قدّمي شوربة البصل مع توست محمص





النهارده هنقدّم لك خطوات عمل شوربة البصل على الطريقة الفرنسية بطريقة سهلة وسريعة؛ جرّبيها وقولي لنا على رأيك..

شوربة البصل بالطريقة الفرنسية
المقادير:
3 أكواب شوربة لحمة أو فراخ
2 ثمرة بصل كبيرة مقطّعة
ملعقة كبيرة زيت زيتون
ملعقة صغيرة بهارات
3 ملعقة كريمة طبخ
2 ملعقة كبيرة زبدة
ملعقة كبيرة دقيق
2 فص توم مفروم
ملح وفلفل

الطريقة:
1- حطّي الزبدة وزيت الزيتون في حلة تيفال متوسّطة، وحطي عليهم البصل والتوم وشوّحيهم لحد ما يدبلوا ولونهم يبقى دهبي، وضيفي الشوربة وقلبيهم 3 دقايق على نار متوسطة.

2- ضيفي الكريمة وقلّبيها مع الشوربة لمدة دقيقتين، بعد كده ضيفي الدقيق وقلبي كويس جدا لحد ما يبقى المزيج متجانس، واطفي عليهم.

3- اضربي الخليط ده في الخلاط لمدة 3 دقايق لحد ما يبقى متجانس جدا، ومايبقاش فيه أي أثر لقِطع البصل، وبعدها رجعيه على النار مرة تانية، وضيفي الملح والفلفل والبهارات، وقلبيه لحد ما يغلي واطفيه، وقدّميه مع توست محمّص.. وبالهنا والشفا.

وبكده تكون خلصت وصفتنا النهارده..
استنونا بكره مع وصفة جديدة..
سلاااام،،،