى
مو غرور ،،، الكل شاعر ،،، منكم أتعلّم ،،، ومابي=تزعلون وتحقدون ،،، إلا الزعل جعله فدا
للعيون اللي رضاها مثل تستيرة ثيابي=لو تكشّفني هوى الغربي ،،، (كذا وإلا كدا)
ماشكرت إلا جناح الطير ودّاني وجاء بي=بعد ربّي ،،، كلما روّح بشعري أو غدى
من حناني كنّ بيت الشعر ناشي في رحابي=لين علّمت الهلالي سالفة طرق الحدا
والظروف ألدّ عدواني وصفحة من كتابي=كل يوم أكتب عليها (عود في عين العدا)
كم كتبت أبياتكم في حضن شبّاكي وبابي=من ترانيم المطر لين الهجير إلى شدا